Pika (NSS) - စက်တင်ဘာ ၁ဝ

လုံခြုံရေးခြိမ်းခြောက်မှုအသစ်များနှင့် ရင်ဆိုင် နေရချိန်တွင် တပ်ဖွဲ့များကို ပိုမိုအားကောင်းလာ စေရန်အတွက် လာမည့်နှစ်တွင် ကာကွယ်ရေး အသုံးစရိတ်ကို (၁၀)ရာခိုင်နှုန်းကျော် တိုးမြှင့်သွားမည်ဖြစ်ကြောင်း နယ်သာလန်အစိုးရက ပြောကြားခဲ့သည်။အဆိုပါကာကွယ်ရေးအသုံးစရိတ်ကို တင့်ကားအသစ်များ၊ တိုက်လေယာဉ်များ၊ ဖရီးဂိတ်သင်္ဘောများနှင့် လေကြောင်းရန်ကာကွယ်ရေးစနစ်များတွင် ရင်းနှီးမြှုပ်နှံသွားမည်ဖြစ် ကြောင်း နယ်သာလန်အစိုးရက ပြောကြားခဲ့သည်။

ကာကွယ်ရေးအသုံးစရိတ်ကို နောက်ထပ် ယူရို(၂ ဒသမ ၄)ဘီလျံတိုးမြှင့်ကာ စုစုပေါင်းယူရို(၂၄)ဘီလျံထိ သုံးစွဲသွားမည်ဖြစ်ကြောင်းလည်း နယ်သာ လန်အစိုးရကပြောကြားခဲ့သည်။ ကာကွယ်ရေးဝန်ကြီး Ruben Brekelmans  က "ခြိမ်းခြောက်မှု အသစ်တွေကို တုံ့ပြန်ဖို့အတွက် အစီ အစဉ်တွေ လုပ်ဆောင်သွားမှာပါ။ ယူကရိန်းအပေါ် ရုရှားရဲ့ကျူးကျော်တိုက်ခိုက်မှုက နေတိုးအဖွဲ့ဝင်တွေအပေါ် တိုက်ခိုက်လာနိုင်တယ်ဆိုတာကို လည်း ပြသနေတာပဲဖြစ်ပါတယ်"ဟုပြောဆိုခဲ့သည်။

ထို့ပြင် တရုတ်၊ အီရန်၊ အကြမ်း ဖက်အဖွဲ့များနှင့် ဆိုက်ဘာတိုက် ခိုက်မှုများသည် နယ်သာလန်နိုင်ငံ၏အမျိုးသားလုံခြုံရေးကို ခြိမ်းခြောက် လာနိုင်ကြောင်းလည်း Ruben Brekelmans ကပြောကြားခဲ့သည်။ ၎င်းက "ကျွန် တော်တို့ ငြိမ်းငြိမ်းချမ်းချမ်းနေထိုင်နေပေမယ့် အဲဒါက ကြာရှည်ခံတော့မယ့် ကိစ္စမဟုတ်တော့ပါဘူး။ ကျွန်တော်တို့ နေ့တိုင်းတိုက်ခိုက်မှုတွေကို ခံနေရတာပါ။ ကျွန်တော်တို့ရဲ့ ဒီဂျစ်တယ်စနစ်တွေ၊ တက္ကသိုလ်တွေ၊ ကုမ္ပဏီတွေ၊ ဆိပ်ကမ်းတွေ၊ လျှပ်စစ်ဓာတ်အားလိုင်းတွေက နေ့တိုင်းတိုက်ခိုက်ခံနေရပြီး အဲဒီလိုတိုက်ခိုက်မှုအရေအတွက်ကလည်း တိုးပွားလာနေပါတယ်"ဟု ပြောဆိုခဲ့သည်။

တိုးမြှင့်မည့်ကာကွယ်ရေးအသုံးစရိတ်အသစ်သည် နယ်သာလန်စစ် တပ်ကို ဆယ်စုနှစ်တစ်ခုကျော်အတွင်း ပထမဆုံးအကြိမ်အဖြစ် တင့်ကားများ ထောက်ပံ့ပေးမည်ဖြစ်ပြီး F-35 တိုက်လေယာဉ်များ၊ ဖရီးဂိတ်သင်္ဘောများ၊ ရဟတ်ယာဉ်များ၊ ဒရုန်းများ၊ လေကြောင်းရန်ကာကွယ်ရေးစနစ်များနှင့် ခဲယမ်းမီးကျည်များဝယ်ယူရန်အတွက်လည်း အသုံးပြုသွားမည်ဖြစ် ကြောင်း နယ်သာလန်အစိုးရကပြောကြားခဲ့သည်။