စော (NSS) - ဇူလိုင် ၆

မန္တလေးတိုင်း၊ အမရပူရမြို့နယ်၊ တောင်သမာန်အင်း၌ အသက်(၆ဝ)ဝန်းကျင်အရွယ်ရှိ အမျိုးသား အလောင်းတစ်လောင်းတွေ့ရှိခဲ့ကြောင်း သတင်းရရှိသည်။

အဆိုပါအလောင်းကို ယနေ့(ဇူလိုင်လ ၆ ရက်)၊ မွန်းလွဲ (၁)နာရီခွဲဝန်းကျင်အချိန်တွင် အမရပူရမြို့နယ်၊ ဦးပိန်တံတားအလယ်ဇရပ်၌ တွေ့ရှိခဲ့ခြင်းဖြစ်ကြောင်း လူငယ်အားမာန်လူမှုကူညီရေးအသင်းထံမှ သိရသည်။

“တောင်သမာန်ရွာအရှေ့ဘက်ကမ်းကနေ အလောင်းပေါ်လာတဲ့နေရာနဲ့ဆိုရင် ပေ(၁ဝဝဝ)လောက်ရှိပါတယ်။ ကမ်းနဲ့တော်တော်တော့လှမ်းတယ်။ ပြင်ပဒဏ်ရာတော့မတွေ့ပါဘူး။ သေနေတာကတော့ကြာပြီထင်တယ် အနံတွေတောင်ထွက်နေပြီ”ဟု လူငယ်အားမာန်လူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

အဆိုပါအမျိုးသားသည် အသက်(၆ဝ)ဝန်းကျင်အရွယ်ရှိပြီး ၎င်းနှင့်ပတ်သက်သည့် မည်သည့်သတင်းအချက်အလက်မှ မသိရသေးကြောင်း အထက်ပါအသင်းက ဆက်လက်ပြောဆိုထားသည်။

၎င်း၏ ရုပ်အလောင်းအား မန္တလေးပြည်သူ့ဆေးရုံကြီး ရင်ခွဲရုံသို့ ပို့ဆောင်ထားကြောင်း သိရသည်။