ထွက်ပေါ်လာနိုင်သော ရွေးကောက်ပွဲအခင်းအကျင်း (၂)ခုကို နစက အသိပေး
မျိုးကြီး (NSS) - သြဂုတ် ၃
ရွေးကောက်ပွဲကျင်းပမှုနှင့်ပတ်သက်၍ ထွက်ပေါ်လာနိုင်သော အခင်းအကျင်း(၂)ခုကို နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က အသိပေးပြောကြားခဲ့သည်။
ဗိုလ်ချုပ်မှူးကြီးမင်းအောင်လှိုင်က ယခုရက်ပိုင်းအတွင်း နေပြည်တော်၌ ကျင်းပခဲ့သော အမျိုးသားကာကွယ်ရေးနှင့်လုံခြုံရေးကောင်စီအစည်းအဝေးတွင် အသိပေးပြောကြားခဲ့ခြင်းဖြစ်သည်။
ပထမရွေးကောက်ပွဲအခင်းအကျင်းသည် လတ်တလော၌ လက်နက်ကိုင်တိုက်ခိုက်မှု၊ မတည်ငြိမ်မှုများဖြစ်ပေါ်လျက်ရှိသည့် ဒေသများကို ချန်လှပ်ကာ ရွေးကောက်ပွဲကျင်းပခြင်းဖြစ်ကြောင်း တပ်ချုပ်က ပြောသည်။
၎င်းအခင်းအကျင်းဖြင့် ရွေးကောက်ပွဲကျင်းပပါက ၂၀၂၀ ပြည့်နှစ်ရွေးကောက်ပွဲ၌ ကျင်းပခဲ့သော (၃၁၅)မြို့နယ်ထက် ပိုမို၍ကျင်းပနိုင်မည့်မြို့နယ်အရေအတွက်သည် နည်းပါးသွားနိုင်ကြောင်း ၎င်းက ထပ်မံရှင်းပြခဲ့သည်။
ထို့ပြင် ရွေးကောက်ပွဲ မပြုလုပ်နိုင်ခဲ့သည့် တိုင်းရင်းသားဒေသများ၏ မကျေနပ်မှုများကိုလည်း ရင်ဆိုင်ကြုံတွေ့နိုင်သည့်အပြင် ပြည်သူလူထု၏ မူလအခွင့်အရေးဖြစ်သော မဲပေးပိုင်ခွင့်နှင့် ဒီမိုကရေစီနည်းလမ်းကျ ဆန္ဒဖော်ထုတ်နိုင်မှု အခွင့်အရေးများလည်း ဆုံးရှုံးသွားမည်ဖြစ်ကြောင်း ရှင်းပြခဲ့သည်။
ရွေးကောက်ပွဲကျင်းပမှုမှ ချန်လှပ်ခဲ့သည့်အတွက် သက်ဆိုင်ရာတိုင်းနှင့် ပြည်နယ်များတွင် လွှတ်တော်ခေါ်ယူခြင်း၊ အစိုးရအဖွဲ့ ဖွဲ့စည်းခြင်းကိစ္စရပ်များတွင် အားနည်းချက်များဖြစ်ပေါ်လာနိုင်ကြောင်းလည်း ဗိုလ်ချုပ်မှူးကြီးမင်းအောင်လှိုင်က ပြောသည်။
ဆက်လက်ပြီး ရွေးကောက်ပွဲကျင်းပမှုနှင့်ပတ်သက်၍ ဒုတိယအခင်းအကျင်းသည် ရွေး ကောက်ပွဲကို တစ်နိုင်ငံလုံးအတိုင်းအတာဖြင့် မဖြစ်မနေပြုလုပ်ခြင်းဖြစ်ကြောင်း သိရသည်။
