ယွန်း (NSS) - သြဂုတ် ၁၃

မြန်မာနိုင်ငံ၌ အလုပ်အကိုင်ရပ်စဲမှုများသည် ပြီးခဲ့သည့် ၂ဝ၂ဝ ပြည့်နှစ်၊ မတ်လမှစတင်ကာ တိုးပွားလာခဲ့ကြောင်း အပြည်ပြည်ဆိုင်ရာအလုပ်သမားရေးရာအဖွဲ့(ILO) က ဆိုသည်။

အပြည်ပြည်ဆိုင်ရာအလုပ်သမားရေးရာအဖွဲ့ (ILO) က ပြီးခဲ့သည့် သြဂုတ်လ(၁၁)ရက်တွင် အထက်ပါကဲ့သို့ အသိပေးထုတ်ပြန်ချက်ထားခြင်းဖြစ်သည်။

မြန်မာနိုင်ငံအတွင်း ဆန္ဒအရဖြစ်စေ၊ ဆန္ဒမပါဘဲဖြစ်စေ အလုပ်အကိုင်ရပ်စဲမှုများသည် ပြီးခဲ့သည့် ၂ဝ၂ဝ ပြည့်နှစ်၊ မတ်လမှ စတင်ကာ တိုးပွား လာခဲ့ကြောင်း ILO မှ ဆိုထားသည်။

အပြည်ပြည်ဆိုင်ရာအလုပ်သမားရေးရာအဖွဲ့က ပြုလုပ်သည့်စစ်တမ်းအရ အချိန်ကာလအားဖြင့် ၂ဝ၂ဝ ပြည့်နှစ် မတ်လ (၁) ရက် နှင့် ၂ဝ၂၂ ခုနှစ် ဖေဖော်ဝါရီလ (၂၈) ရက် အကြား အလုပ်မှယာယီရပ်စဲခံရသူများဖြစ်ကြောင်း သိရသည်။

ထို့ပြင် အဆိုပါကာလအတွင်း အလုပ်အကိုင်ရပ်စဲမှုပေါင်း၏ (၇ဝ)ရာခိုင်နှုန်းသည် ဆန္ဒအလျောက်အလုပ်မှ နှုတ်ထွက်ခြင်းဖြစ်ပြီး (၂၈) ရာခိုင်နှုန်းသည် အလုပ်ထုတ်ခံရခြင်းဖြစ်ကြောင်း သိရသည်။

ILO မြန်မာ၏ဆက်သွယ်ညှိနှိုင်းရေးမှူးဖြစ်သူ Donglin Li က “မြန်မာနိုင်ငံကအလုပ်သမားတွေဟာ တစ်မူ ထူးခြားစွာခက်ခဲတဲ့အခြေအနေတွေကို အစုံလိုက်ရင်ဆိုင်နေကြရတယ်။ ဒီစစ်တမ်းက အလုပ်သမား အခွင့်အရေး တွေကို လေးစားဖို့၊ ပေးနေတဲ့ လူမှုကာကွယ်စောင့်ရှောက်ရေးက တိုးတက်ကောင်းမွန်ဖို့ အပူတ ပြင်းလိုအပ်နေပြီ ဆိုတာကို ဖော်ပြနေတယ်” ဟု ဆိုသည်။ 

အလားတူ ၂ဝ၂၁ ခုနှစ်၊ ဖေဖော်ဝါရီလ (၁)ရက်မှစ၍ အလုပ်အကိုင်ရပ်စဲမှုသည် (၂၃ ဒသမ ၅) ရာခိုင်နှုန်းတိုးခဲ့ပြီး အလုပ်ထုတ်ပယ်မှုများ မှာလည်း (၄၁)ရာခိုင်နှုန်း မြင့်တက်ခဲ့ကြောင်း ILO မှ ဆိုထားသည်။

ထို့ပြင် အလုပ်မှနှုတ်ထွက်မှုမှာ (၂၂)ရာခိုင်နှုန်းရှိခဲ့ပြီး အထူးသဖြင့် စစ်တပ်အာဏာလွှဲပြောင်းရယူပြီးသည့် နောက်ပိုင်းတွင် ပြည်သူ့ကဏ္ဍ၌ အလုပ်အကိုင်ရပ်စဲမှု (၃၉၂) ရာခိုင်နှုန်းတိုးလာခဲ့ရာ ပညာရေးကဏ္ဍ၌ အများဆုံးဖြစ်ကြောင်း ILO မှ ပြောသည်။

အလုပ်အကိုင်ရပ်စဲခံရသည့်အခါ အလုပ်ထုတ်ခံရသည့် အလုပ်သမား၏ (၂၉ ဒသမ ၅) ရာခိုင်နှုန်းသာ ဥပဒေအရ ပြဌာန်းထားသော အလုပ်ထုတ်နစ်နာကြေးကို ရရှိခဲ့ကြောင်း သိရသည်။