မျိုးကြီး (NSS) - စက်တင်ဘာ ၂၀

နိုင်ငံအတွင်း၌ ဖြစ်ပေါ်နေသော အကြမ်းဖက်မှုများသည် အသက်(၁၅)နှစ်နှင့်အထက် စာမတတ်သူ(၄)သန်းကျော်၏ နောက်ဆက်တွဲ အကျိုးဆက်များကြောင့်ဟု ဒုတပ်ချုပ်က ပြောသည်။

နစကဒုဥက္ကဋ္ဌ ဒုတိယဗိုလ်ချုပ်မှူးကြီးစိုးဝင်းက ယမန်နေ့(စက်တင်ဘာလ ၁၉ ရက်)တွင် နေပြည်တော်ရှိ နစကဥက္ကဋ္ဌရုံး၌ ပြုလုပ်သည့် ကျေးလက်ဒေသနေပြည်သူများ နှင့် တိုင်းရင်းသားပြည်သူများစာတတ်မြောက်ရေးအစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

စာတတ်မြောက်မှသာ အများသူငှာ၏ မြှောက်ပင့်စည်းရုံးဆွဲဆောင်မှုတို့အပေါ် ဝေဖန်ပိုင်းခြားနိုင်မည်ဖြစ်ကြောင်း ဒုတိယ ဗိုလ်ချုပ်မှူးကြီးစိုးဝင်းက ပြောသည်။

ယနေ့အချိန်တွင် နိုင်ငံအတွင်းရှိ အချို့မြို့နယ်များနှင့် နယ်စပ်ဒေသအချို့တို့တွင် ဖြစ်ပေါ်လျက်ရှိသော အကြမ်းဖက်မှု များသည် ၂၀၁၉ ခုနှစ်ကြားဖြတ်သန်းခေါင်စာရင်းအရ (၁၅)နှစ်နှင့်အထက် စာမတတ်သူ (၄ ဒသမ ၁)သန်း၏ နောက်ဆက်တွဲ အကျိုးဆက်များကြောင့်ဖြစ်သည်ကို တွေ့ရမည်ဟု ဒုတပ်ချုပ်က ပြောသည်။

သမိုင်းအထောက်အထားများအရ ရှေးမြန်မာမင်းများလက်ထက် မြန်မာ့လူ့ဘောင်အဖွဲ့အစည်း၌ စာမတတ်သူနည်း ပါးကာ စာတတ်မြောက်သူများပြားခဲ့သည်ကိုတွေ့ရှိရကြောင်း ဒုတိယဗိုလ်ချုပ်မှူးကြီးစိုးဝင်းက ပြောသည်။

ထို့ပြင် မြန်မာနိုင်ငံသည် အင်္ဂလိပ်၊ ဂျပန်၊ အင်္ဂလိပ်ကိုလိုနီခေတ် ကျွန်သပေါက်ကျရောက်ချိန်တွင် မြန်မာနိုင်ငံ၏ စာတတ်မြောက်မှုနှုန်းသည် (၃၅)ရာခိုင်နှုန်းအထိ ကျဆင်းခဲ့ရကြောင်းလည်း ၎င်းက ဆက်လက်ပြောသည်။

မြန်မာနိုင်ငံ လွတ်လပ်ရေးရရှိပြီးနောက်ပိုင်း ၁၉၇၃ ခုနှစ်လူဦးရေသန်းခေါင်စာရင်းအရ (၆၆ ဒသမ ၉)ရာခိုင်နှုန်း၊ ၁၉၈၃ ခုနှစ်လူဦးရေသန်းခေါင်စာရင်းအရ (၇၆ ဒသမ ၆)ရာခိုင်နှုန်း၊ ၂၀၁၄ ခုနှစ်လူဦးရေသန်းခေါင်စာရင်းအရ (၈၉ ဒသမ ၅)ရာခိုင်နှုန်းနှင့် ၂၀၁၉ ခုနှစ်ကြားဖြတ်သန်းခေါင်စာရင်းအရ (၈၉ ဒသမ ၁)ရာခိုင်နှုန်းသည် စာတတ်မြောက်မှုရှိခဲ့ကြောင်း သိရသည်။

၂၀၁၄ ခုနှစ်သန်းခေါင်စာရင်းအရ မူလတန်းပညာရေးကို ဆုံးခန်းတိုင် မသင်ကြားခဲ့ရသည့် ကလေးပေါင်း (၂ ဒသမ ၇) သန်းခန့်ရှိပြီး အသက် (၁၅)နှစ်နှင့်အထက် စာမတတ်သူပေါင်း (၃ ဒသမ ၅၅)သန်းခန့်ရှိနေကြောင်း ထုတ်ပြန်ထား သည်ဟု ဒုတပ်ချုပ်က ပြောသည်။

ထို့အတူ ၂၀၁၉ ခုနှစ် ကြားဖြတ်လူဦးရေစာရင်းအရ နိုင်ငံအတွင်း၌ အသက် (၁၅)နှစ်နှင့်အထက် စာမတတ်သူပေါင်းသည် (၄ ဒသမ ၁)သန်းခန့်ရှိကြောင်း ထုတ်ပြန်ထားသည်ကိုလည်း တွေ့ရှိရပြီး ပြည်နယ်နှင့်တိုင်းအသီးသီး၌ စာမတတ်မြောက်သော အမျိုးသမီးရာခိုင်နှုန်းသည် အမျိုးသားများထက် မြင့်မားနေကြောင်း တွေ့ရှိရသည်ဟု ၎င်းက ထပ်မံပြောကြားထားသည်။