NSS - ဩဂုတ် ၁၄

မန္တလေးတိုင်း၊ နွားထိုးကြီးမြို့နယ်တွင် ကျေးရွာအုပ်ချုပ်ရေးမှူးနှင့်ဇနီးဖြစ်သူအပါအဝင် လူ(၆)ဦးကို PDF အဖွဲ့က သေနတ်ဖြင့်ပစ်သတ်ခဲ့ကြောင်း နစကမှ သိရသည်။

နစကမှ သြဂုတ်လ(၁၃)ရက်၊ ညပိုင်းတွင် အထက်ပါကဲ့သို့ ထုတ်ပြန်ထားခြင်းဖြစ်သည်။

ဖြစ်စဉ်မှာ ဩဂုတ်လ ၁၁ ရက်၊ နံနက် ၃နာရီခန့်အချိန်တွင် နွားထိုးကြီးမြို့နယ်၊ မင်းရွာကျေးရွာအတွင်းသို့ PDF အဖွဲ့က လက်နက်ငယ်များကိုင်ဆောင်ကာ ဆိုင်ကယ်များဖြင့်ရောက်ရှိလာခဲ့ကြောင်း သိရသည်။

ထို့နောက် အဆိုပါကျေးရွာ အုပ်ချုပ်ရေးမှူးဖြစ်သူ ဦးအုန်းဖေနှင့်ဇနီး ဒေါ်မိုးအပါအဝင် အမျိုးသား(၂)ဦးနှင့် အမျိုးသမီး(၂)ဦးအား သေနတ်ဖြင့်ပစ်ခတ်သတ်ဖြတ်ခဲ့ကြောင်း နစကမှ ထုတ်ပြန်ထားသည်။

ထို့ပြင် မင်းရွာကျေးရွာရှိ အခြေခံပညာအထက်တန်းကျောင်း(ခွဲ)အား မီးရှို့ဖျက်ဆီးကာ ထွက်ပြေးသွားခဲ့ကြောင်း နစက၏ သတင်းထုတ်ပြန်ချက်များမှ သိရသည်။

ထို့နောက် နံနက် ၁၀ နာရီအချိန်တွင် လုံခြုံရေးတပ်ဖွဲ့ဝင်များက  ၎င်းဖြစ်စဉ်အတွင်း သေဆုံးသူများ၏ အလောင်းများအား နွားထိုးကြီးမြို့နယ် ပြည်သူ့ဆေးရုံသို့ မေတ္တာမွန်လူမှုကူညီးရေးအသင်းမှကားဖြင့် ပို့ဆောင်ကူညီပေးရန် ထွက်ခွါလာခဲ့ကြောင်း သိရသည်။

ထိုသို့ ထွက်ခွါလာစဉ် နွားထိုးကြီး-မြင်းခြံသွားကားလမ်း မိုးကန်ကျေးရွာအနီးသို့အရောက်၌ PDF အဖွဲ့က လမ်း၏ယာဘက်(၁၀)ပေခန့်အကွာမှနေ၍ လက်လုပ်အဝေးထိန်းမိုင်းများဖြင့် ထပ်မံတိုက်ခိုက်ခဲ့ကြောင်း နစကမှ ထုတ်ပြန်ထားသည်။

အဆိုပါ တိုက်ခိုက်မှုကြောင့် လုံခြုံရေးတပ်ဖွဲ့ဝင်အချို့ ထိခိုက်ဒဏ်ရာများရရှိခဲ့ကြောင်း သိရသည်။ 

အထက်ပါဖြစ်စဉ်နှင့်ပတ်သက်၍ ကျူးလွန်သူများအား အမြန်ဆုံးရှာဖွေဖော်ထုတ်ဖမ်းဆီးနိုင်ရေးနှင့် ဥပဒေနှင့်အညီ အပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့်လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း နစက၏သတင်းထုတ်ပြန်ချက်များမှ သိရသည်။