Pika (NSS) - ဩဂုတ် ၂၉

ဟောလိဝုဒ်ကြယ်ပွင့်သရုပ်ဆောင် ခရစ်ဟမ်းစ်ဝါ့တ်သည် ရိုမေးနီးယားနိုင်ငံတွင် ကျင်းပသော အဆိုတော် Ed Sheeran ၏ဖျော်ဖြေပွဲတွင် ဒရမ်တီးကာ တီးဝိုင်းတစ်ခုနှင့်အတူပါဝင်ဖျော်ဖြေခဲ့ပြီးနောက် ပရိသတ်များကို အံ့အားသင့်စေခဲ့ကြောင်းသိရသည်။ 

Marvel စကြာဝဋ္ဌာတွင် Thor ဇာတ်ကောင်အဖြစ် သရုပ်ဆောင်ခဲ့သော အသက်(၄၁)နှစ်အရွယ် ခရစ်ဟမ်းစ်ဝါ့တ်သည် ဂီတတူရိယာတစ်ခုကို လေ့လာသင်ယူခဲ့ပြီးနောက် အဆိုတော် Ed Sheeran နှင့်အတူ ယခုကဲ့သို့ပူးပေါင်းဖျော်ဖြေကာ ပရိသတ်များကို အံ့အားသင့်အောင်လုပ်ဆောင်ခဲ့ခြင်းဖြစ်ကြောင်းသိရသည်။ ခရစ်ဟမ်းစ်ဝါ့တ်သည် Bucharest မြို့ National Arena တွင်ကျင်းပသော ဖျော်ဖြေပွဲတွင် ပရိသတ်(၆)သောင်းဝန်းကျင်အတွက် "Thinking Out Loudသီချင်းကို ဖျော်ဖြေနေသော Ed Sheeran နှင့်အတူ ယခုကဲ့သို့ပူးပေါင်းကာ ဖျော်ဖြေခဲ့ခြင်းဖြစ်သည်။ 

Ed Sheeran က 'ခရစ်ဟမ်းစ်ဝါ့တ်က တကယ်ကို အံ့ဩဖို့ကောင်းတဲ့လူတစ်ယောက်ပါ။သူက ကျွန်တော်တို့တီးဝိုင်းထဲမှာ နေရာတစ်ခုကို အမြဲရသင့်တယ်လို့ ကျွန်တော်ထင်ပါတယ်'ဟု ချီးကျူးပြောဆိုခဲ့သည်။ အဆိုပါပူးပေါင်းဖျော်ဖြေမှုများနှင့်ပတ်သက်ပြီး ပရိသတ်များက အပြုသဘောဆောင်သော မှတ်ချက်များစွာကို ပေးခဲ့ကြကြောင်းလည်းသိရသည်။

ပရိသတ်တစ်ဦးက 'ဒါက ရူးသွပ်စရာကောင်းတဲ့ကိစ္စတစ်ခုပါ။ ဒီလိုအံ့အား သင့်အောင်လုပ်ဆောင်ပေးခဲ့တဲ့အတွက် တကယ်ကိုကျေးဇူးတင်ပါတယ်။အရမ်းသဘောကျခဲ့ရတဲ့ အဆိုတော် Ed Sheeran ရဲ့ဖျော်ဖြေပွဲမှာရှိနေတဲ့အချိန်မှာ Thorဇာတ်ကောင်သရုပ်ဆောင်ခရစ်ဟမ်းစ်ဝါ့တ်က ဒရမ်တီးတဲ့သူအဖြစ် တစ်ချိန်လုံးပါဝင်နေခဲ့တာကို သိလိုက်ရတာက အကောင်းဆုံးအခိုက်အတန့်တစ်ခုပါပဲ'ဟု အင်စတာဂရမ်တွင် ရေးသားခဲ့သည်။