Pika (NSS) - သြဂုတ် ၂၁

ရုရှား နှင့် ယူကရိန်းကြား ပဋိပက္ခများသည် နှစ်ပေါင်းများစွာ (သို့မဟုတ်) ဆယ်စုနှစ်များစွာ ကြာမြင့်နိုင်ဖွယ်ရှိနေကြောင်း ရုရှားသမ္မတဟောင်း ဒီမစ်ထရီမက်ဗီဒက်က ထုတ်ဖော်ပြောခဲ့သည်။

ထို့အပြင် ယူကရိန်းပဋိပက္ခသည် ရုရှားတည်ရှိမှုအတွက် အရေးကြီးသော တိုက်ပွဲတစ်ခုဖြစ်ကြောင်း ဒီမစ်ထရီမက်ဗီဒက် က ပြောခဲ့သည်။ ရုရှားသည် ယူကရိန်းနိုင်ငံကို အပြီးသတ်ချေမှုန်းပစ်မည်ဖြစ်ပြီး ယခုကဲ့သို့ ပဋိပက္ခများ နောက်တစ်ကြိမ်ထပ်မဖြစ်စေရန်အတွက် သေချာအောင်လုပ်ဆောင်သွားမည်ဖြစ်ကြောင်း ၎င်းက ပြောဆိုခဲ့သည်။ 

၎င်း က "ဒီပဋိပက္ခဟာ နှစ်များစွာ ဒါမှမဟုတ် ဆယ်စုနှစ်များစွာ  ကြာမြင့်သွားနိုင်ပါတယ်။ ဒါပေမယ့်လည်း ကျွန်တော်တို့မှာ ရွေးချယ်စရာမရှိပါဘူး။ ရုရှားအနေနဲ့ ယူကရိန်းနိုင်ငံကို အပြီးသတ်ချေမှုန်းတာမျိုး မလုပ်ဆောင် နိုင်ခဲ့ရင် အနောက်အုပ်စုနိုင်ငံတွေဟာ  ရုရှားကို အစိတ်စိတ်အမွှာမွှာဖြစ်သွားအောင် ဖျက်ဆီးပစ်ပါလိမ့်မယ်။ ဘယ်သူကမှ ဖျက်ဆီးခံရတာကို မလိုချင်ကြပါဘူး" ဟု ပြောခဲ့သည်။

ထို့အပြင် ယူကရိန်း၏ အနောက်အုပ်စုကျောထောက်နောက်ခံနိုင်ငံများသည်  ရေရှည်တွင် ယူကရိန်းကို ဆက်လက် ထောက်ခံပေးတော့မည်မဟုတ်ကြောင်း ဒီမစ်ထရီမက်ဗီဒက်က ပြောဆိုခဲ့သည်။ ယူကရိန်းပဋိပက္ခကို ဝင်ရောက် စွက်ဖက်နေသည့် အနောက်အုပ်စုနိုင်ငံများသည် ရှုံးနိမ့်ခြင်းများနှင့် ရင်ဆိုင်ရမည်ဖြစ်ကြောင်း ၎င်းက ထပ်မံ ပြောဆိုခဲ့သည်၊၊ 

ပဋိပက္ခစတင်သည့်အချိန်မှစတင်ပြီး အနောက်အုပ်စုနိုင်ငံများသည် ယူကရိန်းသို့ စစ်ရေးနှင့် စီးပွားရေးအကူ အညီများစွာ ကူညီထောက်ပံ့ပေးခဲ့ပြီး အနောက်အုပ်စုနိုင်ငံများ၏ ထိပ်တန်းအရာရှိအများအပြားသည် စစ်မြေပြင် တွင် ရုရှားရှုံးနိမ့်သည်ကို မြင်လိုကြောင်း အကြိမ်ကြိမ်ပြောဆိုခဲ့ကြသည်။ ယူကရိန်းသို့ စစ်လက်နက်ပစ္စည်းများ ထောက်ပံ့နေခြင်းအား ရပ်တန့်ရန် အနောက်အုပ်စုနိုင်ငံများကို ရုရှားဖက်ကတိုက်တွန်းတောင်းဆိုခဲ့ကြောင်း သိရသည်။

ထို့အပြင် ယူကရိန်းသို့ စစ်လက်နက်ပစ္စည်းများ ကူညီထောက်ပံ့ပေးခြင်းသည် ပဋိပက္ခကို ပိုမိုရှည်ကြာအောင် လုပ်ဆောင်နေခြင်းဖြစ်ပြီး သွေးထွက်သံယိုမှုများကိုသာပိုမိုဖြစ်ပွားလာစေမည်ဖြစ်ကြောင်း ရုရှားဖက်က အကြိမ်ကြိမ်သတိပေးပြောဆိုခဲ့သည်။