NSS - ဇူလိုင် ၂၃

သီတဂူဆရာတော်အပါအဝင် မာရဝိဇယဘုရား တည်ထားကိုးကွယ်မှုနှင့် နိုင်ငံတော်လုံခြုံရေးဆောင် ရွက်ခဲ့သူများကို နစကဥက္ကဋ္ဌက ဂုဏ်ထူးဆောင်ဘွဲ့များ ပေးအပ်ချီးမြှင့်ခဲ့ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ယနေ့(ဇူလိုင်လ ၂၃ ရက်)တွင် ရဟန်သံဃာနှင့် လူပုဂ္ဂိုလ်ပေါင်း (၂၂၀)ကို ဂုဏ်ထူးဆောင်ဘွဲ့များ ပေးအပ်ချီးမြှင့်လိုက်ခြင်းဖြစ်ကြောင်း နစကမှ ထုတ်ပြန်ထား သည်။

မာရဝိဇယဗုဒ္ဓရုပ်ပွားတော်မြတ်ကြီး တည်ထားကိုးကွယ်ရေးလုပ်ငန်းများ နှင့် နိုင်ငံတော်လုံခြုံရေး၊ တရားဥပဒေစိုးမိုးရေးနှင့် နိုင်ငံတော်ဖွံ့ဖြိုးတိုးတက်ရေးဆိုင်ရာလုပ်ငန်းများကို စွမ်းစွမ်းတမံဆောင်ရွက်ခဲ့ကြသော ဆရာတော်ကြီးများ နှင့် လူပုဂ္ဂိုလ်များအား ဂုဏ်ထူးဆောင်ဘွဲ့များ၊ ဂုဏ်ထူးဆောင်တံဆိပ်များကို ချီးမြှင့်အပ်နှင်းလိုက်သည်ဟု နစကဥက္ကဋ္ဌက ပြောသည်။

နိုင်ငံတော်သြဝါဒါစရိယ၊ ရွှေကျင်နိကာယဥက္ကဋ္ဌ ဒေါက်တာဘဒ္ဒန္တဉာဏိဿရ၊ ရွှေသုဝဏ်ဆရာတော်ကြီး ဘဒ္ဒန္တသဒ္ဓိယ၊ ပါမောက္ခချုပ်ဆရာတော်(ငြိမ်း) ဒေါက်တာ ဘဒ္ဒန္တသီလာနန္ဒာဘိဝံသ၊ ပါဠိဆရာတော် ဘဒ္ဒန္တဝိမလဗုဒ္ဓိတို့အား ဗိုလ်ချုပ်မှူးကြီး မင်းအောင်လှိုင်က သရေစည်သူဘွဲ့ ချီးမြှင့်လိုက်ခြင်းဖြစ်သည်။

ထို့ပြင် နစကဥက္ကဋ္ဌသည် ဒုတိယဗိုလ်ချုပ်ကြီး ညိုစောအပါအဝင် အခြားသော ဒုတိယဗိုလ်ချုပ်ကြီးများကိုလည်း သရေစည်သူဘွဲ့ ပေးအပ်လိုက်ကြောင်း နစကမှ ထုတ်ပြန်ထားသည်။

ဆက်လက်ပြီး ဒေါက်တာဘဒ္ဒန္တဆေကိန္ဒ၊ ဘဒ္ဒန္တခေမာနန္ဒနှင့် ဆောက်လုပ်ရေးဝန်ကြီး ဦးမျိုးသန့်တို့ကိုလည်း နစကဥက္ကဋ္ဌက စည်သူဘွဲ့ ပေးအပ်ခဲ့ကြောင်း သိရသည်။

ထို့အတူ ဗိုလ်ချုပ်မှူးကြီးမင်းအောင်လှိုင်သည် တပ်မတော်ဆိုင်ရာစွမ်းဆောင်ရည်သတ္တိဂုဏ်ထူးဆောင်ဘွဲ့ သူရဘွဲ့ကို ကာကွယ်ရေးဝန်ကြီးဌာနမှ ဗိုလ်မှူးသော်ဇင်(လေ)နှင့် တပ်ကြပ်ကြီး ဝင်းမြင့်သူတို့အား ပေးအပ်လိုက်ကြောင်း နစကမှ အသိပေးထားသည်။

သီရိပျံချီဘွဲ့၊ ဝဏ္ဏကျော်ထင်ဘွဲ့၊ သိပ္ပကျော်စွာဘွဲ့တို့ကိုလည်း ရဟန်းသံဃာများနှင့် လူပုဂ္ဂိုလ်များအား နစကဥက္ကဋ္ဌက ပေးအပ်လိုက်ကြောင်း သိရသည်။

ထို့ပြင် သူရဲကောင်းမှတ်တမ်းဝင်တံဆိပ်၊ ရဲသူရတံဆိပ်၊ ရဲဗလတံဆိပ်၊ စီမံထူးချွန်တံဆိပ်၊ လူမှုထူးချွန်တံဆိပ်၊ စက်မှုစီးပွား ထူးချွန်တံဆိပ်၊ ဝိဇ္ဇာပညာထူးချွန်တံဆိပ်၊ နည်းပညာထူးချွန်တံဆိပ်များကိုလည်း သက်ဆိုင်ရာ လူပုဂ္ဂိုလ်အသီးသီးအား ပေးအပ်ချီးမြှင့်ခဲ့ကြောင်း နစကမှ ထုတ်ပြန်ထားသည်။

မာရဝိဇယဗုဒ္ဓရုပ်ပွားတော်မြတ်ကြီး တည်းထားကိုးကွယ်ရေးလုပ်ငန်းများ၌ စကျင်ကျောက်တုံးတော်ကြီးအား လှူဒါန်းခဲ့သော Anglo Mining ကုမ္ပဏီမှ မန်နေဂျင်းဒါရိုက်တာ ဦးအောင်ခိုင်သန်းကို သာသနာတော်ဆိုင်ရာဘွဲ့တံဆိပ်တော်ဖြစ်သော သီဟသုဓမ္မမဏိဇောတဓရဘွဲ့တံဆိပ်ကို နစကဥက္ကဋ္ဌက ချီးမြှင့်အပ်နှင်းခဲ့သည်။