မျိုးကြီး (NSS) - ဇူလိုင် ၂၅

နှစ်သောင်းတန်ငွေစက္ကူများသည် ငွေရေးကြေးရေးဈေးကွက်အတွင်းသို့ အလုံးအရင်းဖြင့် မဝင်ရောက်ရန် အာမခံကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

ဗိုလ်ချုပ်ဇော်မင်းထွန်းက ယမန်နေ့(ဇူလိုင်လ ၂၄ ရက်) ညပိုင်းတွင် နှစ်သောင်းတန်ငွေစက္ကူအသစ်ကိစ္စနှင့်ပတ်သက်၍ မီဒီယာများကို အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံတော်ဗဟိုဘဏ်သည် မာရဝိဇယဗုဒ္ဓရုပ်ပွားတော်မြတ်ကြီး တည်ဆောက်ပြီးစီးမှုအထိမ်းအမှတ်နှင့် ဆင်ဖြူတော် ရဋ္ဌနန္ဒက၏ တစ်နှစ်မြောက်မွေးနေ့အထိမ်းအမှတ်အဖြစ် နှစ်သောင်းကျပ်တန်ငွေစက္ကူအသစ်များကို ဇူလိုင်လ ၃၁ ရက်တွင် ထုတ်ဝေသွားမည်ဖြစ်ကြောင်း ကြေညာခဲ့သည်။

ထိုသို့ ကြေညာခဲ့ပြီးနောက်ပိုင်းတွင် ငွေကြေးဖောင်းပွမှုအခြေအနေနှင့် ကုန်ဈေးနှုန်းမြင့်တက်လာမည့်အခြေအနေများအပေါ် ပြည်သူလူထုအကြား စိုးရိမ်မှုများရှိခဲ့ကြသည်။

“ငွေရေးကြေးရေး ဈေးကွက်ထဲမှာဒီငွေစက္ကူ ငွေကျပ် နှစ်သောင်းတန်အသစ်တွေ အလုံးအရင်းနဲ့ ဝင်ရောက်လာဖို့ဆိုတဲ့ ကိစ္စကလုံးဝလည်း မဖြစ်နိုင်ဘူး၊ ဖြစ်လည်းမဖြစ်ပါဘူးလို့ အာမခံပါတယ်။ ဒါကြောင့် ငွေကြေးဖောင်းပွမှုဆိုတာ မဖြစ်နိုင်ပါဘူး။ မတည်ငြိမ်အောင် ကောလာဟလတွေ ထုတ်လွှင့်နေတာပဲဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောသည်။

ထို့ပြင် ၎င်းက နစကအစိုးရသည် ဖွဲ့စည်းပုံအခြေခံဥပဒေ (၂၀၀၈ ခုနှစ်) လက်ခံထားသည့် အစိုးရဖြစ်ပြီး စီးပွားရေးဆိုင်ရာလုပ်ငန်းများကို နိုင်ငံပိုင်သိမ်းယူခြင်း မပြုလုပ်ကြောင်းနှင့် တရားဝင်ထုတ်ဝေထားပြီးဖြစ်သော ငွေကြေးများကိုလည်း တရားမဝင်ငွေကြေးအဖြစ် သတ်မှတ်မည်မဟုတ်ကြောင်းလည်း ပြောကြားသည်။

“နောက်ဆုံးအနေနဲ့ အသိပေးပြောကြားလိုတာကတော့ အခုလက်ရှိဖြစ်ပေါ်နေတဲ့အခြေအနေကို ကောလာဟလတွေ ထုတ်လွှင့်ဖို့အတွက် အချိန်ကိုက် ဆောင်ရွက်နေကြတာဖြစ်တယ်။ အစိုးရအနေနဲ့ စီးပွားရေးလုပ်ငန်းတွေနဲ့ပတ်သက်ပြီး ဒီအခြေအနေတွေကို ကောင်းစွာထိန်းသိမ်းနိုင်တဲ့ အခြေအနေရှိပါတယ်” ဟု ၎င်းက ဆက်လက်ပြောသည်။

အလားတူ ပြည်သူလူထုအနေဖြင့် ယုံကြည်စိတ်ချစွာ လူမှုစီးပွားဘဝဖွံ့ဖြိုးတိုးတက်ရေးလုပ်ငန်းများကို လုပ်နိုင်ကြောင်း နစကမှ အာမခံသည်ဟုလည်း အသိပေးထားသည်။

အဆိုပါ နှစ်သောင်းကျပ်တန်ငွေစက္ကူအသစ်သည် အလုံးအရင်းဖြင့် ထုတ်လုပ်မည့် ပိုက်ဆံမဟုတ်ဘဲ အထိမ်းအမှတ်အနေဖြင့်သာ ထုတ်လုပ်သည့် ငွေစက္ကူပင်ဖြစ်ကြောင်း နစကမှ ဆိုထားသည်။

“ဒီငွေစက္ကူကျပ် နှစ်သောင်းတန်အသစ်က အထိမ်းအမှတ်အနေနဲ့ထုတ်ဝေတဲ့ ငွေစက္ကူဖြစ်တဲ့အတွက် အဲဒီပိုက်ဆံနဲ့ တန်ဖိုးတူညီတဲ့ ငွေပမာဏကိုဘဏ်ကို သွားသွင်းမှ ငွေစက္ကူကျပ်နှစ်သောင်းတန်အသစ်ကို ထုတ်ပေးမှာဖြစ်ပါတယ်။ အဲဒီလို ထုတ်ပေးတဲ့နေရာမှာလည်း အကန့်အသတ်ရှိပါတယ်။ ဘဏ်ကိုသွားပြီး အခုထုတ်လိုက်တဲ့ ငွေစက္ကူကျပ် နှစ်သောင်းတန်အသစ် သိန်းတစ်ရာလိုချင်လို့ဆိုပြီး ကိုယ့်ရဲ့ငွေစက္ကူအဟောင်း သိန်းတစ်ရာနဲ့ သွားပြီးလဲရင်လည်း သိန်းတစ်ရာထုတ်မပေးနိုင်ပါဘူး။ တစ်ဦးကို သုံးရွက်ပဲ ထုတ်ပေးမှာ ဖြစ်ပါတယ်။ အဲဒီသုံးရွက်ကိုလည်း အလကားထုတ်ပေးမှာ မဟုတ်ပါဘူး။ မြန်မာစကားပုံနဲ့ အားလုံးနားလည်အောင် လွယ်လွယ်ပြောရမယ်ဆိုရင် ဆန်ပေးမှဆီရမယ်လို့ပဲ ပြောရမှာဖြစ်ပါတယ်” ဟု နစကပြောခွင့်ရက ပြောသည်။

ထိုသို့ နှစ်သောင်းတန်ငွေစက္ကူကို လာရောက်လဲလှယ်သည့် အခြားငွေစက္ကူအဟောင်းများကို မြန်မာနိုင်ငံတော်ဗဟိုဘဏ်က အားလုံးကိုဖျက်ဆီးသွားမည်ဖြစ်ကြောင်း သိရသည်။

လက်ရှိတွင် မြန်မာနိုင်ငံ၌ နှစ်သောင်းတန်ငွေစက္ကူအသစ် ထုတ်ဝေမည်ဟု ကြေညာခဲ့ပြီးနောက်ပိုင်းတွင် ရွှေဈေး၊ ဒေါ်လာဈေး၊ ကားဈေးအပါအဝင် ကုန်ဈေးနှုန်းများသည်လည်း မြင့်တက်လာကြောင်း ပြောဆိုမှုများရှိနေသည်။