NSS - ဇွန် ၂၉

မွန်ပြည်နယ်၌ KNLA၊ PDF ပူးပေါင်းအဖွဲ့က တံတားတစ်စင်းကို မိုင်းခွဲခဲ့ပြီးနောက် ခရိုင်အုပ်ချုပ်ရေးမှူးနှင့်အဖွဲ့ လာရောက်စစ်ဆေးစဉ် Drop ဗုံး၊ ရှော့တိုက်ဒုံးများဖြင့် ထပ်မံပစ်ခတ်ခဲ့ရာ ထိခိုက်သေဆုံးမှုများရှိခဲ့ကြောင်း သတင်းရရှိသည်။

ဖြစ်စဉ်မှာ ယနေ့(ဇွန်လ ၂၉ ရက်)၊ နံနက် ၄ နာရီခွဲအချိန်ခန့်တွင် သထုံမြို့နယ် နှင့် ဘီးလင်းမြို့နယ်အစပ်၌ရှိသော ကျုံအိပ်တံတား၌ အထက်ပါကဲ့သို့ ဖြစ်ပွားခဲ့ကြောင်း မွန်ပြည်နယ်အစိုးရအဖွဲ့မှ တာဝန်ရှိသူက NP News ကိုပြောသည်။

KNLA၊ PDF ပူးပေါင်းအဖွဲ့သည် ယနေ့နံနက်ပိုင်းတွင် အလျား (၉၅)ပေ၊ အကျယ်(၃၆)ပေရှိသည့် သံကူကွန်ကရစ်တံတား အမျိုးအစားဖြစ်သော ကျုံအိပ်တံတားကို မိုင်းကပ်ကာ ဖောက်ခွဲဖျက်ဆီးခဲ့ခြင်းဖြစ် ကြောင်း အထက်ပါတာဝန်ရှိသူက ဆိုသည်။

“မနက် ၄ နာရီခွဲလောက်မှာ မိုင်းကပ်ပြီး ခွဲသွားတာပေါ့လေ။ အဲဒီတံတားက သထုံမြို့နယ် နှင့် ဘီးလင်းမြို့နယ်အစပ်မှာရှိတဲ့ တံတားပေါ့။ တံတားက သံကူကွန်ကရစ်တံတားပေါ့။ အကျယ်က ၃၆ ပေရှိတယ်။ ၂၄ ပေလောက် အောက်ကပွင့်ထွက်ပြီး ပျက်စီးသွားတယ်” ဟု မွန်ပြည်နယ်အစိုးရအဖွဲ့မှ တာဝန်ရှိသူက ပြောသည်။

ထိုသို့ ကျုံအိပ်တံတားအား မိုင်းခွဲဖျက်ဆီးခဲ့ပြီးနောက်ပိုင်းတွင် တံတားလမ်းပိုင်းအား အသုံးပြု မောင်းနှင်ခဲ့သော အိမ်စီး ကား(၂)စီးသည် အရှိန်လွန်ကာ တိမ်မှောက်ပျက်စီးသွားခဲ့ကြောင်း သိရသည်။

“ကားနှစ်စီးက သူက မနက် ၄ နာရီခွဲလောက်ဆိုတော့ မိုင်းခွဲပြီးတဲ့အချိန်မှာ အဲဒီကားနှစ်စီးက မသိဘူးနဲ့တူတယ်။ မောင်းတက်သွားတော့ အဲဒီမှာ ကျသွားတယ်။ တစ်ယောက်ကတော့ ဆုံးသွားတယ်” ဟု အထက်ပါတာဝန်ရှိသူက ထပ်မံပြောဆိုထားသည်။

အထက်ပါကဲ့သို့ တံတားအား မိုင်းခွဲဖျက်ဆီးပြီးနောက် ကားတိမ်းမှောက်သေဆုံးခဲ့ရသူသည် သထုံမြို့နယ်တွင် နေထိုင်သည့် အရပ်သားတစ်ဦးဖြစ်ကြောင်း သိရှိရသည်။

ကျုံအိပ်တံတားအား မိုင်းခွဲဖျက်စီးခံရမှုအခြေအနေနှင့်ပတ်သက်၍ ခရိုင်အုပ်ချုပ်ရေးအဖွဲ့နှင့် ဘီးလင်းမြို့နယ်အုပ်ချုပ်ရေးမှူးအဖွဲ့တို့သည် သွားရောက်ကြည့်ရှုစစ်ဆေးခဲ့ကြောင်း ထပ်မံသိရှိရသည်။

ထိုသို့ အုပ်ချုပ်ရေးမှူးနှင့်အဖွဲ့သည် တံတားအား သွားရောက်စစ်ဆေးကြည့်ရှု့စဉ်အချိန် နံနက် ၇ နာရီဝန်းကျင်ခန့်တွင် KNLA၊ PDF ပူးပေါင်းအဖွဲ့က Drop ဗုံးအပါအဝင် ရှော့တိုက်ဒုံးများဖြင့် ထပ်မံပစ်ခတ်တိုက်ခိုက်ခဲ့ကြောင်း သိရသည်။

“မနက် ၇ နာရီလောက်မှာ ခရိုင်အုပ်ချုပ်ရေးမှူးနဲ့အဖွဲ့ပေါ့လေ၊ နောက်ဘီးလင်းအုပ်ချုပ်ရေးမှူးတို့ သွားကြည့်တဲ့အခါမှာ Drop ဗုံးနဲ့ ပစ်တယ်။ အဲဒီမှာ ဒဏ်ရာတွေ၊ ဘာတွေ ရသွားတယ်။ ၄၊ ၅၊ ၆ ယောက်လောက်တော့ ဒဏ်ရာရသွားတယ်။ အသေးစိတ်တော့ မသိသေးဘူး။ သူတို့က Drop ဗုံးနဲ့ပစ်တဲ့အပြင် နောက် ရှော့တိုက်ဒုံးနဲ့ပါ ပစ်တယ်လို့ကြားတယ်။ အသေးစိတ်တော့ မသိရသေးဘူး။ ဒဏ်ရာရတာတွေကတော့ အဲဒီလို ခြေထောက်တွေ၊ ဗိုက်တွေမှာ အစလေးတွေ မှန်သွားတာတော့ ရှိတယ်”ဟု အထက်ပါတာဝန်ရှိသူက ဆက်လက်ပြောဆိုထားသည်။

အထက်ပါဖြစ်စဉ်နှင့်ပတ်သက်၍ KNLA၊ PDF ပူးပေါင်းအဖွဲ့က လုပ်ဆောင်ခြင်းဖြစ်ကြောင်းနှင့် ၎င်းအဖွဲ့များသည် ပြီးခဲ့သော ရက်ပိုင်းအတွင်းကလည်း ခြိမ်းခြောက်ပြောဆိုနေမှုများရှိကြောင်း ကြားသိရသည်ဟု ၎င်းက ထပ်မံပြောဆိုထားသည်။

လက်ရှိတွင် ကျုံအိပ်တံတား မိုင်းခွဲဖျက်ဆီးခံရပြီးနောက်ပိုင်း (၁၂)ပေ ကားများသာ ဖြတ်သန်းသွားလာနိုင်ကြောင်းသိရပြီး ဒေသခံပြည်သူများနှင့် လမ်းအသုံးပြုသွားလာနေသူများအတွက် အခက်အခဲများ ဖြစ်ပေါ်နေကြောင်း သိရှိရသည်။