ယွန်း (NSS) - စက်တင်ဘာ ၈

Naypyitaw State Academy တွင် ဆေးပညာအခြေခံနှစ်သင်တန်းကို နိုဝင်ဘာလတွင် ဖွင့်လှစ်မည်ဖြစ်ကြောင်း သိရသည်။

ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းက စက်တင်ဘာ(၇)ရက်တွင် ကျန်းမာရေး လူ့စွမ်းအားအရင်းအမြစ်ဦးစီးဌာန နေပြည်တော်အစည်းအဝေးခန်းမတွင် ကျင်းပသည့် ညှိနှိုင်းအစည်းအဝေးတွင် အထက်ပါကဲ့သို့ပြောခဲ့ခြင်းဖြစ်သည်။

Naypyitaw State Academy ကို ပြီးခဲ့သည့် ၂ဝ၂၂ ခုနှစ်၊ နိုဝင်ဘာလ(၉)ရက်တွင် စတင်ဖွင့်လှစ်ခဲ့ပြီး သင်ကြားရေး မဟာဌာနကြီး ခုနှစ်ခုတို့ဖြင့် ဖွဲ့စည်းတည်ထောင်ထားခဲ့ကြောင်း သိရသည်။

အဆိုပါဌာနကြီးခုနှစ်ခုတွင် ဝိဇ္ဇာပညာမဟာဌာန၊ သိပ္ပံပညာမဟာဌာန၊ ဥပဒေပညာမဟာဌာန၊ စီးပွားရေး မဟာဌာန၊ ဆေးသိပ္ပံပညာမဟာဌာန၊ လူမှုရေးပညာမဟာဌာန နှင့် အားကစားပညာမဟာဌာန တို့ ပါဝင်ခဲ့သည်။

၎င်းတို့အနက်မှ ဆေးသိပ္ပံပညာမဟာဌာနကို ဖွင့်လှစ်နိုင်ရေးအတွက် ယခင်နှစ်ကပင် စတင်စီစဥ်ဆောင်ရွက်ခဲ့ရာ လာမည့်နိုဝင်ဘာလတွင် ၂ဝ၂၃ ခုနှစ် တက္ကသိုလ်ဝင်စာမေးပွဲအောင်မြင်သူများမှစ၍ တက်ရောက်နိုင်မည့် ဆေးပညာအခြေခံနှစ်သင်တန်းကို စတင်ဖွင့်လှစ်တော့ မည်ဖြစ်ကြောင်း ဒေါက်တာသက်ခိုင်ဝင်းက အသိပေး ပြောကြားထားသည်။

Naypyitaw State Academy သို့ တက်ရောက်ခွင့်ရရှိမည့် ကျောင်းသား၊ ကျောင်းသူများအား ရွေးချယ်ရာတွင် ၎င်းတို့အောင်မြင်ခဲ့သည့် စာစစ်ဌာနအပေါ်မူတည်၍ စနစ်တကျရွေးချယ်ဆောင်ရွက်သွားမည်ဖြစ်ကြောင်း သိရသည်။

ထို့ပြင် ဆေးတက္ကသိုလ်များတွင် လက်ရှိသင်ကြားလျက်ရှိသည့်  Outcome-based Integrated Curriculum ဖြင့် တစ်ပြေးညီ သင်ကြားနိုင်ရေးကိုလည်း ပညာရေးဝန်ကြီးဌာနနှင့်  ညှိနှိုင်းဆောင်ရွက်မည်ဖြစ်ကြောင်း ပြည်ထောင်စု ဝန်ကြီးက တိုက်တွန်းပြောကြားခဲ့သည်။

Naypyitaw State Academy မှ ဘာသာရပ်‌ခြောက်ခုတွင် ပါရဂူသင်တန်းများ ဖွင့်လှစ်မည်ဖြစ်ပြီး အိန္ဒိယ တက္ကသိုလ်များနှင့် ပူးပေါင်းဆောင်ရွက်နိုင်ရေးကို ပြီးခဲ့သည့်ရက်ပိုင်းက နှစ်နိုင်ငံဆွေးနွေးမှုများရှိခဲ့သည်။

ထို့ပြင် အဆိုပါတက္ကသိုလ်တွင် အဆင့်မြင့်ပညာပါရဂူဘွဲ့များပေးအပ်နိုင်သည်အထိ သင်ကြားပေးမည်ဖြစ်ပြီး ကမ္ဘာ့ အကောင်းဆုံးတက္ကသိုလ်များစာရင်းတွင် ပါဝင်နိုင်သည်အထိ လုပ်ဆောင်ပေးနိုင်ရေး မျှော်မှန်းဆောင်ရွက်ရန် နစကဥက္ကဋ္ဌ က ပြောဆိုထားဖူးသည်။