NSS - သြဂုတ် ၉

မြန်မာ-ထိုင်း မည်သည့်နယ်စပ်ဂိတ်မှမဆို ပို့ကုန်တင်ပို့မှုနှင့် သွင်းကုန်တင်သွင်းမှုများကို ပြောင်းလဲခွင့်ပြုပေးသွားမည်ဟု ကုန်သွယ်ရေးဦးစီးဌာန၊ မြဝတီကုန်သွယ်ရေးဇုန်က ကြေညာလိုက်သည်။

မြဝတီကုန်သွယ်ရေးဇုန်က ယမန်နေ့(သြဂုတ်လ ၈ ရက်)တွင် အထက်ပါကဲ့သို့ အသိပေးကြေညာလိုက်ခြင်းဖြစ်သည်။

ပြီးခဲ့သော သြဂုတ်လ ၇ ရက်တွင် မြန်မာ-ထိုင်းကုန်သွယ်မှုလမ်းကြောင်းဖြစ်သည့် မြဝတီလမ်းပိုင်း အာရှလမ်း၌ မိုးသည်းထန်စွာရွာသွန်းခြင်းကြောင့် လမ်းပိုင်းအချို့ ပျက်စီးမှုများရှိခဲ့ပြီး ပြင်ဆင်ရန် ဆောင်ရွက်နေကြောင်း သိရသည်။

ထို့ကြောင့် ကုန်သွယ်မှုလုပ်ငန်းများ နှောင့်နှေးကြန့်ကြာမှု မရှိစေရေးအတွက် ပို့ကုန်လုပ်ငန်းရှင်များအနေဖြင့် တင်ပို့ရန် ပို့ကုန်လိုင်စင်ခွင့်ပြုချက်ရရှိပြီးသော ပစ္စည်းများအတွက် မြန်မာ-ထိုင်း မည်သည့်နယ်စပ်ဂိတ်ပေါက်မှဖြစ်စေ တင်ပို့လိုပါက စခန်းပေါက်ပြောင်းကာ ခွင့်ပြုပေးသွားမည်ဟု မြဝတီကုန် သွယ်ရေးဇုန်က ကြေညာထားသည်။

ထို့ပြင် ပို့ကုန်ပစ္စည်းများကို ပင်လယ်ရေကြောင်းမှ တင်ပို့လိုပါကလည်း ပြောင်းလဲခွင့်ပြုပေးသွားမည်ဖြစ်ကြောင်း မြဝတီကုန်သွယ်ရေးဇုန်က အသိပေးထားသည်။

အလားတူ သွင်းကုန်လုပ်ငန်းရှင်များအနေဖြင့်လည်း တင်သွင်းရန် သွင်းကုန်လိုင်စင် ခွင့်ပြုချက်ရရှိပြီးသော ပစ္စည်းများအား မြန်မာ-ထိုင်းမည်သည့်နယ်စပ်ပေါက်မှမဆို တင်သွင်းလိုပါက စခန်းပေါက် ပြောင်းခွင့်ပြုပေးသွားမည်ဟု ကုန်သွယ်ရေးဇုန်က အသိပေးထားသည်။

၎င်းအပြင် သွင်းကုန်များကို ပင်လယ်ရေကြောင်းမှ တင်သွင်းလိုပါကလည်း ပြောင်းလဲခွင့်ပြုပေးသွားမည်ဖြစ်ကြောင်း မြဝတီကုန်သွယ်ရေးဇုန်က အသိပေးကြေညာထားသည်။

မြဝတီ အာရှလမ်းမတွင် မြေပြိုကျကာ ကားလမ်းပိုင်းများ ပျက်စီးခဲ့မှုကြောင့် ကုန်စည်သယ်ယူပို့ဆောင်ရေးကားများမှာ အသွားအလာ ရပ်တန့်လျက်ရှိပြီး ၎င်းကဲ့သို့ ရပ်တန့်နေမှုကြောင့် ကုန်စည်များ ပြတ်လပ်ကာ ကုန်ဈေးနှုန်းများ ပိုမိုမြင့်တက်လာမည်ကို စိုးရိမ်လျက်ရှိကြသည်။

လက်ရှိတွင် မြေပြိုကျမှုကြောင့် ပျက်စီးခဲ့သော အာရှလမ်းပိုင်းအား ဆောက်လုပ်ရေးဝန်ကြီးဌာနအပါ အဝင် သက်ဆိုင်ရာ တာဝန်ရှိသူများက အမြန်ဆုံးပြုပြင်နိုင်ရေး လုပ်ဆောင်နေကြောင်း သိရှိရသည်။