Pika (NSS) - ဇွန် ၂ဝ 

ထိုင်းနိုင်ငံ ပတ္တရားမြို့တွင် ဇွန်လ(၁၉)ရက်က ကျင်းပခဲ့သော မြန်မာနိုင်ငံအရေးအလွတ်သဘောဆွေးနွေးပွဲသည် အကျိုးရှိခဲ့ပြီး ပါဝင်တက်ရောက်ခဲ့သော ခေါင်းဆောင်များသည် ယင်းကဲ့သို့သော ဆွေးနွေးမှုများကို ပိုမိုလိုလားကြ ကြောင်း ထိုင်းနိုင်ငံခြားရေးဝန်ကြီးဒွန်ပရာဝီနိုင်း က ပြောကြားခဲ့သည်။

ဒွန်ပရာဝီနိုင်း က "အစည်းအဝေးအတွင်း ပြောဆိုဆွေးနွေးမှုတွေက ကောင်းမွန်တဲ့အခြေအနေမှာရှိပါတယ်။ ထိုင်းနိုင်ငံအနေနဲ့ ဒီလိုဆွေးနွေးပွဲတွေ နောက်ထပ်လုပ်ပေးဖို့ ပါဝင်တက်ရောက်သူတွေကလည်း လိုလားကြပါ တယ်။ အလွတ်သဘောဆွေးနွေးမှုတွေဟာ ပြဿနာတွေကိုဖြေရှင်းနိုင်တဲ့နည်းလမ်းတစ်ခုပါ။ ထိုင်းက အရင်တုန်း က ဆွေးနွေးပွဲနှစ်ကြိမ် ကျင်းပဖူးပါတယ်။ အဲဒီဆွေးနွေးပွဲတွေက အကျိုးရှိခဲ့ပါတယ် ပြီးတော့ အရင်တုန်းက ဆွေးနွေးပွဲကို တက်ရောက်ခဲ့တဲ့သူတွေက ထပ်ပြီးမတက်ရောက်ကြတော့ပါဘူး။ နောက်ဆုံးဆွေးနွေးမှုမှာ အရင်က မဆွေးနွေးခဲ့ရတဲ့ကိစ္စတွေ ပေါ်ပေါက်လာပြီး ယခင်အစည်းအဝေးထက် ပါဝင်တက်ရောက်သူ ပိုမိုများပြားလာပါ တယ်" ဟု ပြောဆိုခဲ့သည်။

အဆိုပါအစည်းအဝေးကို မြန်မာနှင့်နယ်နိမိတ်ချင်းထိစပ်နေသော တရုတ်နှင့်အိန္ဒိယတို့ အပါအဝင် နိုင်ငံ(၇)နိုင်ငံမှ ကိုယ်စားလှယ်များတက်ရောက်ခဲ့ကြောင်း ၎င်းက ပြောကြားခဲ့သည်။ ထိုင်းနိုင်ငံသည် မြန်မာနိုင်ငံနှင့် ကီလိုမီတာ (၂ဝဝဝ)ကျော် နယ်နိမိတ်ချင်းထိစပ်နေပြီး မြန်မာနိုင်ငံတွင်ဖြစ်ပွားနေသော ပြဿနာများကိုဖြေရှင်းရန်အတွက် ကြိုးပမ်းအားထုတ်မှုများသည် မနှောင့်နှေးသင့်ကြောင်း ဒွန်ပရာဝီနိုင်းက ပြောကြားခဲ့သည်။

