Pika (NSS) - အောက်တိုဘာ ၁ 

Apple ကုမ္ပဏီသည် လာမည့် update တွင် ပြင်ဆင်မည့် iOS 17 ဆော့ဖ်ဝဲလ်၏ ချို့ယွင်းချက်များ အပါအဝင် မကြာသေးမီက ထုတ်လုပ်ခဲ့သော iPhone 15 အမျိုးအစားကို အပူလွန်ကဲစေသည့်ပြဿနာအချို့ကို ဖော်ထုတ်ခဲ့ကြောင်း သိရသည်။ 

iPhone 15 အမျိုးအစားတွင် အပူလွန်ကဲနေကြောင်း တိုင်ကြားမှုများရှိလာပြီးနောက် Apple ကုမ္ပဏီက ယခုကဲ့သို့ ထုတ်ပြန်ပြောဆိုခဲ့ခြင်းဖြစ်သည်။ iPhone 15 အမျိုးအစားသည် ပိုမိုအဆင့်မြှင့်တင်ထားသော လုပ်ဆောင်ချက် အသစ်များကြောင့် စတင်အသုံးပြုသည့် ရက်အနည်းငယ်အတွင်း ဖုန်း ပူခြင်းများရှိလာနိုင်ကြောင်း Apple ကုမ္ပဏီက ပြောကြားခဲ့သည်။

Apple ကုမ္ပဏီ က "နောက်ထပ်ပြဿနာတစ်ခုကတော့ ဖုန်းရဲ့ device ထဲမှာမပါတဲ့ အပ်ပ်တွေရဲ့အပ်ဒိတ်တွေက စက်လေးတာတွေ ဘာတွေကိုဖြစ်စေပြီး ဖုန်းပူလာစေတာပါ။ ပြုပြင်မှုတွေ လုပ်ဆောင်ဖို့အတွက် App ဖန်တီးသူ တွေနဲ့လည်း ဆက်လက် လက်တွဲလုပ်ဆောင်နေပါတယ်" ဟု ပြောခဲ့သည်။ 

ဖုန်း ပူလာစေသည့်ပြဿနာများထဲတွင် ပါဝင်သော ပြင်ပအပ်ပ်များမှာ Asphalt9 ဂိမ်း၊ Meta ကုမ္ပဏီ၏ အင်စတာဂရမ်ပလက်ဖောင်း နှင့် Uber အ်ပ် တို့ဖြစ်ကြောင်း Apple ကုမ္ပဏီကပြောကြားခဲ့သည်။ 

သို့သော်လည်း အင်စတာဂရမ်သည် စက်တင်ဘာလ(၂၇)ရက်က ၎င်းတို့နှင့်ပတ်သက်သည့်ပြဿနာများကို ပြင်ဆင်ပြီးပြီဖြစ်ကြောင်းသိရသည်။ iPhone 15 Pro နှင့် 15Pro Max အမျိုးအစားတို့သည် ၎င်းတို့၏ ဒီဇိုင်း ပိုင်းကြောင့် အပူလွန်ကဲခြင်းများမရှိကြောင်း Apple ကုမ္ပဏီက ပြောကြားခဲ့သည်။

iPhone 15 Pro နှင့် 15Pro Max အမျိုးအစားတို့တွင် သုံးထားသော တိုက်တေနီယမ်သည် စတီးလ်ဖြင့် ထုတ်လုပ် ထားသော ယခင်မော်ဒယ်များ နှင့် နှိုင်းယှဉ်မည်ဆိုပါက အပူလွန်ကဲမှုဒဏ်ကို ပိုမိုခံနိုင်ရည်ရှိကြောင်း Apple ကုမ္ပဏီ က ပြောကြားထာားသည်။

သို့သော်လည်း အပူလွန်ကဲမှုပြဿနာသည် ဘေးကင်းလုံခြုံမှု (သို့မဟုတ်) ထိခိုက်ဒဏ်ရာရရှိစေမည့် အန္တရာယ် များကို မဖြစ်စေနိုင်ကြောင်း နှင့် ဖုန်း၏ စွမ်းဆောင်ရည်ပိုင်းကိုလည်း ထိခိုက်စေမည်မဟုတ်ကြောင်း Apple ကုမ္ပဏီ က ပြောကြားထားသည်။