ဂျန်ဇက် (NSS) - စက်တင်ဘာ ၃ဝ

ရုရှားတပ်ဖွဲ့တွေရဲ့ ကာကွယ်ရေးခံစစ်လိုင်းဟာ မျှော်လင့်ထားတာထက် ပိုမိုတောင့်တင်းကောင်းမွန်နေကြောင်း၊ အနောက်အုပ်စုနိုင်ငံတွေအနေနဲ့ ရုရှားခံစစ်လိုင်းကို ကျော်ဖြတ်နိုင်အောင် ယူကရိန်းရဲ့တန်ပြန်ထိုးစစ်ဆင်မှုတွေကို ပြန်လည်ချိန်ညှိဖို့ လိုအပ်ကြောင်း ဗြိတိန် စစ်ဘက်အကြီးအကဲတစ်ဦးဖြစ်တဲ့ ဗိုလ်ချုပ်ကြီး Tony Radakin ကထုတ်ဖော်ပြောဆိုလိုက်ပါတယ်။ 

ရုရှားတပ်ဖွဲ့တွေရဲ့ခံစစ်လိုင်းဟာ အနောက်အုပ်စုနိုင်ငံများ ကနဦးမျှော်လင့်ထားတာ ပိုမိုခုခံနိုင်ကြောင်း သက်သေပြနိုင်ခဲ့ကြောင်း၊ ယူကရိန်း-ရုရှားစစ်ပွဲဟာ လက်ရှိထက်အချိန်ပိုမိုကြာမြင့်နိုင်ကြောင်း ဗြိတိန်ဗိုလ်ချုပ်ကြီးက ပြောပါတယ်။ 

ဗြိတိန်ဗိုလ်ချုပ်ကြီးက "အနောက်အုပ်စုနိုင်ငံတွေရဲ့ စစ်ရေးအကြီးအကဲတွေဟာ ယူကရိန်းရဲ့တန်ပြန်ထိုးစစ်ဆင်မှုတွေနဲ့ပတ်သက်ပြီး လက်ရှိအခြေအနေတွေကို ဂရုစိုက်လုပ်ဆောင်သင့်တယ်။ ရုရှားခံစစ်လိုင်းတွေကို ယူကရိန်းတပ်ဖွဲ့တွေ ထိုးဖောက်နိုင်အောင် တန်ပြန်ထိုးစစ်ဆင်မှုအခြေအနေများကို ပြန်လည်ချိန်ညှိသင့်တယ်"လို့ပြောပါတယ်။ 

ယူကရိန်းဟာ ရုရှားကို ဇွန်လအစောပိုင်းကတည်းက စစ်မျက်နှာသုံးခုဖွင့်ကာ တန်ပြန် ထိုးစစ်ဆင်ခဲ့ပေမယ့် မျှော်လင့်သလောက်အောင်မြင်မှုမရဘဲ ကြီးမားတဲ့ ထိခိုက်ဆုံးရှုံးမှုများနဲ့ရင်ဆိုင်နေရကြောင်းသိရပါတယ်။ ယူကရိန်းတပ်ဖွဲ့တွေဟာ တန်ပြန်ထိုးစစ်ဆင်မှုစတင်ခဲ့ပြီးနောက် ရက်ပေါင်း ၁၀၀ ကျော်အတွင်း ယူကရိန်းတပ်ဖွဲ့ဝင်ဦးရေ (၁)သိန်းနီးပါးထိခိုက်ကျဆုံးခဲ့သလို အနောက်အုပ်စုနိုင်ငံများက ကူညီပေးထားတဲ့စစ်လက်နက်ပစ္စည်း အနည်း ဆုံး ၅၀၀၀ ကျော်ထိခိုက်ပျက်စီးခဲ့ရကြောင်းသိရပါတယ်။ 

ဗြိတိန်ဗိုလ်ချုပ်ကြီးက "စစ်ရေးပဋိပက္ခမှာ ယူကရိန်းတပ်ဖွဲ့တွေ အောင်မြင်နိုင်မှု စွမ်းရည် ဟာ ရုရှားခံစစ်တွေကို ထိုးဖောက်ကျော်လွန်နိုင်မှုအပေါ် မူတည်နေတယ်။ တိုက်ပွဲတွေကိုအနိုင်ရဖို့က စစ်ရေးအပေါ်မူတည်နေတယ်။ ဒါပေမယ့် စစ်ပွဲအနိုင်ရဖို့ဆိုတာ စီးပွားရေး နဲ့ စီးပွားရေးအလားလာကောင်းမွန်မှုတွေနဲ့သက်ဆိုင်နေတယ်"လို့ပြောပါတယ်။ 

ဒါ့ပြင် ဗြိတိန်ဗိုလ်ချုပ်ကြီးက ယူကရိန်းစစ်တပ်ဟာ ပရော်ဖက်ရှင်နယ် စစ်တပ်မျိုးမဟုတ်ကြောင်း၊ ပရော်ဖက်ရှင်နယ်စစ်တပ်မဟုတ်တဲ့ ယူကရိန်းစစ်တပ်အတွက် ရုရှားခံစစ်လိုင်းတွေကို ကျော်ဖြတ်နိုင်ဖို့ နည်းလမ်းရှာဖွေနိုင်ဖို့ ကြိုးပမ်းပေးရဖွယ်ရှိနေကြောင်း ပြောပါတယ်။