NSS - ဇွန် ၂ဝ

ရန်ကုန်တိုင်း၊ မြောက်ဥက္ကလာပမြို့နယ်ရှိ မြတ်မောင်ရွှေဆိုင်အား ဓါးပြတိုက်မှုတွင် ပါဝင်သူ(၉)ဦးကို လက်နက်ခဲယမ်းအများအပြားနှင့်အတူ (၅)နာရီအတွင်း ပြန်လည်ဖမ်းဆီးရမိခဲ့ကြောင်း သတင်းရရှိသည်။

မြတ်မောင်ရွှေဆိုင် ဓါးပြတိုက်ခံရမှုနှင့်ပတ်သက်၍ ဖမ်းဆီးရမိအခြေအနေအား နစကမှ ယမန်နေ့(ဇွန်လ ၁၉ ရက်) ညပိုင်းက အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ပြီးခဲ့သည့် ဇွန်လ ၁၈ ရက် ညနေပိုင်းတွင် မြောက်ဥက္ကလာပမြို့နယ်၊ (ဈ)ရပ်ကွက်၊ မေဒါဝီလမ်းရှိ မြတ်မောင်စိန်ရွှေရတနာဆိုင်သို့ အကြမ်းဖက်သမား(၃)ဦးက ပစ္စတို (၂)လက်ကိုင်ဆောင်ကာ မော်တော်ဆိုင် ကယ်ဖြင့် ရောက်ရှိလာပြီးနောက် သေနတ်ပစ်ဖောက်ဓါးပြတိုက်ခဲ့ခြင်းဖြစ်သည်။

၎င်းအကြမ်းဖက်သမား(၃)ဦးသည် မြတ်မောင်စိန်ရွှေရတနာဆိုင်မှ ငွေကျပ်သိန်း (၁၆၆ဝဝ)ခန့် တန်ဖိုးရှိ သည့် ရွှေထည်ပစ္စည်းမျိုးစုံကို ဓါးပြတိုက်လုယက်ယူဆောင်သွားခဲ့ကြောင်း နစကမှ ဆိုသည်။

ထို့နောက် လုံခြုံရေးတပ်ဖွဲ့ဝင်များအနေဖြင့် ဓါးပြတိုက်မှုကျူးလွန်သူများကို ဖမ်းဆီးရမိရေးအတွက် ဆောင်ရွက်ရာ၌ ပြည်သူများ၏ မျက်မြင်သတင်းပေးပို့ချက်များနှင့် မြေပြင်သတင်းစုံစမ်းမှုများအရ ဇွန်လ ၁၈ ရက်ညပိုင်းတွင် ဓါးပြတိုက်လုယက်မှုတွင်ပါဝင်သည့် ကိုကိုအောင်နှင့် ၎င်းနှင့်တရားမဝင်ပေါင်းသင်းနေသူ ပပလှိုင်တို့ကို ဗဟန်းမြို့နယ်၊ ငါးထပ်ကြီးဘုရားအနောက်ရပ်ကွက်၊ ရွှေဂုံတိုင်လမ်းရှိ အကယ်ဒမီဟိုတယ်၌ ဖမ်းဆီးရမိခဲ့ကြောင်း သိရသည်။

ထိုသို့ ဖမ်းဆီးရမိသည့် ကိုကိုအောင်၏ ထွက်ဆိုချက်အရ ရွှေဆိုင်ဓါးပြတိုက်မှုတွင် ပါဝင်ခဲ့သည့် ကောင်းထက်စံ(ခ)တရုတ်ကြီးကို မြောက်ဥက္ကလာပမြို့နယ်၊ ဝေဘာဂီ(၂)ရပ်ကွက်၊ နဝရတ်လမ်းရှိ ၎င်း၏ နေအိမ်၌ ထပ်မံဖမ်းဆီးရမိခဲ့ကြောင်း နစက၏ သတင်းထုတ်ပြန်ချက်တွင် ဖော်ပြထားသည်။

ဆက်လက်ပြီး ဓါးပြတိုက်မှုတွင် ပါဝင်ခဲ့သော ကျော်ဇင်လတ်၊ ကောင်းမြတ်(ခ) Blank၊ ဖြိုးကိုကိုနှင့် ကျော်ဇင်ဝေတို့ကိုလည်း မြောက်ဥက္ကလာပမြို့နယ်၊ ဝေဘာဂီ (၅)ရပ်ကွက်၊ ဗြဟ္မစိုရ်လမ်း၊ တိုက်အမှတ် (၁ဝ၁)၌ M4A1 သေနတ် (၂)လက်၊ Sig Sauer ပစ္စတို (၂) လက်၊ ကျည်အိမ်မျိုးစုံ (၈) ခု၊ 91 လက်ပစ်ဗုံး (၂) လုံး၊ ၅.၅၆ ကျည် (၃၄ဝ)တောင့်၊ 9 MM Luger ကျည် (၂၁ဝ)တောင့်၊ ဓားပြတိုက်လုယက်ရာမှ ယူဆောင်သွားခဲ့သော ရွှေထည်ပစ္စည်းများနှင့်အတူ ထပ်မံဆီးရမိခဲ့ကြောင်း သိရသည်။

၎င်းအပြင် ဖမ်းဆီးရမိသည့် ကိုကိုအောင်၏ ထွက်ဆိုချက်အရ ရွှေဆိုင်ဓါးပြတိုက်ရာတွင် ပါဝင်ခဲ့သော စောဂျိုးဇက်(ခ)ချိုတိုး နှင့် ထွန်းထွန်းနိုင်တို့ကိုလည်း ဧရာဝတီတိုင်း၊ မအူပင်မြို့နယ်၊ ခနောင်အုပ်စု၊ ကျွဲလန်းကျေးရွာ၌ M-16 သေနတ် (၁)လက်နှင့်အတူ ဆက်လက်ဖမ်းဆီးရမိခဲ့ကြောင်း နစကမှ ဆိုသည်။

ထို့ကြောင့် မြတ်မောင်ရွှေဆိုင် ဓါးပြတိုက်ခံရမှုဖြစ်စဉ်အတွင်း အမျိုးသား(၈)ဦးနှင့် အမျိုးသမီး(၁)ဦး စုစု ပေါင်း (၉)ဦးအား လက်နက်ခဲယမ်းများနှင့်အတူ ရွှေထည်ပစ္စည်းများကို အခင်းဖြစ်ပွားပြီး (၅)နာရီအတွင်း ပြန်လည်ဖမ်းဆီးရမိခဲ့ကြောင်း နစကမှထုတ်ပြန်ထားသည်။

လက်ရှိတွင် မြန်မာနိုင်ငံအတွင်းရှိ မြို့ကြီးများ၌ ဓါးပြတိုက်ခံရသည့် စိန်ရွှေလက်ဝတ်ရတနာဆိုင်အများအပြားရှိနေမှုနှင့်အတူ နစက၏ တရားဥပဒေစိုးမိုးရေးလုပ်ငန်းများအပေါ်တွင်လည်း မေးခွန်းထုတ်ဝေဖန်မှုများ ရှိနေသည်ကို တွေ့ရှိရသည်။