Pika (NSS) - စက်တင်ဘာ ၁၃ 

မြောက်ကိုရီးယားနိုင်ငံသည် စက်တင်ဘာလ(၁၃)ရက်တွင် တာတိုပစ်ပဲ့ထိန်းဒုံးကျည်နှစ်စင်းကို ၎င်း၏ နိုင်ငံအရှေ့ဖက်ပင်လယ်ထဲသို့ ပစ်လွှတ်ခဲ့ကြောင်း ဂျပန် နှင့် တောာင်ကိုရီးယားနိုင်ငံ က ပြောကြားခဲ့သည်။

မြောက်ကိုရီးယားခေါင်းဆောင်ကင်ဂျုံအန်းသည် ရုရှားသမ္မတပူတင်နှင့်တွေ့ဆုံရန်အတွက် ရုရှားနိုင်ငံသို့ သွားရောက်လည်ပတ်နေသည့်အချိန်တွင် အဆိုပါဒုံးကျည်စမ်းသပ်မှုထွက်ပေါ်လာခြင်းဖြစ်သည်။ ထို့အပြင် ပူတင် နှင့် ကင်ဂျုံအန်းတို့သည် တွေ့ဆုံစဉ်အချိန်အတွင်း ယူကရိန်းစစ်ပွဲနှင့်ပတ်သက်ပြီး ရုရှား၏ ကြိုးပမ်းအားထုတ်မှု များကို ပိုမိုအရှိန်မြှင့်တင်ပေးနိုင်မည့် လက်နက်သဘောတူညီချက်များ ဆွေးနွေးမည်ကို နိုင်ငံတကာက စိုးရိမ်နေ ကြောင်းလည်း သိရသည်။

အဆိုပါဒုံးကျည်စမ်းသပ်မှုသည် ကင်ဂျုံအန်း ပြည်ပတွင်ရှိနေစဉ်အချိန်အတွင်း မြောက်ကိုရီးယား၏ ပထမဆုံး အကြိမ်ပစ်လွှတ်မှုဖြစ်နိုင်ကြောင်း လေ့လာသုံးသပ်သူများက ပြောကြားခဲ့သည်။ ပြုံယမ်း၏ အပြည်ပြည်ဆိုင်ရာ လေဆိပ်နေရာမှ ပစ်လွှတ်လိုက်သောပဲ့ထိန်းဒုံးကျည်များကို ပစ်လွှတ်ပြီးနောက် (၁ဝ)မိနစ်အကြာတွင် တွေ့ရှိခဲ့ ခြင်းဖြစ်ကြောင်း တောင်ကိုရီးယားပူးတွဲစစ်ဦးစီးချုပ်များရုံးက ပြောကြားခဲ့သည်။

အဆိုပါပဲ့ထိန်းဒုံးကျည်များသည် မြောက်ကိုရီးယားနိုင်ငံ အရှေ့ဖက်ပင်လယ်ပြင်ဆီသို့ ဦးတည်ပျံသန်းသွားခဲ့ခြင်း ဖြစ်ကြောင်း တောင်ကိုရီးယားပူးတွဲစစ်ဦးစီးချုပ်များရုံးက ပြောကြားခဲ့သည်။ သို့သော်လည်း အဆိုပါပဲ့ထိန်းဒုံးကျည် များ ဘယ်လောက်အကွာအဝေးအထိ ပျံသန်းသွားသည်ဆိုသည့်အချက်ကို လက်ရှိအချိန်အထိ ရှင်းရှင်းလင်းလင်း မသိရှိရသေးကြောင်း သိရသည်၊၊ 

မြောက်ကိုရီးယားက ပစ်လွှတ်လိုက်သော ပဲ့ထိန်းဒုံးကျည်များသည် ပင်လယ်ထဲသို့ ကျရောက်သွားခဲ့ပုံပေါ်ပြီး အဆိုပါအရာဝတ္ထုများကို သတိထားကြရန် နှင့် ထိတွေ့ခြင်းမျိုး မလုပ်ဆောင်ရန် ဂျပန်ကမ်းရိုးတန်းအနီးတစ်ဝိုက်ရှိ သင်္ဘောများကို တိုက်တွန်းထားကြောင်း ဂျပန်ကမ်းခြေစောင့်တပ်ဖွဲ့ က ပြောကြားခဲ့သည်။

ရုရှား နှင့် ယူကရိန်းစစ်ပွဲဖြစ်ပွားပြီးနောက်ပိုင်း ကင်ဂျုံအန်းသည် မြောက်ကိုရီးယားနိုင်ငံ၏ လက်နက်များကို ဖွံ့ဖြိုး တိုးတက်အောင်လုပ်ဆောင်ရန် ကြိုးပမ်းမှုတစ်စိတ်တစ်ပိုင်းအဖြစ် ၂ဝ၂၂ ခုနှစ် အစပိုင်းကတည်းက ဒုံးကျည်အစင်း (၁ဝဝ)ကျော် စမ်းသပ်ပစ်လွှတ်ခဲ့ကြောင်း သိရသည်။ 

ကင်ဂျုံအန်းနှင့်တွေ့ဆုံစဉ်အချိန်အတွင်း ရုရှားသမ္မတပူတင်သည် ယူကရိန်းကို ကျူးကျော်တိုက်ခိုက်မှုများ ဆက်လက်လုပ်ဆောင်ရန်အတွက် လက်နက်သိုလှောင်မှုများကို ပြန်လည်ဖြည့်တင်းရန် မြောက်ကိုရီးယားထံမှ အမြောက်များ နှင့် ခဲယမ်းမီးကျည်များကို တောင်းဆိုနိုင်ဖွယ်ရှိကြောင်း အမေရိကန်တာဝန်ရှိသူများက ဝေဖန်ခဲ့သည်။ ထို့အပြင် ကင်ဂျုံအန်းသည် ၎င်း၏နျူကလီးယားလက်နက်နှင့် ဒုံးကျည်အစီအစဉ်များကို ပိုမို ဖွံ့ဖြိုးတိုးတက်စေရန်အတွက် လိုအပ်သော စီးပွားရေးအကူအညီများ နှင့် ခေတ်မီသော လက်နက်နည်းပညာများကို ရုရှားထံမှ တောင်းဆိုနိုင်ကြောင်း လေ့လာသုံးသပ်သူများက ပြောကြားခဲ့သည်။