ဒဂုံဆိပ်ကမ်းမြို့နယ်တွင် ငွေကျပ်သိန်း (၁၅ဝဝ)ကျော်တန်ဖိုးရှိ မူးယစ်ဆေးဝါးများ ဖမ်းဆီးရမိ
Pearl (NSS) - ဇွန် ၂၉
ရန်ကုန်တိုင်း ၊ ဒဂုံဆိပ်ကမ်းမြို့နယ်တွင် ငွေကျပ်သိန်း (၁၅ဝဝ)ကျော်တန်ဖိုးရှိ မူးယစ်ဆေးဝါးများ ဖမ်းဆီးရမိခဲ့ကြောင်း မြန်မာနိုင်ငံ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ထံမှ သတင်းရရှိသည်။
ပြီးခဲ့သည့် ဇွန်လ (၂၇) ရက်၊ နေ့လည်(၁)နာရီ အချိန်ခန့်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များသည် ဒဂုံဆိပ်ကမ်းမြို့နယ် ၊ (၉၂)ရပ်ကွက်၊ ကျွန်းရွှေဝါလမ်းတွင် စစ်ဆေးရှာဖွေမှုများပြုလုပ်ခဲ့ကြောင်း သိရသည်။
ထိုသို့ဆောင်ရွက်ခဲ့ရာ လမ်းလျှောက်လာသူ တင်ဇာမင်း နှင့် သီဟကျော်(ခ)သီဟတို့ထံမှ ထိန်းချုပ်ဓာတု ပစ္စည်း(ကဖင်း) အလေးချိန် ၆ဝဝ ဂရမ်(ဒေသကာလပေါက်ဈေးတန်ဖိုးငွေကျပ် ၉ဝဝဝဝ)၊ စိတ်ကြွရူးသွပ်ဆေးပြား ၆ဝဝ ပြား(ဒေသ ကာလပေါက်ဈေးတန်ဖိုးငွေကျပ် ၆ သိန်း)နှင့် လက်ကိုင်ဖုန်း ၂ လုံးတို့အား တွေ့ရှိသိမ်းဆည်းရမိခဲ့ကြောင်း သိရသည်။
ထို့နောက် နေ့လည် (၁)နာရီခွဲ အချိန်တွင် ၎င်းတို့နေထိုင်သည့် ဒဂုံဆိပ်ကမ်းမြို့နယ်၊ (၉၂)ရပ်ကွက်ရှိ နေအိမ်အတွင်းမှ ထိန်းချုပ်ဓာတုပစ္စည်း(ကဖင်း)အလေးချိန် ၁ဝဝဝ ကီလို(ဒေသကာလပေါက်ဈေးတန်ဖိုး ငွေကျပ်သိန်း ၁၅ဝဝ)နှင့် စိတ်ကြွရူးသွပ်ဆေးပြား ၉၂ဝ ပြား(ဒေသကာလပေါက်ဈေးတန်ဖိုးငွေကျပ် ၉.၂ သိန်း) တို့အား ထပ်မံတွေ့ရှိသိမ်းဆည်းရမိခဲ့ကြောင်း ရဲတပ်ဖွဲ့မှ ဆိုသည်။
ကွင်းဆက်ဖော်ထုတ်ချက်အရ နေ့လည် (၂)နာရီ အချိန်ခန့်တွင် မချောစုလှိုင် နှင့် မျိုးနေဇာတို့အား ဒဂုံဆိပ်ကမ်းမြို့နယ်၊ (၆၁)ရပ်ကွက်၊ ရတနာလမ်းရှိ နေအိမ်အတွင်းမှ စိတ်ပြောင်းဆေးဝါး(Happy Water) အလေးချိန် ၂၄ ဂရမ် (ဒေသကာလပေါက်ဈေးတန်ဖိုးငွေကျပ် ၇.၂ သိန်း)၊ လက်ကိုင်ဖုန်း ၂ လုံးတို့နှင့်အတူ ထပ်မံသိမ်းဆည်းရမိခဲ့ကြောင်း သိရသည်။
လက်ရှိတွင် ၎င်းတို့အား ဒဂုံမြို့သစ်(ဆိပ်ကမ်း)မြို့မရဲစခန်းတွင် ဥပဒေအရအမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း ထုတ်ပြန်ထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ရန်ကုန်ရွှေဈေး ငွေကျပ် သုံးဆယ်နှစ်သိန်းလေးသောင်းဖြင့် အကျဘက်သို့ ဦးတည်နေ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