Pearl (NSS) - အောက်တိုဘာ ၄

အင်းတော်မြို့နယ်၌ ကျောင်းထိုင်ဆရာတော်တစ်ပါးအား အကြမ်းဖက်အဖွဲ့က ဖမ်းဆီးခေါ်ဆောင်သွားပြီးနောက် (၅)ရက်အကြာ၌ ပုပ်ပွသေဆုံးလျက်တွေ့ရှိခဲ့ကြောင်း မြန်မာနိုင်ငံရဲတပ်ဖွဲ့မှ သိရသည်။

ထို့ကြောင့် လက်ရှိအချိန်ထိ အကြမ်းဖက်သမားများ၏လုပ်ကြံသတ်ဖြတ်မှုကြောင့် ပျံလွန်တော်မူခဲ့သော သံဃာတော်(၉၀)နီးပါးရှိလာခဲ့ကြောင်း သိရသည်။ 

ဖြစ်စဉ်မှာ ပြီးခဲ့သည့် အောက်တိုဘာလ ၁ ရက်၊ နေ့လည် ၂ နာရီအချိန်တွင် စစ်ကိုင်းတိုင်း ၊ အင်းတော်မြို့နယ်၌ အထက်ပါကဲ့သို့ ဖြစ်ပွားခဲ့ကြောင်း သိရသည်။ 

အင်းတော်မြို့နယ်၊ ပင့်တင်ကျေးရွာရှိ ဘုန်းကြီးကျောင်းမှ ကျောင်းထိုင်ဆရာတော် ဥူးဉာဏိက (၅၃)နှစ်၊ (၃၃)ဝါအား KIA / PDF ပူးပေါင်းအဖွဲ့က ပြီးခဲ့သည့် စက်တင်ဘာလ ၂၆ ရက်တွင် ဖမ်းဆီးခေါ်ဆောင်သွားခဲ့ကြောင်း ရဲတပ်ဖွဲ့မှထုတ်ပြန်ထားသည်။ 

ထိုသို့ ဖမ်းဆီးခေါ်ဆောင်သွားခဲ့ပြီးနောက်  ပင်ငယ်ကျေးရွာအနီး ရွှေဘို-မြစ်ကြီးနားကားလမ်းဘေးလယ်တောစပ်၌ ဆရာတော် ဥူးဉာဏိကအား အကြမ်းဖက်သတ်ဖြတ်ခဲ့မှုကြောင့် ဝမ်းဗိုက်၌ ထိုးသွင်းဒဏ်ရာ (၂) ချက်ရရှိကာ အခင်းဖြစ်နေရာတွင် သေဆုံးနေခဲ့ပြီး  ၎င်းရုပ်အလောင်းအား အောက်တိုဘာလ (၁)ရက်တွင် ပုပ်ပွလျက် ပြန်လည်တွေ့ရှိခဲ့ကြောင်းသိရသည်။ 

ပြီးခဲ့သည့် စက်တင်ဘာလ ၂၄ ရက်တွင်လည်း ပဲခူးတိုင်း၊  ထန်းတပင်မြို့နယ် ၊ မင်းကြိုင်းရွာ၊ ကျေးရွာဘုန်းကြီးကျောင်း ကျောင်းထိုင်ဆရာတော် ဦးဝေပုလ္လအား  KNU/PDF ပူးပေါင်းအဖွဲ့မှ ဖမ်းဆီးခေါ်ဆောင်သွားပြီး သေနတ်ဖြင့် ပစ်ခတ်သတ်ဖြတ်ခဲ့သည့် ဖြစ်စဉ်ဖြစ်ပွားခဲ့သည်။ 

အလားတူ ပြီးခဲ့သည့် သြဂုတ်လ ၃ ရက်တွင်လည်း မကွေးတိုင်း၊ ထီးလင်းမြို့နယ်ရှိ ကျောင်းထိုင်ဆရာတော်ဥူးဝိစိတ္တကို PDF အဖွဲ့ဝင်တစ်ဦး နှင့် အရပ်သားတစ်ဦးက သေနတ်ဖြင့် ပစ်ခတ်လုပ်ကြံသတ်ဖြတ်မှုဖြစ်ပွားခဲ့ပြီး သြဂုတ်လ ၉ ရက်တွင်လည်း မန္တလေးတိုင်း၊ မတ္တရာမြို့နယ်ရှိ အောင်မင်္ဂလာကျောင်းတိုက်မှ ကျောင်းထိုင်ဆရာတော် ဥူးစန္ဒိမာသည်လည်း အကြမ်းဖက်အဖွဲ့၏ ဓါးဖြင့် ရက်ရက်စက်စက်ခုတ်သတ်ခြင်းကိုခံခဲ့ရကာ ပျံလွန်တော်မူခဲ့သည့် ဖြစ်စဉ် ဖြစ်ပွားခဲ့သည်။ 

လက်ရှိတွင် နိုင်ငံတော်အတွင်း သံဃာတော် ၈၈ ပါးနှင့် သီလရှင်ဆရာကြီး ၁ ပါးတို့ လုပ်ကြံသတ်ဖြတ်ခံထားရပြီး အထက်ပါဖြစ်စဉ်များမှ သံဃာတော်များအား သတ်ဖြတ်မှုကျူးလွန်ခဲ့သည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းများ ဆောင်ရွက်လျက်ရှိကြောင်း ထုတ်ပြန်ထားသည်။