ဂျန်ဇက် (NSS) - စက်တင်ဘာ ၁၄

မြန်မာနိုင်ငံက အိမ်ရှင်အဖြစ်လက်ခံကျင်းပနေသည့် အာဆီယံလေတပ်ဦးစီးချုပ်များအစည်းအဝေးကို အာဆီယံဒေသတွင်းရှိ နိုင်ငံအချို့၏လေတပ်ဦးစီးချုပ်များ မတက်ရောက်ခဲ့သော်လည်း ထိုင်းလေတပ်ဦးစီးချုပ် ဗိုလ်ချုပ်ကြီး Alongkorn Vannarat ကိုယ်တိုင်တက်ရောက်ခဲ့ပြီး သဘာဝပတ်ဝန်းကျင်ဆိုင်ရာကိစ္စများကို အဓိကထားဆွေးနွေးခဲ့ကြောင်း ထိုင်းလေတပ်၏ ပြောရေးဆိုခွင့်ရှိသူ Wassana Nanum က ထုတ်ဖော်ပြောကြားလိုက်သည်။

အကြိမ် ၂၀ မြောက်အာဆီယံလေတပ်ဦးစီးချုပ်များအစည်းအဝေးကို စက်တင်ဘာလ ၁၃ ရက်က နေပြည်တော်တွင် ကျင်းပခဲ့ပြီး အာဆီယံဒေသတွင်းနိုင်ငံများဖြစ်သည့် ထိုင်း၊ ဘရူးနိုင်း၊ လာအို၊ ဗီယက်နမ်၊ ကမ္ဘောဒီးယားနိုင်ငံတို့၏ လေတပ်ဦးစီးချုပ်များကိုယ်တိုင်တက်ရောက်ခဲ့သော်လည်း စင်ကာပူ၊ မလေးရှား၊ အင်ဒိုနီးရှား နှင့် ဖိလစ်ပိုင်နိုင်ငံတို့၏ လေတပ်ဦးစီးချုပ်များလူကိုယ်တိုင်တက်ရောက်ခြင်းမရှိကြောင်းသိရသည်။ 

အဆိုပါ အာဆီယံလေတပ်ဦးစီးချုပ်များအစည်းအဝေးကို “ASEAN Air Forces' Cooperation for Sustainable Environment”ခေါင်းစဉ်ဖြင့်ကျင်းပခဲ့ခြင်းဖြစ်ပြီး စင်ကာပူ၊ ဖိလစ်ပိုင်နိုင်ငံတို့က ရုပ်သံဖိုင်များပေးပို့ကာ ပါဝင်ဆွေး နွေးခဲ့ကြောင်းသိရသည်။ ထိုင်းလေတပ်၏ ပြောရေးဆိုခွင့်ရှိသူတစ်ဦးဖြစ်သည့် Wassana Nanum က " နိုင်ငံရေးနဲ့ စစ်ရေးဆိုင်ရာ ဆွေးနွေးမှုတွေကိုရှောင်ရှားမှာဖြစ်ပြီး သဘာဝပတ်ဝန်းကျင်ဆိုင်ရာကိစ္စတွေကို ဆွေးနွေးသွားဖွယ်ရှိနေပါတယ်" ဟုပြောသည်။

ကာကွယ်ရေးဦးစီးချုပ် (လေ) ဗိုလ်ချုပ်ကြီး ထွန်းအောင်က (၂၀)ကြိမ်မြောက် အာဆီယံလေတပ်ဦးစီးချုပ်များအစည်းအဝေးအဖွင့်နှုတ်ခွန်းဆက်စကားပြောကြားပြီး အစည်းအဝေးကို ဖွင့်လှစ်ပေးကာ အစည်းအဝေးတက်ရောက်လာသော နိုင်ငံများ၏လေတပ်ဦးစီးချုပ်များကြား ရင်းနှီးပွင့်လင်းစွာဆွေးနွေးခဲ့ကြပြီး (၂၀)ကြိမ်မြောက် အာဆီယံလေတပ်ဦးစီးချုပ်များအစည်းအဝေး၏ ဆုံးဖြတ်ချက်များအား အတည်ပြုခဲ့ကြောင်းသိရသည်။

ဗိုလ်ချုပ်ကြီးထွန်းအောင်သည် (၂၁) ကြိမ်မြောက် အာဆီယံလေတပ်ဦးစီးချုပ်များအစည်းအဝေးတွင် အလှည့်ကျဥက္ကဋ္ဌအဖြစ် တာဝန်ထမ်းဆောင်မည့် ကမ္ဘောဒီးယားနိုင်ငံလေတပ်ဦးစီးချုပ် Gen.Soeung Samnang ထံသို့ ဥက္ကဋ္ဌတာဝန်လွှဲပြောင်းပေးအပ်ခဲ့ကြောင်းသိရသည်။