လျှပ်စစ်မီးပြတ်တောက်မှုကြောင့် အအေးခန်းစက်ရုံများ မလည်ပတ်နိုင်ဘဲ ပြည်ပသို့ ပုဇွန်တင်ပို့မှုကျဆင်း
NSS - ဩဂုတ် ၈
ယခု ဘဏ္ဍာနှစ်အတွင်း ရေထွက်ကုန်အအေးခန်းအများစုသည် လျှပ်စစ်မီးပြတ်တောက်မှုကြောင့် အချိန်ပြည့်မလည်ပတ်နိုင်ဘဲ ပြည်ပသို့ ပုဇွန်တင်ပို့မှု ကျဆင်းလာကြောင်း ရေထွက်ကုန်တင်ပို့သူများထံမှ သိရသည်။
လက်ရှိဘဏ္ဍာနှစ် လေးလတာအတွင်း မြန်မာ့ပုစွန် ပြည်ပတင်ပို့မှု လျော့ကျခဲ့ရာ ဧပြီလမှ ဇူလိုင်လကုန်အထိ လေးလတာကာလအတွင်း ပြည်ပသို့မြန်မာ့ပုစွန်တင်ပို့နိုင်မှုသည် ပြီးခဲ့သည့်နှစ်ကာလတူနှင့် နှိုင်း ယှဉ်ပါက ၃၀ ရာခိုင်နှုန်းကျော် လျော့ကျနေကြောင်း ငါးလုပ်ငန်းဦးစီးဌာနမှ သိရသည်။
“လျှပ်စစ်မီးက နှစ်နာရီကနေလေးနာရီပဲလာတယ်။ ကုန်စည်တွေပိုဝယ်ထားရင်ပုပ်ကုန်မှာပျက်စီးမှာကြောက်နေရတယ်။ မီးစက်နဲ့အချိန်ပြည်လည်ပတ်ဖို့ကလည်းမလွယ်ကူဘူးလေ”ဟု ရေထွက်ကုန် အအေးခန်းပိုင်ရှင်တစ်ဦးက ပြောသည်။
ယခုဘဏ္ဍာနှစ် လေးလအတွင်း ပြည်ပနိုင်ငံများသို့ မြန်မာ့ရေထွက်ကုန် ပုစွန်တင်ပို့မှုအနေဖြင့် မက်ထရစ်တန်ချိန် ၃၂၀၀ ကျော်သာတင်ပို့နိုင်ခဲ့ပြီး ပို့ကုန်ဝင်ငွေအဖြစ် အမေရိကန်ဒေါ်လာ ၁၂ သန်းကျော်ရရှိထားကြောင်း သိရသည်။
ပြီးခဲ့သည့် ဘဏ္ဍာနှစ် ကာလတူလေးလအတွင်း ပြည်ပသို့ ပုစွန်တင်ပို့မှုအနေဖြင့် မက်ထရစ်တန်ချိန် ၄၈၈၆ တန်ကျော်တင်ပို့နိုင်ခဲ့ပြီး အမေရိကန်ဒေါ်လာ ၁၈ သန်းကျော်ရရှိခဲ့ကာ ကာလတူနှင့်နှိုင်းယှဉ်ပါက မက်ထရစ်တန်ချိန် ၁၆၈၆ တန်ကျော် လျော့နည်းခဲ့ခြင်းဖြစ်သည်။
မြန်မာနိုင်ငံအနေဖြင့် တရုတ်၊ ဂျပန်၊ ထိုင်း၊ ဘင်္ဂလားဒေ့ရှ်နိုင်ငံ အပါအဝင် နိုင်ငံပေါင်း (၄၀)ကျော်ကို မြန် မာ့ရေထွက်ကုန်ပုစွန်များ တင်ပို့နေခြင်းဖြစ်ကြောင်း သိရသည်။
ပင်လယ်ရေကြောင်း နှင့် နယ်စပ်ကုန်သွယ်ရေးတို့မှ ရေထွက်ကုန်တင်ပို့မှုကျဆင်းနေခြင်းဖြစ်ပြီး လတ်တလော၌ ဘင်္ဂလားဒေ့ရှ်နိုင်ငံဘက်ကလည်း အဝယ်ရပ်ဆိုင်းနေကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
စစ်တွေမြို့နယ်ရှိ ရူပမြောက်ချောင်းတွင် ပီနံအိတ်ဖြင့်ထည့်ကာပစ်ထားသည့် ပုပ်ပွနေသော အလောင်းတွေ့ရှိ
RELATED POSTS
20 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,ပြည်တွင်း
14 Sep 2024 | စီးပွားရေး,နိုင်ငံတကာ
12 Sep 2024 | စီးပွားရေး,ပြည်တွင်း