Pika (NSS) - ဩဂုတ် ၁၉

ဗြိတိန်နိုင်ငံ လီဗာပူးလ်မြို့အနီးရှိ မွေးကင်းစကလေးငယ်များထားသော ဆေးရုံတွင် တာဝန်ထမ်းဆောင်သော Lucy Letby အမည်ရှိ သူနာပြုတစ်ဦးသည် မွေးကင်းစကလေးငယ်(၇)ဦးကို သတ်ဖြတ်မှုနှင့် အခြားကလေးငယ်(၆)ဦးကို သတ်ဖြတ်ရန် ကြိုးပမ်းခဲ့ကြောင်း တရားသူကြီးများက ပြောကြားခဲ့သည်။

ထို့ပြင် Lucy Letby သည် သူနာပြုအဖြစ် တာဝန်ထမ်းဆောင်စဉ်အချိန်အတွင်း အခြားမွေးကင်းစကလေးငယ်များကို ထိခိုက်အောင် လုပ်ဆောင်ခဲ့ခြင်းရှိ/မရှိဆိုသည့်အချက်ကို ရဲတပ်ဖွဲ့က ဆက်လက်စုံစမ်းစစ် ဆေးနေကြောင်းသိရသည်။ ဆယ်လကြာရုံးတင်စစ်ဆေးပြီးနောက် ဩဂုတ်လ(၁၈)ရက်တွင် ထွက်ပေါ် လာသော အစီရင်ခံစာအရ Lucy Letby သည် ဗြိတိန်ခေတ်သစ်သမိုင်းတွင် ကလေးသတ်သမားတစ်ဦးဖြစ်လာခဲ့ကြောင်း  ရိုက်တာသတင်းဌာနက ဖော်ပြခဲ့သည်။

သူမသည် မွေးကင်းစကလေးငယ်(၇)ဦးကို သတ်မှုဖြင့် တစ်သက်တစ်ကျွန်းထောင်ဒဏ် ကျခံရနိုင်ဖွယ်ရှိနေကြောင်းလည်းသိရသည်။ အသက်(၃၃)နှစ်အရွယ် Lucy Letby သည် ၂၀၁၅ခုနှစ်မှ ၂၀၁၆ခုနှစ်အတွင်း Countess of Chester Hospital တွင် သူနာပြုအဖြစ် တာဝန်ထမ်းဆောင်ခဲ့ကြောင်းသိရသည်။အဆိုပါကာလအတွင်း မွေးကင်းစကလေးငယ်များ သေဆုံးခြင်းနှင့်ထိခိုက်ဒဏ်ရာရခဲ့ခြင်းများကို ဆရာဝန်များက အစီရင်ခံစာတင်ခဲ့သော်လည်း ဆေးရုံစီမံခန့်ခွဲသူများက အဆိုပါအစီရင်ခံစာများကို ပယ်ချခဲ့ကြောင်းသိရသည်။

သို့သော်လည်း ရဲတပ်ဖွဲ့သည် စုံစမ်းစစ်ဆေးမှုများကို စတင်လုပ်ဆောင်ခဲ့ပြီး ၂၀၁၈ ခုနှစ်တွင် Lucy Letby ကို ဖမ်းဆီးခဲ့ကြောင်းသိရသည်။ ရဲတပ်ဖွဲ့များက ၎င်း၏နေအိမ်ကို ရှာဖွေခဲ့ရာ ကလေးငယ်များကို သတ်ကြောင်းဝန်ခံခဲ့သော စာများကိုတွေ့ရှိခဲ့ကြောင်းသိရသည်။ အဆိုပါစာထဲတွင် "ကျွန်မက ဆိုးရွားတဲ့လူတစ်ယောက်ပါ။ ကျွန်မက ဒီလိုဆိုးယုတ်တဲ့ လုပ်ရပ်တွေကို လုပ်ခဲ့မိပါတယ်"ဟု ရေးသားထားသည်။

အစိုးရရှေ့နေ Pascale Jones က "သူမဟာ စိတ်ရှည်စွာလုပ်တဲ့ သွေးအေးလူသတ်သမားတစ်ဦးပါ။ သူမရဲ့စောင့်ရှောက်မှုအောက်မှာရှိတဲ့ ကလေးငယ်တွေကို မတူညီတဲ့ နည်းလမ်းတွေနဲ့သတ်ခဲ့ပြီး ရာဇဝတ်မှုကို ဖုံးကွယ်ဖို့ ကြိုးပမ်းခဲ့တာပါ။ ပြီးတော့ သူမရဲ့လုပ်ဖော်ကိုင်ဖက်တွေကိုလည်း လှည့်ဖြားဖို့ကြိုးစားခဲ့ပါတယ်"ဟု တရားရုံးတွင်ပြောဆိုခဲ့သည်။ 

Lucy Letby သည် အခြားကလေးငယ်(၆)ဦးကို သတ်ဖြတ်ရန် ကြိုးပမ်းမှုဖြင့်လည်း တရားစွဲဆိုခံထားရကြောင်းသိရသည်။ ထို့ပြင် Lucy Letby သည် ဩဂုတ်လ(၂၁)ရက်တွင် ထောင်ဒဏ်တစ်သက်တစ်ကျွန်း ပြစ်ဒဏ်ချမှတ်ခံရနိုင်ဖွယ်ရှိနေသည့် တရားရုံးချိန်းသို့တက်ရောက်ရန် ငြင်းဆိုထားကြောင်းလည်းသိရသည်။