ဂျန်ဇက် (NSS) - သြဂုတ် ၂၄ 

ထိုင်းဝန်ကြီးချုပ်အသစ်အဖြစ် ဖြူထိုင်းပါတီခေါင်းဆောင်တစ်ဦးဖြစ်တဲ့ ဆာရက်သာတာဗီဆင်ကို ခန့်အပ်ခံရခြင်းအပေါ် ဂုဏ်ယူကြောင်း၊ ထိုင်းနဲ့ အမေရိကန်နိုင်ငံကြား အပြန်အလှန်ပူးပေါင်းဆောင်ရွက်မှုတွေ နောက်ထပ်တိုးမြှင့်ဆောင်ရွက်သွားမှာဖြစ်ကြောင်း အမေရိကန်အစိုးရက သတင်းထုတ်ပြန်လိုက်ပါတယ်။

အမေရိကန်နိုင်ငံခြားရေးဝန်ကြီး အန်တိုနီဘလီကန်က "ကျွန်တော်တို့ဟာ ထိုင်းဝန်ကြီးချုပ်အသစ်နဲ့ အလုပ်တွေ ပူးပေါင်းဆောင်ရွက်ဖို့ ပစ်မှတ်ထားနေတယ်။ ပြီးခဲ့တဲ့နှစ်မှာ ထိုင်းနဲ့ အမေရိကန်နိုင်ငံကြား မဟာဗျူဟာမြောက်မိတ်ဖက်အဖြစ် တည်ဆောက်နိုင်ခဲ့တယ်။ ထိုင်းနဲ့ အမေရိကန်နိုင်ငံကြား မဟာမိတ်ဖြစ်မှုတွေကို ပိုမိုကောင်းမွန်အောင်လုပ်ဆောင်သွားမှာပါ။ အင်ဒိုပိဖိတ်ဒေသမှာ ငြိမ်းချမ်းရေး၊ အပြန်အလှန်ဆက်သွယ်မှုကောင်းမွန်ရေး၊ လွတ်လပ်ပွင့်လင်းမှု နဲ့ တန်ဖိုးတွေကို မျှဝေတွေ ဆက်လက်လုပ်ဆောင်နိုင်ဖို့ ထိုင်းအစိုးရအဖွဲ့အသစ် နဲ့ အနီးကပ်ပူးပေါင်းဆောင်ရွက်သွားမှာပါ" လို့ပြောပါတယ်။

အမေရိကန် နဲ့ ထိုင်းနိုင်ငံကြားမိတ်ဖက်ဖြစ်မှုဟာ ကမ္ဘာနိုင်ငံတွေထဲမှာ သက်တမ်း ၁၉ဝ ကျော်ရှိနေကြောင်း သိရပါတယ်။ 

အမေရိကန်နိုင်ငံခြားရေးဝန်ကြီးက "အမေရိကန်နဲ့ ထိုင်းတို့ဟာ မိတ်ဆွေအဖြစ်နဲ့ရော မဟာမိတ်အဖြစ်နဲ့ပါ အတူတကွ ပူးပေါင်းလုပ်ဆောင်မှာပါ။ ဒေသအတွင်း လုံခြုံရေးပိုမိုကောင်းမွန်စေဖို့ နဲ့ အပြန်အလှန်ဖွံ့ဖြိုးတိုးတက်ရေးကောင်းမွန်စေဖို့ လုပ်ဆောင်သွားမယ်။ နှစ်နိုင်ငံကြား ပြည်သူအချင်းချင်းကြား ရင်းနှီးမှုများ ပိုမိုရရှိအောင် နဲ့  ကမ္ဘာကျန်းမာရေးနဲ့ပတ်သက်ပြီး စိန်ခေါ်မှုတွေကိုလည်း ပူးပေါင်းဆောင်ရွက်သွားမယ်" လို့ ပြောပါတယ်။

ထိုင်းအိမ်ခြံမြေ ဘီလျံနာ ဆာရက်သာတာဗီဆင်ဟာ ပြီးခဲ့တဲ့ရက်ပိုင်းက ကျင်းပခဲတဲ့ ထိုင်းဝန်ကြီးချုပ်ရွေးချယ်ပွဲမှာ လွှတ်တော်နှစ်ရပ်ပေါင်းရဲ့ထောက်ခံမဲ ၄၈၂ မဲရရှိခဲ့ပြီး ဝန်ကြီးချုပ်အဖြစ် ရွေးချယ်ခံရကာ ထိုင်းဘုရင့်နန်းတော်က သြဂုတ် ၂၄ ရက်နေ့မှာ ဝန်ကြီးချုပ်အဖြစ် တရားဝင်ခန့်အပ်လိုက်ပါတယ်။ 

ထိုင်းဝန်ကြီးချုပ်အသစ်အဖြစ် ဆာရက်သာတာဗီဆင် ခန့်အပ်ခံရခြင်းအပေါ် ဗြိတိန်အစိုးရနဲ့ အိန္ဒိယဝန်ကြီးချုပ်မိုဒီ တို့ကလည်း ချီးကျူးဂုဏ်ယူကြောင်း စာများ ရေးသားပေးပို့ခဲ့ပါတယ်။