ယွန်း (NSS) - ဇူလိုင် ၂

တခေတ်တခါက ပြည်သူများအား ရယ်မောပျော်ရွှင်စေရန် စွမ်းဆောင်ပေးခဲ့ကြသည့် အသက် (၆၅)နှစ်အထက် သက်ကြီးလူရွှင်တော်ကြီးများအား ပူဇော်ကန်တော့မည့် ကန်တော့ပွဲ ကျင်းပသွားမည်ဖြစ်ကြောင်း မြန်မာနိုင်ငံဟာသပညာရှင်များ အစည်းအရုံးထံမှ သိရသည်။

သက်ကြီးလူရွှင်တော်ကြီးများအား ပူဇော်ကန်တော့ပွဲကို လာမည့် ဇူလိုင်လ(၇)ရက်တွင် နေပြည်တော်ရှိ Myanmar International Convention Center-2(MCCI-II) တွင် ကျင်းပပြုလုပ်သွားမည်ဖြစ်ကြောင်း သိရသည်။

အဆိုပါ ကန်တော့ပွဲကို နှစ်စဥ်နှစ်တိုင်း ကျင်းပပြုလုပ်ခဲ့ရာ လက်ရှိကျင်းပမည့် ကန်တော့ပွဲသည် (၁၃) ကြိမ်မြောက် ဖြစ်ကြောင်း သိရသည်။

“ကျွန်တော်တို့ ဒီပွဲလေးကို လုပ်ဖြစ်တာ (၁၃)ကြိမ်မြောက်ရှိပါပြီ။ နှစ်တိုင်းလုပ်ဖြစ်ပါတယ်။ ဒီနှစ်က မြန်မာတစ်နိုင်ငံလုံး အတိုင်းအတာဖြစ်သွားတော့ ပိုများသွားတယ်။ အရင်ကတော့ ရန်ကုန်တိုင်းကနေပဲ လုပ်နေတာပေါ့” ဟု မြန်မာနိုင်ငံဟာသပညာရှင်များ အစည်းအရုံးဥက္ကဋ္ဌ ဦးဒိန်းဒေါင်က NP News ကိုပြော သည်။

ပြီးခဲ့သည့် (၂ဝ၂၂)ခုနှစ်တွင် အသက်(၆၅)နှစ်အထက် သက်ကြီးလူရွှင်တော် (၁၂၇)ဦးအား ကန်တော့ခဲ့ကြပြီး ယခုနှစ်သည် မြန်မာတစ်နိုင်ငံလုံး အတိုင်းအတာဖြင့် ကန်တော့သွားမည်ဖြစ်သည့်အတွက် စုစုပေါင်း ကန်တော့ခံမည့်ဦးရေ (၁၆ဝ)ခန့် ရှိမည်ဖြစ်ကြောင်း သိရသည်။

လက်ရှိတွင် ကန်တော့ပွဲကျင်းပနိုင်ရေးအတွက် အလှူခံခြင်းများ ဆက်လက် ဆောင်ရွက်လျက်ရှိကြောင်း သိရသည်။

“ကျွန်တော်တို့မှာက ဝင်ငွေမရှိဘူးလေ။ ကျွန်တော်တို့ရဲ့ဝင်ငွေက ပွဲကရင်းအလှူခံမယ်။ ပြီးရင် သီချင်းတွေဆိုပြီး အလှူလိုက်ခံတယ်။ ဖိတ်စာနဲ့ အလှူခံမယ်။ ဝင်ငွေကလည်း ဘာလုပ်ပိုင်ခွင့်မှမရှိတော့ ဘာဝင်ငွေမှ မရဘူး။ အစည်းအရုံးအဖွဲ့ဝင်တွေလိုက်ပြီး အလှူခံတယ်။ သူတို့ကိုယ်တိုင်လည်း လှူတယ်။ ဒါပေမယ့် လူရွှင်တော် တော်တော်များများက လူ(၁ဝဝ)မှာ (၂)ယောက်‌တောင် အိမ်ပိုင်မရှိကြဘူး။ နိုင်ငံတော်လူရွှင်တော်ကြီးတွေမှာလည်း အိမ်ငှားနေရတဲ့သူတွေရှိတယ်။ ကျန်တဲ့သူတွေကတော့ ပြောမနေနဲ့တော့”ဟု ဦးဒိန်းဒေါင်က ဆက်လက်ပြောဆိုထားသည်။

အခမ်းအနားသို့ တက်ရောက်၍ ကန်တော့ခံမည့် လူရွှင်တော်ကြီးများအပြင် အိပ်ရာထဲလဲနေသည့် သက်ကြီးလူရွှင်တော်ကြီးများကိုလည်း သက်ဆိုင်ရာတာဝန်ခံများဖြင့် သွားရောက်ကန်တော့နိုင်ရန် စီစဥ်ထားပြီး ပြည်သူများအနေဖြင့်လည်း တက်စွမ်းသမျှ ပါဝင်လှူဒါန်းနိုင်ကြောင်း ၎င်းက ဆက်လက်ပြောဆိုထားသည်။ 

“တစ်ချိန်ကစိတ်ညစ်စရာ တွေကြုံတွေ့တဲ့အခါမှာ လူရွှင်တော်ကြီးတွေရဲ့ ဇာတ်ကားတွေ ကြည့်ဖူးတာတွေ အမှတ်တရအနေနဲ့ရှိဖူးမှာပါ။ ချစ်ချစ်မုန်းမုန်း ရီဖူးကြတဲ့ သူတွေရှိမှာပါ။ အဲဒီလိုရီဖူးတာလေးကိုပဲ ရီဖူးသဒ္ဓါကြေးလေး လှူဒါန်းကြရင်ပိုကောင်းတာပေါ့”ဟု ဦးဒိန်းဒေါင်က ပြောသည်။

သက်ကြီးလူရွှင်တော်ကြီးများ ကန်တော့ပွဲတွင် ပါဝင်လှူဒါန်းလိုသူများအနေဖြင့် U Tin Htay (09-5138996)၊ U Aye Naing (09-5043682) စသည့် Kpay No များကို ဆက်သွယ်လှူဒါန်းနိုင်ကြောင်း သိရသည်။

လက်ရှိတွင် တစ်နိုင်ငံလုံး၌ မြန်မာနိုင်ငံဟာသပညာရှင်များအစည်းအရုံးအဖွဲ့ဝင် (၁ဝဝဝ)ကျော်ရှိကြောင်း သိရသည်။