ယွန်း (NSS) - ဇူလိုင် ၃

လုံခြုံရေးအရ မြေပြင်စာရင်းကောက်ယူရန်ကျန်သည့် ကချင်ပြည်နယ်အတွင်းရှိ အိမ်ထောင်စုပေါင်းခုနစ်သောင်းနီးပါးကို သတ်မှတ်ကာလအတွင်း အပြီးကောက်ယူနိုင်ရေးဆောင်ရွက်ရန် ပြည်ထောင်စုဝန်ကြီးက တိုက်တွန်းပြောကြားခဲ့သည်။

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်က ကချင် ပြည်နယ်၊ မြစ်ကြီးနားမြို့ရှိ ပြည်နယ်အစိုးရအဖွဲ့ရုံးအစည်းအဝေးခန်းမတွင် ဇူလိုင် လ(၂)ရက်၌ ကျင်းပခဲ့သည့် မြေပြင်ကွင်းဆင်းစာရင်းကောက်ယူမှုနှင့် ပတ်သက်သည့် ညှိနှိုင်းအစည်းအဝေးတွင် အထက်ပါကဲ့သို့ အသိပေးပြောကြားခဲ့ခြင်းဖြစ်သည်။

ကချင်ပြည်နယ်တွင် ၂ဝ၂၃ ခုနှစ်၊ ဇွန်လ(၂၆)ရက်အထိ e-ID Software ဖြင့် ထုတ်ယူထားသည့် အိမ် ထောင်စုစာရင်းဖြင့်ကောက်ယူမှု (၂၆ဝဝဝဝ)ကျော်ရှိခဲ့ကြောင်း သိရသည်။

ထို့ပြင် အိမ်ထောင်စုစာရင်းမရှိသဖြင့် အလွတ်ပုံစံဖြင့် ကောက်ယူမှု (၇ဝဝဝဝ)ကျော်အပါအဝင် စုစုပေါင်း အိမ်ထောင်စုပေါင်း (၃၃ဝဝဝဝ)ကျော် ကောက်ယူပြီးစီးခဲ့ပြီး လျာထားချက်၏ (၇၉ ဒသမ ၂၁)ရာခိုင်နှုန်း ကောက်ယူပြီးဖြစ်ကြောင်း ပြည်ထောင်စုဝန်ကြီးမှ အသိပေးပြောကြားခဲ့သည်။

အလားတူ လုံခြုံရေးအရ ကောက်ယူရန် ကျန်နေသည့် အိမ်ထောင်စု (၆၈ဝဝဝ)ကျော်ရှိနေပြီး အဆိုပါဒေသများကို သတ်မှတ်ကာလအတွင်း ပြီးစီးအောင်ကောက်ယူနိုင်ရေးကို ဆောင်ရွက်ရန် ၎င်းက ဆက် လက်ပြောကြားခဲ့သည်။

(၂ဝ၂၄)ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းကောက်ယူရေးလုပ်ငန်းကို ပြည်လုံး ကျွတ်အဆင့် ကောက်ယူနိုင်ရေးအတွက် တိုင်းဒေသကြီးနှင့် ပြည်နယ်အလိုက် စမ်းသပ်သန်းခေါင်စာရင်းကို ယခုနှစ်(၂ဝ၂၃) အောက်တိုဘာလ(၁)ရက်တွင် ကောက်ယူသွားမည်ဖြစ်ကြောင်း သိရသည်။

စမ်းသပ်သန်းခေါင်စာရင်းကောက်ယူရာတွင်လည်း ၂ဝ၂၄ ခုနှစ်၌ ကောက်ယူမည့်နည်းလမ်းအတိုင်း တွေ့ရှိရာအရပ်၌ ကောက်ယူနည်း နှင့် တစ်အိမ်တက်ဆင်းကောက်ယူနည်းကို အသုံးပြုကာ Mobile Tablet များဖြင့် ဖြည့်သွင်းကောက်ယူသွားမည်ဖြစ်ကြောင်း ပြီးခဲ့သည့်လပိုင်းတွင် ဝန်ကြီးဌာနက အသိပေးထုတ်ပြန်ထားသည်။

ထို့ပြင် e-ID စနစ် လုပ်ငန်းအကောင်အထည်ဖော်ရေးအတွက် တစ်ဦးချင်းစီ၏ ကိုယ်ရေးအချက်အလက်နှင့် ဇီဝအချက်အလက် ကောက်ယူရေးလုပ်ငန်းကိုလည်း တိုင်းဒေသကြီးနှင့် ပြည်နယ်အလိုက် ဆောင် ရွက်လျက်ရှိကြောင်း သိရသည်။

မြန်မာနိုင်ငံတွင် လူဦးရေသန်းခေါင်စာရင်းကောက်ယူခြင်းလုပ်ငန်းကို (၁၉၇၃) ခုနှစ်၊ (၁၉၈၃) ခုနှစ်နှင့် (၂ဝ၁၄) ခုနှစ်တို့တွင် ပြည်လုံးကျွတ်အဆင့် ကောက်ယူနိုင်ခဲ့ကြောင်း သိရသည်။

လူဦးရေသန်းခေါင်စာရင်းကို နိုင်ငံတော်၏ လူမှုရေး၊ စီးပွားရေး၊ စီမံခန့်ခွဲရေးကိစ္စရပ်များအတွက် မူဝါဒများ၊ စီမံကိန်းများ ရေးဆွဲချမှတ်အကောင်အထည်ဖော်ရာတွင် အခြေခံအသုံးပြုရသည့် စာရင်းအင်းအချက်အလက်များအနက် အဓိကကျသည့် လူဦးရေဆိုင်ရာ ကိန်းဂဏန်းအချက်အလက်များ ရရှိရေးအတွက် ဆောင်ရွက်ခြင်းဖြစ်ကြောင်း သိရသည်။