Pika (NSS) - ဩဂုတ် ၁၂

မြန်မာနိုင်ငံသားများကို ယာယီခိုလှုံရာနေရာများမှ ခေါ်ထုတ်လာသည့် ထိုင်းအမျိုးသားသုံးဦးကို ဖမ်းဆီးခဲ့ကြောင်း ထိုင်းရဲတပ်ဖွဲ့က ထုတ်ပြန်ပြောကြားခဲ့သည်။

ကလေးငယ်(၅)ဦးအပါအဝင် မြန်မာနိုင်ငံသား(၁၀)ဦးကို အဆိုပါထိုင်းအမျိုးသားသုံးဦး၏ ကားထဲတွင်တွေ့ရှိခဲ့ပြီးနောက် ယခုကဲ့သို့ဖမ်းဆီးခဲ့ခြင်းဖြစ်ကြောင်း ရဲတပ်ဖွဲ့ကပြောကြားခဲ့သည်။ ယာယီဒုက္ခသည်စခန်းများတွင်နေထိုင်သော မြန်မာဒုက္ခသည်အချို့သည်  ထိုင်းနိုင်ငံတွင်းသို့ ခိုးဝင်လာကြောင်း သတင်း ပေးချက်များအရ နယ်မြေခံအာဏာပိုင်များနှင့် ရဲတပ်ဖွဲ့ဝင်အချို့သည် Khun Yuam ခရိုင် Mae Kee ရွာအဝေးပြေးလမ်း ၁၃၃၇ ရှိ စစ်ဆေးရေးဂိတ်တွင် ချင်းမိုင်လိုင်စင်နံပါတ်ပြားတပ်ဆင်ထားသော ပစ်ကပ်ထရပ်ကားနှစ်စီးကို ရပ်တန့်ကာ စစ်ဆေးခဲ့ကြကြောင်းသိရသည်။

ထို့နောက် ရဲတပ်ဖွဲ့များသည် ရှာဖွေမှုများလုပ်ဆောင်ခဲ့ရာ ယာဉ်ပေါ်တွင် တရားမဝင်ရွှေ့ပြောင်းနေထိုင်သူမြန်မာနိုင်ငံသားများကိုတွေ့ရှိခဲ့ခြင်းဖြစ်ကြောင်းသိရသည်။ ပစ်ကပ်ထရပ်ကားနှစ်စီး၏ ယာဉ်မောင်းများအပါအဝင် အမျိုးသားသုံးဦးလုံးသည် ထိုင်းနိုင်ငံသားများဖြစ်ပြီး Anai အမည်ရှိ အသက်(၃၈) နှစ် အရွယ်အမျိုးသား၊ Sangworn အမည်ရှိ အသက်(၂၁)နှစ်အရွယ်အမျိုးသား နှင့် Anurak အမည်ရှိအသက်(၅၄)နှစ်အရွယ် အမျိုးသားတို့ဖြစ်ကြောင်း ရဲတပ်ဖွဲ့ကပြောကြားခဲ့သည်။

အရွယ်ရောက်ပြီးသူ(၆)ဦးနှင့် အသက်(၅)နှစ်မှ (၁၄)နှစ်ကြား ကလေးငယ်လေးဦးတို့သည် စာရွက်စာ တမ်းအထောက်အထားများမရှိသော်လည်း ထိုင်းဘာသာစကားကိုပြောနိုင်ကြကြောင်း ရဲတပ်ဖွဲ့ကပြောဆိုခဲ့သည်။ ၎င်းတို့သည် မြန်မာနိုင်ငံ ကယားပြည်နယ်တွင် တိုက်ပွဲများဖြစ်ပွားနေခြင်းကြောင့် ထိုင်းနိုင်ငံသို့ထွက်ပြေးလာကြသူများဖြစ်ပြီး နယ်စပ်အနီး Mae Ko ကျေးရွာရှိ ယာယီဒုက္ခသည်စခန်းများတွင် နေထိုင်ကြသူများဖြစ်ကြောင်းသိရသည်။

အဆိုပါမြန်မာနိုင်ငံသား(၁၀)ဦးသည် Mae La Noi ခရိုင်ရှိ ၎င်းတို့၏ ဆွေမျိုးများကို တွေ့ဆုံရန်အတွက်သွားရောက်ကြသူများဖြစ်ကြောင်း ရဲတပ်ဖွဲ့ကိုပြောကြားခဲ့သည်။ မြန်မာနိုင်ငံသားများကို ယာယီဒုက္ခ သည် စခန်းများမှခေါ်ယူကာ  Ban Mae Kee ရွာအနီးတွင်ချထားရန်စီစဉ်ခဲ့ခြင်းဖြစ်ကြောင်း Anai ကပြောကြားခဲ့သည်။ ယာယီဒုက္ခသည်စခန်းများမှ နိုင်ငံတွင်းသို့ခိုးဝင်လာသော မြန်မာဒုက္ခသည်များကို နှစ်ကြိမ်ကူညီခဲ့ကြောင်း နှင့် ကယ်ဆယ်ရေးစခန်းများသို့ ပစ္စည်းများပို့ဆောင်ပေးခြင်းကြောင့် မြန်မာဒုက္ခသည်များတွင် ၎င်းကိုဆက်သွယ်ရန် ဖုန်းနံပါတ်ရှိခြင်းဖြစ်ကြောင်း Anai ကပြောကြားခဲ့သည်။

တရားမဝင်ရွှေ့ပြောင်းနေထိုင်သူ မြန်မာနိုင်ငံသားများကို သယ်ယူပို့ဆောင်ပေးမှုဖြင့် Anai နှင့်၎င်း၏ လက်ထောက်နှစ်ဦးကို တရားစွဲဆိုထားကြောင်း ရဲတပ်ဖွဲ့ကပြောကြားခဲ့သည်။