ဒွန်ပရာဝီနိုင်း က "တစ်ခြားအာဆီယံအဖွဲ့ဝင်နိုင်ငံတွေဟာ မြန်မာနိုင်ငံနဲ့ ရှည်လျားတဲ့နယ်နိမိတ်မျဉ်း ထိစပ်တာမျိုး မရှိပါဘူး။ ဒါကြောင့် မြန်မာနိုင်ငံမှာဖြစ်ပွားနေတဲ့ပြဿနာတွေကို အမြန်ဆုံးဖြေရှင်းဖို့ နည်းလမ်းတွေရှာဖို့ လိုအပ် တယ်ဆိုတာနဲ့ပတ်သက်ပြီး သူတို့က စိုးရိမ်မှုမရှိကြတာပါ။ ဆွေးနွေးပွဲကို ထိုင်းနိုင်ငံရဲ့ အကောင်းဆုံးအကျိုးစီးပွား အတွက် စီစဉ်တာမျိုးဖြစ်ပေမယ့် အားလုံးက အဲဒီကိစ္စကို လျစ်လျူရှုထားပြီး မြန်မာနိုင်ငံအရေးကို အာဆီယံကပဲ ဦးဆောင်သင့်တယ်ဆိုတဲ့သဘောထားကို ခံယူထားကြပါတယ်။ မြန်မာနိုင်ငံအရေးဟာ ထိုင်းနယ်စပ်ကုန်သွယ်ရေး နဲ့ စီးပွားရေးကို ထိခိုက်စေပါတယ်။ မြန်မာနိုင်ငံမှာရှိတဲ့ လိမ်လည်လှည့်ဖြားတဲ့အုပ်စုတွေဟာ နိုင်ငံအတော်များများ က လူတွေကို လိမ်လည်နေကြပါတယ်။ ထိုင်းနိုင်ငံသားတွေဟာ  တရားမဝင်တဲ့အလုပ်တွေအတွက် နယ်စပ် ဖြတ်ကျော်မှုတွေ လုပ်ဆောင်နေပြီး မူးယစ်ဆေးဝါးတွေနဲ့ အခြားတရားမဝင်ထုတ်ကုန်ပြဿနာတွေလည်း ရှိနေပါတယ်" ဟု ပြောဆိုခဲ့သည်။

(၂ဝ၂၂)ခုနှစ် အာဆီယံအလှည့်ကျဥက္ကဋ္ဌ ကမ္ဘောဒီးယားအစိုးရလက်ထက်တွင် အာဆီယံအဖွဲ့ဝင်အားလုံးသည် မတူညီသော အချိန်အခါ၊ပုံစံအမျိုးမျိုးဖြင့် မြန်မာနိုင်ငံအရေးအား အောင်မြန်စွာဖြေရှင်းရန်နည်းလမ်းများကို အတူတကွ ပူးပေါင်းဆောင်ရွက်သင့်ကြောင်း ကြေညာချက်ထုတ်ပြန်ခဲ့ဖူးသည်။ ဇွန်လ(၁၉)ရက်က ကျင်းပခဲ့သော အစည်းအဝေးတွင် ပါဝင်တက်ရောက်ခဲ့သူများသည် ရလဒ်များကို လူသိရှင်ကြားမဖော်ပြသင့်ဟု သဘောတူညီ ခဲ့ကြပြီး ၎င်းတို့အနေဖြင့် အဆုံးအဖြတ် (သို့မဟုတ်) သဘောတူညီချက်တစ်စုံတစ်ရာမှ မရရှိခဲ့ကြောင်း ဒွန်ပရာဝီနိုင်း က ပြောကြားခဲ့သည်။

၎င်းက "ဒီဆွေးနွေးပွဲက အကျိုးရှိတယ်ဆိုတာ သက်ဆိုင်သူတွေကို သိစေချင်ကြတာပါ။ ပြီးတော့ ကျွန်တော်တို့ ဒီလိုအစည်းအဝေးတွေကိုလည်း ပိုပြီး ကျင်းပသင့်ပါတယ်။ မြန်မာနိုင်ငံဟာ အဆိုပြုထားတဲ့ဖြေရှင်းချက်တွေကို တိုးတက်အောင် ကြိုးစားနေပါတယ်" ဟု ပြောဆိုခဲ့သည်။