NSS - ဩဂုတ် ၂ဝ

ကချင်ပြည်နယ်၊ မိုးကောင်းမြို့တွင် လုံခြုံရေးအဖွဲ၏ ကျောင်းကြိုကားတစ်စီး ပစ်ခတ်ခံရကာ တပ်ကြပ်ကြီး အပါအဝင် (၂)ဦး သေဆုံးခဲ့ကြောင်း သိရသည်။

အဆိုပါ ကျောင်းကားသည် ယမန်နေ့(ဩဂုတ်လ ၁၉ ရက်)၊ ညနေ(၃)နာရီ ၃ဝ မိနစ်ဝန်းကျင်အချိန်တွင် မိုးကောင်း မြို့၊ သံလွင်တည်းခိုခန်းအရှေ့၊ အထက(၁)ကျောင်းလမ်းဆုံအနီးတွင် ပစ်ခတ်ခံရခြင်းဖြစ်‌ကြောင်း မြို့ခံများထံမှ သိရသည်။

၎င်းကားကို ဆိုင်ကယ်စီးလာသည့်လူငယ်များက သေနတ်ဖြင့် ပစ်ခတ်ထွက်ပြေးသွားခဲ့ခြင်းဖြစ်ကြောင်း သိရသည်။

သေနတ်ဖြင့်ပစ်ခတ်ခံရမှုကြောင့် တပ်ကြပ်ကြီးနှင့် အမျိုးသားတစ်ဦး ထိခိုက်သေဆုံးခဲ့ကြောင်း သိရသည်။

“ကျွန်တော်တို့က အခင်းဖြစ်ပြီး သက်ဆိုင်ရာသတင်းပေးတဲ့အခါမှ ဝင်ပြီးတော့ အလောင်းကောက်ပြီး ရုပ်အလောင်းနှစ်ခုကတော့ ဆေးရုံပို့ပေးလိုက်ပါတယ်။ ဘယ်သူတွေ ပစ်ခတ်သွားလည်း မသိရပါဘူး။  ကျွန်တော် တို့က အခင်းဖြစ်ပြီး တစ်နာရီလောက်နေမှ ဝင်ရတာပါ” ဟု ဒေသခံလူမှုကူညီရေးအသင်းမှ တာဝန်ရှိသူတစ်ဦးက NP News ကို ပြောသည်။

အဆိုပါ အမျိုးသား (၂)ဦးအား မိုးကောင်းပြည်သူ့ဆေးရုံ ရင်ခွဲရုံသို့ ပို့ဆောင်ထားကြောင်း ၎င်းက ဆက်လက်ပြောကြားထားသည်။