NSS -  ဇူလိုင် ၂၇

လောင်းလုံးမြို့နယ်ရှိ စိုက်ပျိုးရေးဦးစီးဌာနမှ ဒုဦးစီးမှူးအား PDF များက ဖမ်းဆီးခေါ်ဆောင်ကာ လုပ်ကြံသတ်ဖြတ်မှုဖြစ်ပွားခဲ့ကြောင်း နစကမှ ထုတ်ပြန်ထားသည်။

နစကမှ ယမန်နေ့(ဇူလိုင်လ ၂၆ ရက်) ညပိုင်းတွင် အထက်ပါကဲ့သို့ ထုတ်ပြန်ထားခြင်းဖြစ်သည်။

လောင်းလုံးမြို့နယ်၊ စခန်းကြီးကျေးရွာရှိ စိုက်ပျိုးရေးသိပ္ပံကျောင်း(ထားဝယ်)တွင် စိုက်ပျိုးရေးပညာများ သင်ကြားပေးနေသည့် စိုက်ပျိုးရေးဦးစီးဌာနမှ ဒုဦးစီးမှူးဦးသိန်းဦးသည် ပြီးခဲ့သည့် ဇူလိုင်လ(၂၂)ရက်တွင် လုပ်ကြံသတ်ဖြတ်ခံခဲ့ရကြောင်း နစကမှ ထုတ်ပြန်ထားသည်။

ဦးသိန်းဦးသည် ၎င်း၏နေအိမ်၌ အိပ်ပျော်နေစဥ် PDF များက ဆိုင်ကယ်များဖြင့် ရောက်ရှိလာပြီး နေအိမ်အရှေ့ဘက်ရှိ ဆီအုန်းခြံသို့ ဖမ်းဆီးခေါ်ဆောင်သွားခဲ့ကြောင်း သိရသည်။

ထို့နောက် လက်နက်ငယ်များဖြင့် ပစ်ခတ်ခဲ့ခြင်းကြောင့် ဒုဦးစီးမှူး ဦးသိန်းဦးသည် အခင်းဖြစ်ရာနေရာတွင် သေဆုံးခဲ့ကြောင်း နစကမှ ထုတ်ပြန်ထားသည်။

ထို့ပြင် PDF များသည် ပြီးခဲ့သည့် ဇူလိုင်လ(၂၀)ရက်က အဆိုပါစိုက်ပျိုးရေးသိပ္ပံကျောင်းမှ ကျောင်းအုပ်ဆရာမကြီး ဒေါ်မြင့်မြင့်ခိုင် နှင့် ၎င်း၏သားဖြစ်သူ အသက်(၁၁)နှစ်အရွယ် မောင်အောင်ဟိန်းခန့် အပါအဝင် ဆရာ၊ ဆရာမ ငါးဦး စုစုပေါင်း(၇)ဦးတို့ကို အတင်းအဓမ္မဖမ်း ဆီးခေါ်ဆောင်သွားခဲ့ကြောင်း သိရသည်။

အဆိုပါဖြစ်စဥ်များနှင့်ပတ်သက်၍ ကျူးလွန်ခဲ့သည့် PDF များကို ဖမ်းဆီးရမိရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းများ ဆောင်ရွက်လျက်ရှိပြီး တည်ဆဲဥပဒေများနှင့်အညီ ပြင်းထန်ထိရောက်စွာ အရေးယူနိုင်ရေး ဆက်လက်ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထားသည်။

အထက်ပါဖြစ်စဥ်များနှင့် ပတ်သက်၍ ဗုဒ္ဓဘာသာကလျာဏယုဝအသင်း YMBA(ဗဟို) အပါအဝင် ဘာသာပေါင်းစုံ ချစ်ကြည်ညီညွတ်ရေးအဖွဲ့(ဗဟို)၊ မြန်မာနိုင်ငံသဘင်အစည်းအရုံး(ဗဟို)၊ မြန်မာနိုင်ငံသတင်းမီဒီယာကောင်စီ၊ မြန်မာနိုင်ငံစာရေးဆရာအသင်း၊ မြန်မာနိုင်ငံရုပ်ရှင်အစည်းအရုံး၊ မြန်မာနိုင်ငံပန်းချီပန်းပုအစည်းအရုံး(ဗဟို)၊ မြန်မာနိုင်ငံဟာသပညာရှင်များအစည်းအရုံးနှင့် မြန်မာနိုင်ငံ ဂီတအစည်းအရုံး(ဗဟို)တို့မှ ပြင်းထန်စွာကန့်ကွက်ရှုတ်ချကြောင်း အသီးသီးထုတ်ပြန်ခဲ့ကြသည်။

ထို့ပြင် ပိန္နဲကုန်းဂျာမေဗလီဝတ်ပြုကျောင်း၊ ဘူးသီးတောင်မောင်တောဒေသ ဖွံ့ဖြိုးရေးအသင်း၊ မြန်မာ နိုင်ငံလုံးဆိုင်ရာ တမီလ်ဟိန္ဒူဖောင် ဒေးရှင်း(ဗဟို)၊ မြန်မာနိုင်ငံလုံးဆိုင်ရာ ဟိန္ဒူဘာသာရေးဗဟိုအဖွဲ့ချုပ်၊ သနန္တနဓမ္မပါလက(ဟိန္ဒူ)အဖွဲ့ချုပ်၊ မြန်မာနိုင်ငံလုံးဆိုင်ရာ အစ္စလာမ် ဘာသာရေးအဖွဲ့ကြီး၊ ပြည်ထောင်စုမြန်မာနိုင်ငံ မက်သဒစ်အသင်းတော်(အောက်မြန်မာပြည်)နှင့် မြန်မာနိုင်ငံ ဧဝံဂေလိခရစ်ယာန်မဟာမိတ်အဖွဲ့ချုပ်တို့မှလည်း အထက်ပါဖြစ်စဥ်များအပေါ်  ပြင်းထန်စွာကန့်ကွက်ကြောင်း သဘောထားများ ထုတ်ပြန်ထားကြောင်း နစကမှ သိရသည်။