မြတ်မောင်ရွှေဆိုင် ဓါးပြတိုက်မှုကွင်းဆက်မှ တွံတေးမြို့ပြပြောက်ကျားအဖွဲ့၏ ဒုခေါင်းဆောင်အပါအဝင် (၁၇)ဦးကို ထပ်မံဖမ်းဆီးရမိခဲ့ဟု နစကထုတ်ပြန်
Pearl (NSS) - ဇွန် ၂၅
မြတ်မောင်ရွှေဆိုင် ဓါးပြတိုက်မှုကွင်းဆက်မှ တွံတေးမြို့ပြပြောက်ကျားအဖွဲ့၏ ဒုခေါင်းဆောင်အပါအဝင် (၁၇)ဦးကို ထပ်မံဖမ်းဆီးရမိခဲ့ကြောင်း နစကမှ ထုတ်ပြန်ထားသည်။
ပြီးခဲ့သည့် ဇွန်လ ၁၈ ရက်တွင် မြောက်ဥက္ကလာပမြို့နယ်ရှိ “မြတ်မောင်”စိန်ရွှေရတနာဆိုင်သို့ အကြမ်း ဖက်သမား ၃ ဦးမှ သေနတ်ပြခြိမ်းခြောက် ဓားပြတိုက်လုယက်သူများနှင့် ဆက်စပ်သူ အမျိုးသား ၈ ဦးနှင့် အမျိုးသမီး ၁ ဦး၊ စုစုပေါင်း ၉ ဦးတို့အား ယူဆောင်သွားသည့် ရွှေထည်ပစ္စည်းများ၊ လက်နက်/ခဲယမ်းမျိုးစုံတို့နှင့်အတူ ဖြစ်စဉ်ဖြစ်ပွားပြီး ၅ နာရီအတွင်း ဖမ်းဆီးရမိခဲ့ကြောင်း နစကမှ ထုတ်ပြန်ထားပြီးဖြစ်သည်။
ထို့ပြင် ဖမ်းဆီးရမိသူများအား စစ်ဆေးဖော်ထုတ်ချက်များအရ တွံတေးမြို့ပြပြောက်ကျား အမည်ခံအကြမ်းဖက်အဖွဲ့သည် တွံတေးမြို့နယ်နှင့် ရန်ကုန်မြို့အတွင်း အပြစ်မဲ့ပြည်သူများအားလုပ်ကြံသတ် ဖြတ်မှုများ နှင့် ဓားပြတိုက်လုယက်မှုများ ကျူးလွန်ထားကြောင်းသိရသည်။
ထို့နောက် ၎င်းတို့၏ထွက်ဆိုချက်အရ ဇွန်လ ၂ဝ ရက်တွင် တွံတေးမြို့ပြပြောက်ကျား အမည်ခံ အကြမ်း ဖက်အဖွဲ့ဝင်များဖြစ်သည့် ဆက်ပိုင်မျိုး၊ ဇော်မျိုးခန့်နှင့် ၎င်းတို့အားလက်ခံထားသည့် ကျော်သူဟိန်း၊ ဥက္ကာကျော်၊ မျိုးညွန့်အောင်တို့အား မြောက်ဥက္ကလာပမြို့နယ်၊ အမှတ်(၄)ရပ်ကွက်၊ ဝေဘာဂီလမ်းတွင် ထပ်မံဖမ်းဆီးရမိခဲ့ကြောင်း နစကမှ ဆိုသည်။
အလားတူ ဇွန်လ ၂၂ ရက်၊ ညနေပိုင်းတွင် ဓားပြတိုက်လုယက်မှုတွင်ပါဝင်ခဲ့သည့် ကျော်ဇင်ထိုက် (ခ)ကိုကြီးကျော် ၊ ဝီလျံထိုက်(ခ)ဝီလျံ ၊ ခိုင်ခန့်ဇော်(ခ)ရှမ်းလေးနှင့် ၎င်းတို့အား လက်ခံထားသည့် လှသိန်း(ခ)မူဆယ် တို့အား Sig Sauer ပစ္စတို ၁ လက်၊ Kuzey ပစ္စတို ၁ လက်၊ ပစ္စတိုကျည်အိမ် ၄ ခု၊ ၉ မမကျည် ၄၇ တောင့် တို့နှင့်အတူ ဖျာပုံမြို့နယ်၊ အပြောင်ကျေးရွာ၌ ဖမ်းဆီးရမိခဲ့ကြောင်း သိရသည်။
