မျိုးကြီး (NSS) - သြဂုတ် ၉

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ဦးဆောင်သော နစက၏ ရှေ့လုပ် ငန်းစဉ်များနှင့် ဦးတည်ချက်များကို အသစ်ထပ်မံချမှတ်လိုက်ကြောင်း သတင်းရရှိသည်။

နိုင်ငံတော်စီမံအုပ်ချုပ်ရေးကောင်စီက ယနေ့(သြဂုတ်လ ၉ ရက်)တွင် ရှေ့လုပ်ငန်းစဉ်များနှင့် ဦးတည် ချက်များကို အသစ်ပြန်လည်ချမှတ်ခဲ့ခြင်း ဖြစ်သည်။

အသစ်ချမှတ်လိုက်သည့် နစက၏ ရှေ့လုပ်ငန်းစဉ် (၅)ရပ်တွင် ပထမအချက်အနေဖြင့် လွတ်လပ်ပြီးတရားမျှတသော ပါတီစုံဒီမိုကရေစီအထွေထွေရွေးကောက်ပွဲ အောင်မြင်စွာကျင်းပနိုင်ရေး ပြည်ထောင်စုတစ်ဝန်းလုံး တည်ငြိမ်အေးချမ်း၍ တရားဥပဒေစိုးမိုးရေး အပြည့်အဝရရှိလာရန် အလေးထားဆောင်ရွက်သွားမည်ဟု ချမှတ်ထားသည်။

ယခင်ရှေ့လုပ်ငန်းစဉ်၌ ပထမအချက်အနေဖြင့် ပြည်သူတို့၏ လူမှုစီးပွားဘဝလုံခြုံရေးအတွက် ပြည် ထောင်စုတစ်ဝန်းလုံး တည်ငြိမ်အေးချမ်းရေးနှင့် တရားဥပဒေစိုးမိုးရေး အပြည့်အဝရရှိစေရန် အလေးထားလုပ်ဆောင်မည်ဟု ချမှတ်ထားခဲ့သည်။

ထို့ပြင် အသစ်ထပ်မံချမှတ်လိုက်သည့် ရှေ့လုပ်ငန်းစဉ်တွင် စိုက်ပျိုးမွေးမြူရေးကို အခြေခံသည့် ကုန်ထုတ်လုပ်ငန်းများအားမြှင့်တင်၍ နိုင်ငံ့စီးပွားမြင့်မားရေးနှင့် ပြည်သူလူထုတစ်ရပ်လုံး၏ လူမှုစီးပွားဘဝမြင့်မားရေး ဆက်လက်ကြိုးပမ်းဆောင်ရွက်သွားမည်ဟု ဖော်ပြထားသည်။

နိုင်ငံတော်၏ ပကတိအနှစ်သာရဖြစ်သော ပြည်တွင်းငြိမ်းချမ်းရေးနှင့် ရရှိထားသည့်ပြည်တွင်းငြိမ်းချမ်းရေးရလဒ်များ တည်ငြိမ်မှုရှိစေရေးအတွက် (NCA)ပါ သဘောတူညီချက်များအတိုင်း ဖြစ်နိုင်သမျှအလေး ထားလုပ်ဆောင်သွားမည်ဟုလည်း ရှေ့လုပ်ငန်းစဉ်အဖြစ် ချမှတ်ထားသည်။

ဆက်လက်ပြီး ရှေ့လုပ်ငန်းစဉ်၌ ဒီမိုကရေစီစနစ်ခိုင်မာစေရေးနှင့် ဒီမိုကရေစီနှင့်ဖက်ဒရယ်စနစ်ကိုအခြေ ခံသည့် ပြည်ထောင်စုတည်ဆောက်ရေးလုပ်ငန်းစဉ်များကို အရှိန်အဟုန်ဖြင့် ဆက်လက်ဆောင်ရွက်သွားမည်ဟု ဖော်ပြထားသည်။

နစက၏ ရှေ့လုပ်ငန်းစဉ်(၅)တွင် နောက်ဆုံးအချက်အနေဖြင့် ဆန္ဒမဲပေးပိုင်ခွင့်ရှိသူအားလုံး၏ အခွင့် အရေးများ နစ်နာမှုမရှိစေရေးနှင့် နည်းလမ်းကျနမှန်ကန်မှုရှိသည့် အထွေထွေရွေးကောက်ပွဲတစ်ရပ်ဖြစ်စေရေး ဆောင်ရွက်ခြင်း၊ အရေးပေါ်ကာလဆိုင်ရာ ပြဋ္ဌာန်းချက်များနှင့်အညီ ဆောင်ရွက်ခြင်းတို့ပြီးစီးပါက လွတ်လပ်ပြီး တရားမျှတသော ပါတီစုံဒီမိုကရေစီအထွေထွေရွေးကောက်ပွဲကျင်းပ၍ ထွက်ပေါ်လာသည့်အစိုးရအား နိုင်ငံတော်တာဝန်လွှဲအပ်နိုင်ရေး ဆက်လက်ဆောင်ရွက်သွားမည်ဟု ချမှတ်ထားသည်။

ယခု အသစ်ချမှတ်လိုက်သည့် နစက၏ ရှေ့လုပ်ငန်းစဉ်(၅)ရပ်သည် ယခင်က ချမှတ်ခဲ့သော ရှေ့လုပ်ငန်း စဉ်(၅)ရပ်ထက် စကားလုံးများနှင့် အဓိပ္ပါယ်အချို့ပါဝင်လာသော်လည်း ကြီးကြီးမားမား ပြင်ဆင်ချမှတ်ထားခြင်းမျိုး မရှိကြောင်း တွေ့ရှိရသည်။

နစကအနေဖြင့် ရှေ့လုပ်ငန်းစဉ် (၅)ရပ်ကို အသစ်ချမှတ်ခဲ့သည့်အပြင် နစက ဦးတည်ချက်များကိုလည်း အသစ်ထပ်မံချမှတ်ခဲ့သည်။

နစက ဦးတည်ချက်များသည် ယခင်က (၁၂)ချက်ရှိရာမှ လက်ရှိတွင် ဦးတည်ချက်(၉)ရပ်အဖြစ် ပြန်လည်ပြင်ဆင်ကာ ချမှတ်ထားသည်ကို တွေ့ရှိရသည်။

ဗိုလ်ချုပ်မှူးကြီးမင်းအောင်လှိုင်သည် ယမန်နေ့က နေပြည်တော်၌ ပြည်ထောင်စုအဆင့်ပုဂ္ဂိုလ်၊ ဝန်ကြီးများနှင့်တွေ့ဆုံကာ အသစ်ထပ်မံချမှတ်ထားသည့် ရှေ့လုပ်ငန်းစဉ်များနှင့် ဦးတည်ချက်များကို အကောင် အထည်ဖော်ဆောင်ရွက်ရန် အစိုးရ၏ တာဝန်ဖြစ်ကြောင်း အသိပေးပြောကြားခဲ့သည်။

ပြီးခဲ့သော ဇူလိုင်လ ၃၁ ရက်တွင် နစကအစိုးရအား သက်တမ်း (၆)လ ထပ်မံတိုးမြှင့်အပြီး ရက်ပိုင်းအတွင်း၌ နစကအဖွဲ့၊ အစိုးရအဖွဲ့များကို ပြန်လည် ပြင်ဆင်ဖွဲ့စည်းမှုများ ပြုလုပ်ခဲ့သည်။