Pika (NSS) - သြဂုတ် ၉

တောင်အာဖရိကနိုင်ငံ  ဂျိုဟန်နက်စ်ဘာ့ချ်မြို့တွင် ဩဂုတ်(၂၂)ရက်မှ (၂၄)ရက်အထိ ကျင်းပမည့် (၁၅)ကြိမ် မြောက် BRICS ထိပ်သီးအစည်းအဝေးကို နိုင်ငံပေါင်း(၃၄)နိုင်ငံက ပါဝင်တက်ရောက်ရန် အတည်ပြုခဲ့ကြောင်း တောင်အာဖရိက၏ နိုင်ငံတကာ ဆက်ဆံရေးဝန်ကြီး Naledi Pandor က ပြောကြားခဲ့သည်။

ထို့အပြင် BRICS အဖွဲ့ကို ထပ်မံတိုးချဲ့ရန် နှင့် အမေရိကန်ဒေါ်လာလွှမ်းမိုးမှုများကို စိန်ခေါ်နိုင်ရန်အတွက် BRICS အဖွဲ့ငွေကြေးကို လုပ်ဆောင်ရန် အာရုံစိုက်သွားမည်ဖြစ်ကြောင်း ၎င်းက ထပ်မံပြောခဲ့သည်။ 

ကမ္ဘာ့တောင်ဖက်ခြမ်းရှိ အကျိုးစီးပွားရေးလုပ်ငန်းများအတွက် BRICS အဖွဲ့၏ အရေးပါမှုများကြောင့် အဖွဲ့ဝင် နိုင်ငံအဖြစ် လျှောက်ထားလိုသည့်နိုင်ငံများ ပိုမိုများပြားလာခဲ့ခြင်းဖြစ်ကြောင်း ၎င်းက မှတ်ချက်ပြုပြောခဲ့သည်။

ထို့အပြင် BRICS အဖွဲ့၏ စီးပွားရေးအင်အားသည် ကမ္ဘာ့စီပွားရေး ပြန်လည်ကောင်းမွန်လာစေရန်အတွက် အထောက်အကူဖြစ်သင့်ကြောင်း ၎င်းက အလေးပေးပြောခဲ့သည်။ ထို့အပြင် အယ်လ်ဂျီးရီးယား၊ အာဂျင်တီးနား၊ ဘင်္ဂလားဒေ့ရှ်၊ ကျူးဘား၊ အီဂျစ်၊ အီသီယိုးပီးယား၊ အင်ဒိုနီးရှား၊ မော်ရိုကို၊ နိုင်ဂျီးရီးယား၊ ပါလက်စတိုင်း၊ ဆော်ဒီအာရေးဗီးယား၊ ဆီနီဂေါနှင့် ယူအေအီးတို့ အပါအဝင် နိုင်ငံပေါင်း(၂ဝ)ကျော်ထံမှ အဖွဲ့ဝင်ဖြစ်ခွင့်ရရှိရေး လျှောက်လွှာမျာားကို လက်ခံရရှိထားကြောင်း ၎င်းက အတည်ပြုပြောဆိုခဲ့သည်။ အမေရိကန်က ကာလရှည်ကြာ ပိတ်ဆို့အရေးယူထားသော အီရန်နိုင်ငံသည်  BRICS အဖွဲ့ဝင်နိုင်ငံဖြစ်ခွင့်ရရန်အတွက် တရားဝင် လျှောက်ထားခဲ့ ကြောင်း သိရသည်။

တောင်အာဖရိကသမ္မတ ဆိုင်ရေးရာမာဖိုဆာ သည် BRICS အဖွဲ့ဝင်နိုင်ငံ ခေါင်းဆောင်များထံမှ သဘောတူညီမှုဖြင့် အီရန်သမ္မတ Ebrahim Raisi ကို ဩဂုတ်လတွင် ကျင်းပမည့် ထိပ်သီးအစည်းအဝေးကို တက်ရောက်ရန် ဖိတ်ကြား ခဲ့ကြောင်း သိရသည်။ Naledi Pandor က "ဒါဟာ အနောက်အုပ်စုကို ဆန့်ကျင်တဲ့ အဖွဲ့အစည်းတစ်ခု တည်ထောင်ဖို့ ရည်ရွယ်ထားတာ မဟုတ်ပါဘူး။ အနောက်အုပ်စုကုန်သွယ်ဖက်နိုင်ငံတွေဟာ တောင်အာဖရိကရဲ့ စီးပွားရေးတိုးတက်မှုအတွက် အရမ်းအရေးကြီးပါတယ်" ဟု ပြောခဲ့သည်။