ထို့ပြင် ဇွန်လ ၂၃ ရက်၊ နံနက်ပိုင်းတွင် တွံတေးမြို့ပြပြောက်ကျားအဖွဲ့ ဒုတိယခေါင်းဆောင် ဆံရှည်(ခ) ကိုထက်(ခ) ထက်နိုင်ဦး နှင့် ၎င်းအားလက်ခံထားရှိပြီး လက်နက်/ခဲယမ်းများအား သိမ်းဆည်းပေးထားသည့် လှမျိုးဇော်(ခ) ချစ်ထူး ၊ မြင့်လွင်၊ သောရေမူး (ခ) ဖိုးသောကြာ၊ လဲပွဲမူး ၊ လယ်မူးနှင့် ငြိမ်းချမ်း (ခ)ပသီတို့အား Sig Sauer ပစ္စတို ၁ လက်၊ Pietro Beretta ပစ္စတို ၁ လက်၊ Beretta ပစ္စတို ၁ လက်၊ ပစ္စတိုကျည်အိမ် ၃ ခု၊ ၉ မမကျည် ၃၀ တောင့်၊ လက်ပစ်ဗုံး ၁ လုံး၊ လက်လုပ်ရှို့ပစ်ဗုံး ၂ လုံးတို့နှင့်အတူ တွံတေးမြို့နယ်၊ ရေကျော်စုကျေးရွာ၌ ဖမ်းဆီးရမိခဲ့ပြီး ယင်းနေ့ညနေပိုင်းတွင် အဖွဲ့ဝင် လေးမောင်မောင်(ခ)ရွှေကွန်းအား တွံတေးမြို့နယ်၊ ရေကျော်စုကျေးရွာရှိ ၎င်း၏နေအိမ်၌ ထပ်မံဖမ်းဆီးရမိခဲ့ကြောင်း သိရသည်။
ဖြစ်စဉ်တွင် အမျိုးသား ၂၄ ဦးနှင့် အမျိုးသမီး ၂ ဦး၊ စုစုပေါင်း ၂၆ ဦးတို့အား လက်နက်ငယ်မျိုးစုံ ၁ဝ လက်၊ ကျည်အိမ်မျိုးစုံ ၁၅ ခု၊ လက်ပစ်ဗုံးမျိုးစုံ ၅ လုံး၊ ကျည်မျိုးစုံ ၆၂၇ တောင့်တို့နှင့်အတူ ဖမ်းဆီးရမိခဲ့ကာ ဓားပြတိုက်လုယက်ယူဆောင်သွားသည့် ရွှေထည်ပစ္စည်းများအား ပြန်လည်သိမ်းဆည်းရမိခဲ့ကြောင်း သိရသည်။
တွံတေးမြို့ပြပြောက်ကျား အမည်ခံအကြမ်းဖက်အဖွဲ့ခေါင်းဆောင်သည် KNLA တပ်မဟာ(၆)လှုပ်ရှားနယ်မြေအတွင်း ခိုအောင်းလျက်ရှိသည့် ဖမ်းဆီးရန်ကျန် ချမ်းမြေ့အောင်ဖြစ်ပြီး ၎င်း၏ခိုင်းစေမှုဖြင့် လုပ်ကြံသတ်ဖြတ်မှု (၁ဝ)ကြိမ်၊ ဓားပြတိုက်မှု (၃)ကြိမ်ကျူးလွန်ခဲ့ကြောင်း ဇွန်လ ၂ဝ ရက်တွင် နစကမှ သတင်းထုတ်ပြန်ခဲ့သည်။
ထို့ပြင် ထပ်မံဖမ်းဆီးရမိခဲ့သည့် ဒုခေါင်းဆောင်ထက်နိုင်ဦး၏ ထွက်ဆိုချက်အရ လုပ်ကြံသတ်ဖြတ်မှု (၁ဝ)ကြိမ်၊ အကြမ်းဖက်ဖောက်ခွဲမှု(၁)ကြိမ် ထပ်မံကျူးလွန်ခဲ့ကြောင်း နစကမှထုတ်ပြန်ထားသည်။
ထို့ကြောင့် တွံတေးမြို့ပြပြောက်ကျားအမည်ခံ အကြမ်းဖက်အဖွဲ့အနေဖြင့် တွံတေးမြို့နယ်နှင့် ရန်ကုန်မြို့အတွင်း လုပ်ကြံသတ်ဖြတ်မှု (၂ဝ) ကြိမ်၊ ဓါးပြတိုက်လုယက်မှု (၃) ကြိမ်နှင့် အကြမ်းဖက်ဖောက်ခွဲမှု (၁)ကြိမ်၊ စုစုပေါင်းအကြမ်းဖက်လုပ်ဆောင်မှု (၂၄)ကြိမ်တို့အား ကျူးလွန်ခဲ့ကြောင်း ဖော်ထုတ်သိရှိရကြောင်း နစကမှ ဆိုသည်။
အထက်ပါ ဖမ်းဆီးရမိသူများအား ၎င်းတို့နှင့်ထိုက်တန်သည့် ပြစ်ဒဏ်များအား ဥပဒေအတိုင်း ထိရောက်စွာအရေးယူ ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
Super Custom ကားပေါ်မှ ငွေကျပ်သိန်း(၃ဝဝဝ) တန်ဖိုးရှိ စိတ်ကြွရူးသွပ်ဆေးပြားများသိမ်းဆည်းရမိ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