မျိုးကြီး (NSS) - ဇွန် ၂၇

လက်ရှိ နစကလက်ထက်၌ အကျဉ်းသား (၆၂ဝဝဝ)ကျော်ကို လွတ်ငြိမ်းချမ်းသာခွင့်ပြုထားပြီး သေဒဏ်ကျခံနေရသည့် အကျဉ်းသား (၅၉)ဦးကိုလည်း ပြစ်ဒဏ်လျော့ပေါ့ပေးထားကြောင်း သတင်းရရှိသည်။

တပ်ချုပ် ဗိုလ်ချုပ်မှူးကြီးမင်းအောင်လှိုင် ဦးဆောင်သည့် နစကအစိုးရ (၂)နှစ်တာကာလအတွင်း၌ မုဒိန်းမှုနှင့် လူသတ်မှုမှအပ အခြားရာဇဝတ်မှု ကျူးလွန်ခြင်းများကို လွတ်ငြိမ်းခွင့်ပေးထားကြောင်း နစက၏ သတင်းအချက်အလက်များတွင် ဖော်ပြထားသည်။

မုဒိန်းမှုနှင့် လူသတ်မှုကို ကင်းလွတ်ခွင့်မပေးရခြင်းသည် ကျူးလွန်ခံရသူ မိသားစုများ၏ ဆန္ဒကို မျက် ကွယ်ပြုရန် မသင့်သည့်အတွက် ကင်းလွတ်ခွင့်မပေးရခြင်းဖြစ်ကြောင်း နစကမှ ဆိုထားသည်။

လက်ရှိတွင် နစကလက်ထက် (၂)နှစ်တာကာလအတွင်း၌ ပြစ်ဒဏ်ကျခံနေရသည့် အကျဉ်းသား (၆၂၈၁၈)ဦးကျော် လွတ်ငြိမ်းချမ်းသာခွင့်ပြုခဲ့ကြောင်း နစက၏ သတင်းအချက်အလက်များတွင် ဖော်ပြထားသည်။

ထို့ပြင် ၂ဝ၂၁ ခုနှစ်၊ ဖေဖော်ဝါရီလမှစ၍ ယနေ့အချိန်အထိ သေဒဏ်ကျခံနေရသည့် အကျဉ်းသားစုစု ပေါင်း (၅၉)ဦးကိုလည်း တစ်သက်တစ်ကျွန်းပြစ်ဒဏ်သို့ လျော့ပေါ့ပေးခဲ့ကြောင်းလည်း နစကဘက်က ပြောဆိုထားသည်။

သို့သော် လက်ရှိ နစကလက်ထက်၌ပင် သေဒဏ်ပြစ်ဒဏ်ချမှတ်ခြင်းခံခဲ့ရသည့် (၈၈) မျိုးဆက်ကျောင်း သားခေါင်းဆောင် တစ်ဦးဖြစ်သော ကိုဂျင်မီ၊ လွှတ်တော်အမတ်ဟောင်း ကိုဖြိုးဇေယျာသော်အပါအဝင် (၄)ဦးကို ပြစ်ဒဏ်စီရင်မှု ပြုလုပ်ခဲ့ဖူးသည်။

၎င်းတို့(၄)ဦးသည် အကြမ်းဖက်သတ်ဖြတ်မှုများကို ကျူးလွန်ရာတွင် စီစဉ်ညွှန်ကြားခြင်း၊ စီမံဆောင်ရွက်ခြင်း၊ ပူးပေါင်းကြံစည်ခြင်း၊ ကိုယ်တိုင်ပါဝင်ကျူးလွန်ခြင်းတို့ကြောင့် အပြစ်မဲ့ပြည်သူအများအပြားသေဆုံးခဲ့ရမှုအတွက် သက်ဆိုင်ရာ စစ်ခုံရုံးအသီးသီးက ကျူးလွန်သည့်ပြစ်မှုအလိုက် အကြမ်းဖက်မှုတိုက်ဖျက်ရေးဥပဒေပါ သက်ဆိုင်ရာပြဋ္ဌာန်းချက် ပုဒ်မများ၊ ရာဇသတ်ကြီး၏ သက်ဆိုင်ရာပြဋ္ဌာန်းချက်ပုဒ်မများဖြင့် စွဲချက်တင်ပြီး ပြစ်မှုထင်ရှားသဖြင့် သေဒဏ်ချမှတ်ခဲ့ခြင်းဖြစ်ကြောင်း နစကဘက်က ဆိုထားသည်။

အထက်ပါကဲ့သို့ သေဒဏ်ပြစ်ဒဏ် စီရင်မှုသည် မြန်မာနိုင်ငံ၌ နှစ်ပေါင်း(၃ဝ)ကျော်နောက်ပိုင်း လက်ရှိ နစကအစိုးရလက်ထက်တွင် ပထမဆုံးအကြိမ် ပြန်လည်ပြုလုပ်ခြင်းမျိုးဖြစ်ကြောင်း သိရသည်။

လက်ရှိအချိန်ထိ သေဒဏ်ပြစ်ဒဏ်ချမှတ်ခြင်းခံခဲ့ရသည့် အကျဉ်းသား (၅၉)ဦးသာရှိပြီး ၎င်းအကျဉ်းသားများကို တစ်သက် တစ်ကျွန်းပြစ်ဒဏ်သို့ လျော့ပေါ့ပေးထားကြောင်း နစကမှ ပြောဆိုထားသော်လည်း နိုင်ငံရေးအကျဉ်းသားများကူညီစောင့်ရှောက်ရေးအသင်းက အကျဉ်းထောင်များ၌ သေဒဏ်ချမှတ်ခံထားရသူသည် (၁၁၅)ဦး ရှိကြောင်း ထုတ်ပြန်ထားသည်ကိုလည်း တွေ့ရှိရသည်။