NSS - ဇွန် ၂ဝ

၂ဝ၂၃ ခုနှစ်၏ ပထမ လေးလတာကာလအတွင်း မြန်မာနိုင်ငံတဝှမ်းမှာ မီးလောင်မှုအကြိမ်ရေ (၈ဝဝ) နီးပါးဖြစ်ပွားခဲ့ပြီး လူ (၅ဝ)ကျော်သေဆုံးခဲ့ကြောင်း မီးသတ်ဦးစီးဌာန၏ စာရင်းအချက်အလက်များအရ သိရသည်။

အဆိုပါ မီးလောင်မှုများ၏ ဆုံးရှုံးမှုတန်ဖိုးသည့် ငွေကျပ် (၁၁) ဘီလျံဝန်းကျင်ရှိခဲ့ကြောင်း မီးသတ်ဦးစီးဌာန၏စာရင်းများအရ သိရသည်။

မီးလောင်မှုများကြောင့် လူနေအိမ် အလုံးပေါင်း (၁၉ဝဝ)ဝန်းကျင်ပျက်စီးခဲ့ရပြီး စက်ရုံ၊ အလုပ်ရုံ (၆)လုံးနှင့် ဂိုဒေါင်အလုံးပေါင်း (၁၂ဝ)လည်းပျက်စီးခဲ့ကာ ပြည်သူ (၄၅၄၂)ဦး အိုးမဲ့အိမ်မဲ့ ဖြစ်ခဲ့ရကြောင်း သိရသည်။

မီးလောင်မှုကြောင့် ပြည်သူ (၁ဝ၁)ဦးလည်း ထိခိုက်ဒဏ်ရာရရှိခဲ့ပြီး တိရိစ္ဆာန် (၂၉၈၄)ကောင်လည်း သေဆုံးခဲ့ကြောင်းသိရသည်။

"အခုနှစ် ဇန်နဝါရီလကနေစပြီး ဧပြီလအထိ မီးလောင်တာ ၇၄၅ ကြိမ်ရှိခဲ့တယ်။ သေဆုံးက ၅၁ ယောက်ရှိတယ်။ဒဏ်ရာရသူတွေလည်းရှိပါတယ်။ မီးလောင်မှုကြောင့် ဆုံးရှုံးမှုက ငွေကျပ် ၁ဝ၈၉၆ ဒသမ ၁၄ဝ သန်း ရှိခဲ့တယ်"ဟု မီးသတ်ဦးစီးဌာနမှတာဝန်ရှိသူတစ်ဦးက ပြောသည်။

အဆိုပါ မီးလောင်မှုများတွင် နိုင်ငံရေးမတည်ငြိမ်မှုကြောင့် ဖြစ်ခဲ့သည့် ရှို့မီးဖြစ်စဥ်သည် အကြိမ်ရေ (၁ဝဝ)ကျော်ပါဝင်ပြီး ထင်းမီးဖိုကြောင့်လောင်ကျွမ်းမှု (၁၂၅)ကြိမ်၊ ပေါ့ဆမီးကြောင့်လောင်ကျွမ်းမှု (၂၁၃) ကြိမ်၊ လျှပ်စစ်မီးမှတဆင့်လောင်ကျွမ်းမှု အကြိမ်ရေ (၂ဝဝ)ဝန်းကျင်၊ အလိုအလျောက်လောင်ကျွမ်းမှု (၁၅)ကြိမ် ၊ တောမီးလောင်မှု (၈၇)ကြိမ်၊ မိုးကြိုးပစ်မှုကြောင့် လောင်ကျွမ်းမှု(၂)ကြိမ်ပါဝင်ကြောင်းသိရသည်။

ပြီးခဲ့သည့် ၂ဝ၂၂ ခုနှစ်တွင် မြန်မာနိုင်ငံ၌ မီးလောင်မှု (၁၅ဝ၇)ကြိမ်ဖြစ်ပွားခဲ့ပြီး (၉၆)ဦးသေဆုံးခဲ့ကာ (၁၃၉) ဦးဒဏ်ရာရရှိခဲ့ကြောင်း သိရသည်။ အဆိုပါ မီးလောင်မှုများ၏ ဆုံးရှုံးမှုတန်ဖိုးသည် ငွေကျပ် (၆၇)ဘီလျံကြောင်း မီးသတ်ဦးစီးဌာန၏ ထုတ်ပြန်ချက်အရ သိရသည်။

အလားတူ ၂ဝ၂၁ ခုနှစ်အတွင်း နိုင်ငံတဝှမ်းမီးလောင်မှု (၂၁ဝ၇)ကြိမ်ဖြစ်ပွားခဲ့ပြီး ငွေကျပ် (၃၃)ဘီလျံကျော်ဆုံးရှုံးကာ လူပေါင်း(၁ဝ၅)ဦးသေဆုံးခဲ့ပြီး ထိခိုက်ဒဏ်ရာရသူ (၁၅၁)ဦး ရှိခဲ့ကြောင်းသိရသည်။

၂ဝ၂ဝ ခုနှစ်တွင်မူ နိုင်ငံတဝှမ်းမီးလောင်မှု (၂၁၃၉)ကြိမ်ဖြစ်ပွားခဲ့ပြီး (၇၅)ဦးသေဆုံးကာ ထိခိုက်ဒဏ်ရာရသူ (၂၂ဝ)ဦးရှိခဲ့ကြောင်း သိရသည်။  အဆိုပါ မီးလောင်မှုများကြောင်း ငွေကျပ် (၆)ဘီလျံကျော် ဆုံးရှုံးခဲ့ကြောင်းသိရသည်။