Pika (NSS) - စက်တင်ဘာ ၂

တရုတ်သမ္မတရှီကျင့်ဖျင်နှင့် မကြာမီအချိန်အတွင်း တွေ့ဆုံနိုင်ရန် မျှော်လင့်ထားကြောင်း ရုရှားသမ္မတပူတင်က စက်တင်ဘာလ(၁)ရက်တွင် ထုတ်ဖော်ပြောဆိုခဲ့သည်။

ရုရှားသမ္မတပူတင်သည် အောက်တိုဘာလတွင် တရုတ်နိုင်ငံသို့ သွားရောက်လည်ပတ်ရန် စီစဉ်နေကြောင်း သတင်းများထွက်ပေါ်ခဲ့ပြီးနောက် ယခုကဲ့သို့ထုတ်ဖော်ပြောဆိုခဲ့ခြင်းဖြစ်သည်။ ပြီးခဲ့သည့်နှစ်တွင် ယူကရိန်းကိုကျူးကျော်တိုက်ခိုက်ခဲ့ခြင်းကြောင့် အနောက် အုပ်စုနိုင်ငံများ နှင့် တင်းမာမှုများမြင့်တက်လာခဲ့ပြီးနောက်ပိုင်း ရုရှားသည် တရုတ်နှင့် နှစ်နိုင်ငံကြားဆက်ဆံရေးကို ပိုမိုတိုးမြှင့်လာခဲ့ကြောင်းသိရသည်။

တရုတ်အစိုးရသည် ယူကရိန်းအပေါ် ကျူးကျော်တိုက်ခိုက်မှုများနှင့်ပတ်သက်ပြီး ရုရှားအ ပေါ် ပိတ်ဆို့အရေးယူမှုများချမှတ်ရန် အနောက်အုပ်စုနိုင်ငံများ၏ တောင်းဆိုမှုများကို ငြင်းဆန်ပယ်ချခဲ့ပြီး ရုရှားအပေါ် ချမှတ်ထားသော အနောက်အုပ်စုနိုင်ငံများ၏ ပိတ်ဆို့အရေးယူမှုများကို ပြစ်တင်ရှုတ်ချခဲ့ကြောင်းလည်းသိရသည်။ တရုတ်သမ္မတရှီကျင့်ဖျင်သည် ပြီးခဲ့သည့်မတ်လတွင် ရုရှားသို့လာရောက်လည်ပတ်ခဲ့ပြီး တရုတ်နိုင်ငံ ဘေဂျင်းမြို့တွင် ကျင်းပမည့် တတိယအကြိမ်မြောက် “Belt and Road” ဖိုရမ်သို့ တက်ရောက်ရန် ရုရှားသမ္မတပူတင်ကို ဖိတ်ကြားခဲ့ကြောင်းသိရသည်။

ထို့ကြောင့် ရုရှားသမ္မတပူတင်သည် လာမည့်အောက်တိုဘာလတွင် တရုတ်နိုင်ငံသို့သွား ရောက်လည်ပတ်ရန် စီစဉ်နေကြောင်း ရုရှား၏နိုင်ငံခြားရေးမူဝါဒအကြံပေး Yury Ushakov ကပြောကြားခဲ့သည်။ ယူကရိန်းကို ကျူးကျော်တိုက်ခိုက်ခြင်းများ မလုပ်ဆောင်မီ သီတင်း ပတ်များအလိုတွင် ရုရှားသမ္မတပူတင်နှင့်တရုတ်သမ္မတရှီကျင့်ဖျင်တို့သည် နှစ်နိုင်ငံကြား အကန့်အသတ်မရှိ မိတ်ဖက်ဆက်ဆံရေး သဘောတူညီချက်ကို လက်မှတ်ရေးထိုးခဲ့သည်။

ပူတင်သည် တရုတ်နိုင်ငံသို့ သွားရောက်မည်ဆိုသည့်အချက်ကို အတည်ပြုပြောကြားခြင်းမျိုးမရှိသေးကြောင်းသိရသည်။ ပူတင်သည် အိန္ဒိယနိုင်ငံ နယူးဒေလီမြို့တွင် ပြုလုပ်မည့် G20 ထိပ်သီးအစည်းအဝေးကို လူကိုယ်တိုင်တက်ရောက်ရန် အစီအစဉ်မရှိကြောင်း ပြီးခဲ့သည့်ရက်ပိုင်းက ထုတ်ဖော်ပြောဆိုခဲ့သည်။