ဆော်ဒီအာရေးဗီးယားသံရုံးက လက်ဘနွန်ရောက် ၎င်း၏နိုင်ငံသားများ အမြန်ဆုံးထွက်ခွာကြရန် တိုက်တွန်း
Htay Oung (NSS) - ဩဂုတ် ၅
လက်ဘနွန်နိုင်ငံရောက် နိုင်ငံသားများ အမြန်ဆုံး ထွက်ခွာကြဖို့နဲ့ လက်နက်ကိုင်တိုက်ပွဲဖြစ်ပွားနေတဲ့ နေရာများအနီး ချဉ်းကပ်ခြင်းမပြုကြဖို့ တိုက်တွန်းကြောင်း လက်ဘနွန်နိုင်ငံဆိုင်ရာ ဆော်ဒီအာရေးဗီးယားသံရုံးက သူ့ရဲ့တွစ်တာစာမျက်နှာမှာ ရေးသားတယ်လို့ Reuters က ယနေ့(ဩဂုတ်လ ၅ ရက်)မှာဖော်ပြပါတယ်။
ဒါပေမယ့် လက်ဘနွန်နိုင်ငံအတွင်း ဘယ်ဒေသတေတွကို ရှောင်ရှားရမယ်ဆိုတာကိုတော့ တိုက်တွန်းချက်မှာ ပါ၀င်ခြင်း မရှိပါဘူး။
လက်ဘနွန်နိုင်ငံကို ခရီးသွားလာခွင့် တားမြစ်ချက်ထားချက်အပေါ် လိုက်နာရန်လည်း အရေးကြီးတယ်လို့ ဆော်ဒီသံရုံးက အလေးပေးပြောကြားထားပါတယ်။
ကူဝိတ်နိုင်ငံကလည်း အလားတူ တိုက်တွန်းချက်ထုတ်ပြန်ခဲ့ဖူးပါတယ်။ လက်ဘနွန်ရောက် ကူဝိတ်နိုင်ငံ သားတို့အနေနဲ့ သတိရှိရှိ နေထိုင်ရန်၊ လုံခြုံရေးအရ မငြိမ်မသက်ဖြစ်ပေါ်နေတဲ့ ဒေသများအနီး ချဉ်းကပ်သွားလာခြင်းမှ ရှောင်ရှားရန် စနေ(ယနေ့) နံနက်ပိုင်း သတိပေးချက်ထုတ်ပြန်ခဲ့ပြီးနောက် နိုင်ငံမှထွက်ခွာရန် ယခင်တိုက်တွန်းချက်ကို ပယ်ဖျက်လိုက်ကြောင်း ကူဝိတ်နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။
သြဂုတ်လ ၁ ရက်ကတည်းက ဗြိတိန်နိုင်ငံကလည်း သူ့နိုင်ငံသားများအနေနဲ့ “အိန်အယ်လ်ဟေးဝါ" ပါလက်စတိုင်း (ဒုက္ခသည်) စခန်းတည်ရှိရာ လက်ဘနွန်တောင်ဘက်ဒေသများကို မလွှဲမရှောင်သာ ကိစ္စရပ်များမှအပ ခရီးသွားလာခြင်း မပြုကြဖို့ တိုက်တွန်းခဲ့ပြီးဖြစ်ပါတယ်။
အဲဒီ ဒုက္ခသည်စခန်းအတွင်းမှာ ပါလက်စတိုင်း “ဖာတာ"ပင်မအုပ်စုနဲ့ သဘောထားတင်းမာသူ အစ္စလာမ်မစ်ဝါဒီတို့အကြား ဇူလိုင်လ ၂၉ ရက်မှာ တိုက်ပွဲများ စတင်ဖြစ်ပွားခဲ့ကြောင်း၊ လူ ၁၃-ဦးထက်မနည်း သေဆုံးခဲ့ရပြီး အများစုမှာ စစ်သွေးကြွများဖြစ်ကြောင်း စခန်းရှိ လုံခြုံရေးသတင်းရင်းမြစ်များထံမှ သိရှိရပါတယ်။
အစ္စရေးနိုင်ငံကို တည်ထောင်ပြီးနောက် ပါလက်စတိုင်း ဒုက္ခသည်များအတွက် ၁၉၄၈ ခုနှစ် အိမ်နီးချင်း လက်ဘနွန်နိုင်ငံမှာ တည်ထောင်ခဲ့တဲ့ (ဒုက္ခသည်) စခန်း ၁၂ ခု အနက် အိန်အယ်လ်ဟေးဝါဟာ အကြီးဆုံးဖြစ်ပါတယ်။ လက်ဘနွန်ရောက် ပါလက်စတိုင်း ဒုက္ခသည် ၂၅၀,၀၀၀ အနက် ၈၀,၀၀၀ ခန့်ဟာ အဲဒီစခန်းမှာ ခိုလှုံနေကြတယ်လို့ ပါလက်စတိုင်းရှိ ကုလသမဂ္ဂ ဒုက္ခသည်များဆိုင်ရာ အေဂျင်စီက ပြောပါတယ်။
မာမွတ်ခါလီအမည်ရှိ လက်နက်ကိုင်အုပ်စုတစ်စုမှ အဖွဲ့ဝင်တစ်ဦးကို အမည်မသိ သေနတ်သမားတစ်ဦးက သတ်ဖြတ်ရန် ကြိုးပမ်းခဲ့ကြောင်း သူ့အစား သူ့အပေါင်းအသင်းတွေကို သေနတ်နဲ့ ပစ်သတ်သွားရာမှ ဇူလိုင်လ ၂၉ ရက်မှာ အကြမ်းဖက်မှုစတင်ခဲ့ခြင်းဖြစ်ကြောင်း၊ နောက်နေ့မှာ ဖာတာအဖွဲ့မှ စစ်ဗိုလ်ချုပ်တစ်ဦးနဲ့ အစောင့်အကြပ်သုံးဦးတို့က ကားပါကင်ကို ဖြတ်လျှောက်လာစဉ် လက်တုံ့ပြန်တိုက်ခိုက်ရေးသမားများက ပစ်သတ်လိုက်တဲ့အတွက် တိုက်ပွဲများပြင်းထန်စွာဖြစ်ပွားခဲ့ကြောင်း အမည်မဖော်လိုသူ ပါလက်စတိုင်းအရာရှိ တစ်ဦးက ပြောပြပါတယ်။
လက်ဘနွန်တာဝန်ရှိသူများ၊ လုံခြုံရေးတပ်ဖွဲ့များနဲ့ ပါလက်စတိုင်းအဖွဲ့များအကြား တွေ့ဆုံဆွေးနွေးပြီးနောက် အပစ်အခတ်ရပ်စဲရေးအသစ်ကို ကြေညာခဲ့ပေမယ့် တိုက်ပွဲများ ဆက်လက်ဖြစ်ပွားနေခဲ့ပါတယ်။
( Reuters., 5 August 2023,” Saudi Arabia urges its citizens to quickly leave Lebanon” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
နယူးယောက်ရှိ ပန်းခြံတစ်ခုမှာ နာမည်ကြီး live streamer တစ်ယောက်ရဲ့ giveaway ပေးတဲ့ အစီအစဉ်ကြောင့် ရုန်းရင်ဆန်ခတ်ဖြစ်ခဲ့ရ
RELATED POSTS
04 Oct 2024 | နိုင်ငံရေး,ပြည်တွင်း
02 Oct 2024 | နိုင်ငံရေး,နိုင်ငံတကာ