NSS - ဇွန် ၂၉

KNDF နှင့် KNPP အကြမ်းဖက်လက်နက်ကိုင်အဖွဲ့တို့ တိုက်ခိုက်သိမ်းပိုက်ထားသည့် ပန်တိန်းဒေသနှင့် စွတ်ပိုင်ဒေသရှိ နယ်ခြားစောင့်တပ်များအား ပြန်လည်တိုက်ခိုက် သိမ်းပိုက်နိုင်ခဲ့ကြောင်း နစကမှ ထုတ်ပြန်ထားသည်။ 

ဖြစ်စဉ်မှာ ပြီးခဲ့သည့် ဇွန်လ ၁၃ ရက်မှ ၁၉ ရက်ထိ၊  ကယားပြည်နယ်အတွင်းရှိ တောင်လှစခန်း၊ မယ်တနွယ်စခန်း၊ ဘီပီ-၁၄ စခန်း၊ မယ်စဲ့စခန်းနှင့် နမ်ပေါင် စခန်းတို့အား KNDF နှင့် KNPP အကြမ်းဖက်လက်နက်ကိုင်အဖွဲ့တို့က အင်အားအလုံးအရင်းဖြင့် ဝင်ရောက်တိုက်ခိုက်ခဲ့ကြောင်း ထုတ်ပြန်ချက်တွင် ဖော်ပြထားသည်။ 

ထို့သို့ တိုက်ခိုက်ခဲ့မှုကြောင့် တိုက်ပွဲများပြင်းထန်စွာဖြစ်ပွားခဲ့ပြီး ဇွန်လ ၁၆ ရက်တွင် ပန်တိန်းဒေသရှိ အမှတ် (၁ဝဝ၄) နယ်ခြားစောင့်တပ်သည် ဆက်သွယ်မှုများ ပြတ်တောက်ခဲ့ကြောင်း သိရသည်။

 ထို့နောက် ဇွန်လ ၁၇ ရက်၊ နံနက်ပိုင်းတွင် ဆက်သွယ်မှုပြန်လည်ရရှိခဲ့သော အဆိုပါတပ်မှ တပ်မတော်အရာရှိတစ်ဦး၏ သတင်းပို့ချက်အရ အသွင်ပြောင်းတပ်ဖွဲ့ဝင်အချို့သည် လက်နက်၊ ခဲယမ်းများနှင့်အတူ တောခိုခဲ့ပြီး KNPP နှင့် KNDF အကြမ်းဖက်အဖွဲ့များနှင့် ပူးပေါင်းသွားခဲ့ကြောင်း နစကမှ ဆိုသည်။

ဖြစ်စဉ်ကြောင့် ယင်းနေ့ နံနက်ပိုင်းတွင် တပ်မတော်အနေဖြင့် လေကြောင်းချီတပ်ဖွဲ့များအသုံးပြု၍ လေကြောင်းပစ်ကူ၊ အမြောက်ပစ်ကူရယူပြီး အဆင့်ဆင့်ချီတက်တိုက်ခိုက်ခဲ့ရာ မွန်းလွဲပိုင်းတွင် အမှတ် (၁ဝဝ၄) နယ်ခြားစောင့်တပ်ကို ပြန်လည်ထိန်းချုပ်သိမ်းပိုက်နိုင်ခဲ့ပြီး တပ်မတော်သားအရာရှိ၊ စစ်သည်၊ မိသားစုများကိုကယ်တင်၍ ရဟတ်ယာဉ်များဖြင့် လုံခြုံစိတ်ချရသည့်နေရာသို့ ပြန်လည်ပို့ဆောင်ပေးခဲ့ကြောင်း သိရသည်။ 

အလားတူ စွတ်ပိုင်ဒေသရှိ အမှတ် (၁ဝဝ၅) နယ်ခြားစောင့်တပ်သည် ဇွန်လ ၁၇ ရက်တွင် ဆက်သွယ်မှုပြတ်တောက်ခဲ့ရာ လေကြောင်းချီတပ်ဖွဲ့သည် ရာသီဥတုအခြေအနေအရ အသုံးမပြုနိုင်သဖြင့် ကွန်မန်ဒိုတပ်ဖွဲ့များဖြင့် အဆင့်ဆင့်ချီတက်တိုက်ခိုက်ခဲ့ကြောင်း သိရသည်။ 

ထို့ကြောင့် ဇွန်လ ၂၇ ရက် ညနေပိုင်းတွင် အဆိုပါတပ်အား ပြန်လည်ထိန်းချုပ်သိမ်းပိုက်နိုင်ခဲ့ပြီး တပ်မ တော်မှအရာရှိ၊ စစ်သည်၊ မိသားစုများပျောက်ဆုံးနေသဖြင့် ရှာဖွေရေးလုပ်ငန်းများ ဆက်လက်ဆောင် ရွက်လျက်ရှိကြောင်း နစကမှ ဆိုသည်။ 

အဆိုပါ အမှတ် (၁ဝဝ၄) နှင့် အမှတ် (၁ဝဝ၅) နယ်ခြားစောင့်တပ်တို့အား တိုက်ခိုက်သိမ်းပိုက်ရာတွင် အပြန်အလှန် ထိတွေ့တိုက်ပွဲများ ဖြစ်ပွားခဲ့ပြီး ၎င်းတို့ထံမှ လက်နက်မျိုးစုံ ၄၁ လက်၊ ခဲယမ်းမျိုးစုံ ၉၂၇ တောင့်၊ ဗုံးသီးမျိုးစုံ ၂၈ လုံးနှင့် အခြားဆက်စပ်ပစ္စည်းများ သိမ်းပိုက်ရရှိခဲ့ပြီး တပ်မတော်မှ အရာရှိ၊ စစ်သည်အချို့ ကျဆုံး၊ ထိခိုက် ဒဏ်ရာရရှိခဲ့ကြောင်း သိရှိရသည်။

လက်ရှိတွင် တပ်မတော်အနေဖြင့် KNDF နှင့် KNPP အကြမ်းဖက်လက်နက်ကိုင်အဖွဲ့တို့ တိုက်ခိုက်သိမ်းပိုက်ထားသည့် မယ်စဲ့ဒေသမှစခန်းအချို့အား အမြန်ဆုံးပြန်လည်သိမ်းပိုက်နိုင်ရေး ဆက်လက်ဆောင်ရွက်လျက်ရှိကြောင်း ထုတ်ပြန်ချက်တွင် ဖော်ပြထားသည်။