Pika (NSS) - စက်တင်ဘာ ၃

ယူကရိန်းတွင် စစ်ရေးအရ ထိပ်တိုက်ရင်ဆိုင်မှုများသည် ရုရှားနှင့် နေတိုးအဖွဲ့ကြား ပဋိပက္ခအဖြစ်သို့ ပြောင်းလဲသွားနိုင်သည့်အခြေအနေကို ရောက်ရှိနေပြီဖြစ်ကြောင်း ကုလသမဂ္ဂဆိုင် ရုရှားလက်ထောက်သံတမန် ဒီမစ်ထရီပိုလီယန်စကီးက ပြောကြားခဲ့သည်။

အမေရိကန်ဦးဆောင်သော နေတိုးအဖွဲ့သည် ရုရှားနှင့် ယူကရိန်းကြား ပဋိပက္ခတွင် ပိုမိုနက်ရှိုင်းစွာ ပါဝင် ပတ်သက်လာနေကြောင်း ၎င်းက ဝေဖန်ပြောခဲ့သည်။

၎င်း က  "ယူကရိန်းပဋိပက္ခမှာ ပါဝင်ပတ်သက်တာဟာ အန္တရာယ်များတဲ့လုပ်ရပ်တစ်ခုဖြစ်ပြီး ရုရှားနဲ့ နေတိုးကြား တိုက်ရိုက်ပဋိပက္ခတွေဖြစ်ပွားလာနိုင်တယ်လို့ ကျွန်တော်တို့ သတိပေးထားပါတယ်။ နေတိုးအဖွဲ့ဟာ တိုက်ရိုက် တပ်ဖြန့်ထားခြင်းမျိုးကလွဲရင် တတ်နိုင်သမျှနည်းလမ်းပေါင်းစုံနဲ့ ယူကရိန်းတပ်ဖွဲ့တွေကို ကူညီပံ့ပိုးပေးနေပါတယ်" ဟု ပြောခဲ့သည်။ 

ယူကရိန်းနိုင်ငံတွင် နေတိုးအဖွဲ့၏ လေ့ကျင့်ရေးမှူးများနှင့် ကြေးစားစစ်သားများရှိနေသည်ကို ရုရှားအစိုးရက သိရှိ ထားကြောင်း ဒီမစ်ထရီပိုလီယန်စကီးက ထပ်မံပြောခဲ့သည်။ ထို့အပြင် နေတိုးအဖွဲ့၏ အရာရှိများနှင့် ဗိုလ်ချုပ်များ သေဆုံးနေသည်ဆိုသည့် သတင်းများထွက်ပေါ်နေခြင်းကို ၎င်းက ထောက်ပြခဲ့ကြောင်းလည်း သိရသည်။

၎င်းက "အဲဒီအချက်ကြောင့် သံသယတွေကို ပိုဖြစ်လာစေပါတယ်။ နေတိုးအဖွဲ့ဝင်အချို့ဟာ ယူကရိန်းရဲ့ အချို့ လုပ်ဆောင်ချက်တွေမှာ ပါဝင်နေတယ်ဆိုတာကို ကျွန်တော်တို့ သိထားပါတယ်" ဟု ဝေဖန်ပြောခဲ့သည်။

ယူကရိန်းစစ်တပ်အတွက် လက်ရှိအခြေအနေများသည် အလွန်ဆိုးရွားကြောင်းနှင့် အနောက်အုပ်စုနိုင်ငံများ၏ စစ်ရေးအကူအညီများကသာ ၎င်းတို့အားလုံးအတွက် ကယ်တင်ရာတစ်ခုဖြစ်ကြောင်း ဒီမစ်ထရီပိုလီယန်စကီးက မှတ်ချက်ပြုပြောခဲ့သည်။

ထို့အပြင် အမေရိကန်နိုင်ငံရှိလူအချို့သည် ရုရှားနှင့်စစ်ပွဲတွင် ယူကရိန်းက ရှုံးနိမ့်နေသည်ကို နားလည်ကြကြောင်း ၎င်းက ထပ်မံပြောခဲ့သည်။ အနောက်အုပ်စုနိုင်ငံများသည် ပဋိပက္ခစတင်ဖြစ်ပွားသည့်အချိန်တည်းက ယူကရိန်းကို စစ်ရေးအကူအညီအဖြစ် အမေရိကန်ဒေါ်လာ(၁ဝဝ)ဘီလျံကျော် ပေးပို့ခဲ့ပြီး ၎င်းတို့အနေဖြင့် ယူကရိန်းပဋိပက္ခတွင် တိုက်ရိုက် ပါဝင်ပတ်သက်ခြင်းမျိုးမရှိကြောင်း အခိုင်အမာပြောခဲ့သည်။

ယူကရိန်းသို့ အနောက်အုပ်စုနိုင်ငံများ၏ စစ်လက်နက်ပစ္စည်းများပေးပို့မှုသည် ပဋိပက္ခကို ပိုမိုရှည်ကြာအောင်လုပ်နေခြင်းဖြစ်သလို ရုရှားနှင့်နေတိုးအဖွဲ့ကြား တိုက်ရိုက်ပဋိပက္ခများဖြစ်ပွားလာနိုင်ကြောင်း ရုရှားဖက်က အကြိမ်ကြိမ် သတိပေးပြောဆိုခဲ့သည်။