NSS - ဇူလိုင် ၁

ရှမ်းပြည်နယ်(မြောက်ပိုင်း)၊ လားရှိုးမြို့ရှိ ဖူလီဟိုက်ဟိုတယ်ကို အကြမ်းဖက်အဖွဲ့က လက်လုပ်ဗုံးဖြင့် ပစ်ပေါက်ထွက်ပြေးသွားခဲ့ကြောင်း မြန်မာနိုင်ငံရဲတပ်ဖွဲ့မှ သတင်းထုတ်ပြန်ထားသည်။

ပြီးခဲ့သော ဇွန်လ ၂၈ ရက်၊ ည ၇နာရီ ၄၅မိနစ်အချိန်တွင် လားရှိုးမြို့၊ အမှတ်(၂)ရပ်ကွက်ရှိ ဖူလီလိုက်ဟိုတယ်တွင် အထက်ပါကဲ့သို့ဖြစ်ပွားခဲ့ကြောင်း သိရသည်။

ဖြစ်စဉ်မှာ အဆိုပါဟိုတယ်သို့ အကြမ်းဖက်သူ အမျိုးသား(၂)ဦးက ဆိုင်ကယ်(၁)စီးဖြင့်ရောက်ရှိလာပြီး လက်လုပ်ဗုံးဖြင့် ပစ်ပေါက်ထွက်ပြေးသွားခဲ့ကြောင်း ရဲတပ်ဖွဲ့မှ ဆက်လက်ပြောဆိုထားသည်။

ထိုသို့ပစ်ပေါက်မှုကြောင့် ဟိုတယ်ဘေးရှိ မီးစက်ခန်းအတွင်းသို့ လက်လုပ်ဗုံး(၁)လုံး ကျရောက်ပေါက်ကွဲမှု ဖြစ်ပွားခဲ့ကြောင်း သိရသည်။

ပေါက်ကွဲမှုကြောင့် ဟိုတယ်မီးစက်ခန်းအတွင်းရှိ မီးစက်အား သွယ်တန်းထားသည့် ဝါယာကြိုးများပျက်စီးခဲ့ပြီး ဟိုတယ်ရှိ မှန်များကွဲအက်ပျက်စီးသွားခဲ့ကြောင်း သိရသည်။

အကြမ်းဖက်မှုလုပ်ရပ်များ ကျူးလွန်ခဲ့သူများအား ဥပဒေနှင့်အညီ ထိရောက်စွာအရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲ့မှ သတင်းထုတ်ပြန်ထားသည်။