NSS - သြဂုတ် ၁၄

စစ်ကိုင်းတိုင်း၊ မုံရွာမြို့၌ ကိုယ်ဝန်ဆောင်သည် အမျိုးသမီးတစ်ဦး ဓါးပြတိုက်သတ်ဖြတ်ခံရပြီးနောက်ပိုင်းတွင် ဓါးပြတိုက်မှုဖြစ်စဉ်များ ဆက်လက်ဖြစ်ပွားနေကြောင်း မြို့ခံများက NSS ကို ပြောသည်။

ပြီးခဲ့သော သြဂုတ်လ ၁၀ ရက်တွင် မုံရွာမြို့၊ ထန်းတောရပ်ကွက်ရှိ နေအိမ်တစ်လုံး၌ လက်နက်ကိုင်လူတစ်စု၏ ဓါးပြတိုက်ခြင်းကို ခံခဲ့ရသည့်အပြင် ကလေးမွေးဖွားရန် (၃)ရက်ခန့်သာ လိုတော့သည့် ကိုယ်ဝန်ဆောင်အမျိုးသမီးတစ်ဦးနှင့် အခြားအမျိုးသမီးတစ်ဦးတို့ သေနတ်ဖြင့် ပစ်ခတ်ခြင်းခံခဲ့ရသည်။

ထိုသို့လက်နက်ကိုင်လူတစ်စု၏ သေနတ်ဖြင့် ပစ်ခတ်မှုကြောင့် ကိုယ်ဝန်ဆောင်အမျိုးသမီးနှင့် မမွေးဖွားရသေးသည့် ကလေးငယ်တို့ သေဆုံးခဲ့ရသည်။

မုံရွာမြို့တွင် အထက်ပါကဲ့သို့ ဓါးပြတိုက်မှုဖြစ်စဉ်များ ဖြစ်ပွားခဲ့ပြီးနောက်ပိုင်းတွင်လည်း နောက်ထပ် ဓါးပြတိုက်မှုများ ဆက်လက်ဖြစ်ပွားနေဆဲဖြစ်ကြောင်း မုံရွာမြို့ခံများက ပြောသည်။

ယမန်နေ့(သြဂုတ်လ ၁၃ ရက်) ညနေပိုင်းတွင်လည်း မုံရွာမြို့၊ နန္ဒဝန်ရပ်ကွက်၊ လမ်းသွယ်(၁၁)ရှိ (၃)ထပ်တိုက်နေအိမ်တစ်လုံးအား အင်အား(၈)ဦးခန့်ရှိသော လက်နက်ကိုင်လူတစ်စုက ဝင်ရောက်ဓါးပြတိုက်မှု ထပ်မံဖြစ်ပွားခဲ့ကြောင်း သိရသည်။

“မနေ့က ညနေ ၆ နာရီလောက်မှာ ဖြစ်တာ။ နန္ဒဝန်ရပ်ကွက်၊ လမ်းသွယ်(၁၁)မှာရှိတဲ့ (၃)ထပ်တိုက်မှာ ဓါးပြတိုက်မှုဖြစ်တာ။ ဘာတွေပါသွားလဲဆိုတော့ အိမ်စီးကား သိန်းတစ်ထောင်ကျော်တန် (၂)စီးနဲ့ ငွေသားသိန်း(၃၀၀၀)ကျော် ပြီးတော့ လက်ကိုင်ဖုန်းတွေ အကုန်လုံးကိုလည်း ယူသွားတယ်လို့ သိရတယ်။ သေနတ်တွေနဲ့ ချိန်ထားတော့ လူတွေကတော့ မှောက်နေရတာပေါ့။ ပြီးတော့ သူတို့ လိုချင်တာတွေကို အကုန်ယူသွားတာပေါ့”ဟု မုံရွာမြို့ခံတစ်ဦးက ပြောသည်။

အဆိုပါဓါးပြတိုက်မှုဖြစ်စဉ် မဖြစ်ပွားခင် မိနစ်ပိုင်းအလို၌ မုံရွာမြို့ပေါ်ရှိ တိုင်းရဲရုံး၊ ရေအရင်းအမြစ်ဦးစီးဌာနရုံးတို့သည် ဒရုန်းဖြင့် ဗုံး(၃)လုံး ပစ်ချတိုက်ခိုက်ခံရသည့်ဖြစ်စဉ် ဖြစ်ပွားခဲ့သေးကြောင်း သိရသည်။

ထို့ပြင် မုံရွာမြို့ပေါ်ရှိ နာမည်ကြီးသံဆိုင်တစ်ခု၏ ပိုင်ရှင်ဖြစ်သူသည်လည်း ယခုရက်ပိုင်းအတွင်း ပြန်ပေးဆွဲခံခဲ့ရသည့်ဖြစ်စဉ် ဖြစ်ပွားခဲ့ကြောင်း အခြားသောမုံရွာမြို့ခံတစ်ဦးက NSS ကို အသိပြောကြားထားသည်။

“ဖြစ်စဉ်တွေကတော့ မုံရွာမြို့ထဲမှာ တော်တော်လေးများတယ်။ လွန်ခဲ့တဲ့ (၇)လပိုင်းလောက်မှာလည်း ပြန်ပေးဆွဲခံရပြီးတော့ ငွေနဲ့ရွေးရတာတွေလည်း ရှိတယ်။ ပြည်တော်သာရပ်ကွက်ထဲမှာ ဖြစ်ခဲ့တာပေါ့” ဟု ၎င်းက ဆက်လက်ပြောသည်။

ပြီးခဲ့သောကာလများအတွင်းကလည်း မုံရွာမြို့ပေါ်၌ ရွှေဆိုင်၊ ဖုန်းအရောင်းအဆိုင်များတွင် ဓါးပြတိုက်လုယက်မှုဖြစ်စဉ်များ ဖြစ်ပွားခဲ့ဖူးပြီး လက်ရှိတွင် ဆက်လက်ဖြစ်ပွားလျက်ရှိနေသည့်အတွက် ပြည်သူ လူထုအသက်အိုးအိမ်စည်းစိမ်လုံခြုံရေးအား နစကအနေဖြင့် တာဝန်ယူလုပ်ဆောင်ပေးသင့်ကြောင်း မြို့ခံအချို့က NSS ကို အသိပေးပြောကြားထားသည်။