အဆိုပါအခင်းအကျင်းဖြင့် ရွေးကောက်ပွဲကျင်းပပါက အဓိကအားဖြင့် လက်နက်ကိုင်ဆန့် ကျင်မှု၊ အကြမ်းဖက်တိုက်ခိုက်မှုများ ဖြစ်ပေါ်နေသည့်ဒေသများ၌ လက်နက်အားကိုးခြိမ်း ခြောက်ကာ မဲပေးမှုကို တားမြစ်ပိတ်ပင်ခြင်း၊ အကြမ်းဖက်ဗုံးဖောက်ခွဲခြင်းများ ဖြစ်ပေါ်လာနိုင်သည်ဟု အကျိုးဆက်များကို တပ်ချုပ်က ဆက်လက်ရှင်းပြသည်။
ထို့ပြင် အကြမ်းဖက်သမားများ လိုလားသည့်သူများကို ခြိမ်းခြောက်မဲထည့်စေခြင်းများ ဖြစ်ပေါ်လာနိုင်သည့်အပြင် အကြမ်းဖက်အားပေး လွှတ်တော်ကိုယ်စားလှယ်များ လွှတ်တော်အသီးသီးသို့ရောက်ရှိလာခြင်းများဖြစ်ပေါ်လာနိုင်သည့်အတွက် နိုင်ငံ၏ဒီမိုကရေစီလမ်း ကြောင်းလျှောက်လှမ်းနေမှုကို ပိုမိုဆိုးရွားလာစေနိုင်သည်ဟုလည်း ၎င်းကပြောသည်။
ထို့ကြောင့် ယင်းကဲ့သို့သော အခြေအနေများ မဖြစ်ပေါ်လာရေးအတွက် လတ်တလောအကြမ်းဖက်တိုက်ခိုက်မှုများ ဖြစ်ပေါ်နေသည့် တိုင်းနှင့်ပြည်နယ်အလိုက် နေရာဒေသများကို တည်ငြိမ်အေးချမ်းရေး၊ တရားဥပဒေစိုးမိုးရေးစသည့် လုပ်ငန်းစဉ်များကို အရှိန်အဟုန်ဖြင့် ဆက်လက်ဆောင်ရွက်ရန် အရေးတကြီးလိုအပ်နေသည်ဟု တပ်ချုပ်က ပြောသည်။
လက်ရှိတွင် ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရအနေဖြင့် ရွေး ကောက်ပွဲကျင်းပပေးနိုင်မည့်အချိန်ကို အတိအကျ ထုတ်ဖော်ပြောဆိုထားခြင်းမရှိသေးသော်လည်း ရွေးကောက်ပွဲကို မဖြစ်မနေကျင်းပရန် ဦးတည်လုပ်ဆောင်နေကြောင်း နစကမှ အသိပေးထားသည်။
တိုင်းရင်းသားလက်နက်ကိုင်အဖွဲ့အချို့နှင့် NUG၊ CRPH၊ PDF တို့သည် စစ်ကိုင်းတိုင်းအတွင်းရှိ မြို့နယ်များ၊ မကွေးတိုင်းမြောက်ဘက်ခြမ်း၊ ပဲခူးတိုင်း အရှေ့ဘက်ခြမ်း၊ တနင်္သာရီတိုင်းရှိ မြို့နယ်အချို့၊ ကရင်၊ ကယား၊ ချင်း နှင့် မွန်ပြည်နယ်အတွင်းရှိ မြို့နယ်အချို့တို့တွင် လက် နက်ကိုင်တိုက်ခိုက်မှုများ၊ သတ်ဖြတ်မှုများ လုပ်ဆောင်နေကြောင်းလည်း နစကမှ အသိပေးထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဝိုင်ဖိုင်ကြိုးသွယ်တန်းရာမှ အမျိုးသား (၃)ဦး ဓာတ်လိုက်မှု သာကေတမြို့နယ်၌ဖြစ်ပွား
RELATED POSTS
04 Oct 2024 | နိုင်ငံရေး,ပြည်တွင်း
02 Oct 2024 | နိုင်ငံရေး,နိုင်ငံတကာ