မူဆယ်မြို့တွင် ဓားပြမှု၊ ပြန်ပေးဆွဲမှုများ များပြားလာသည့်အတွက် ဒေသခံများစိုးရိမ်ပူပန်မှုများဖြစ်ပေါ်နေ
NSS - ဧပြီ ၂၂
ရှမ်းပြည်နယ်မြောက်ပိုင်း၊ မြန်မာ-တရုတ်နယ်စပ်၊ မူဆယ်မြို့တွင် ဓားပြမှု၊ ပြန်ပေးဆွဲမှုများများပြားလာသည့်အတွက် ဒေသခံများအနေဖြင့် စိုးရိမ်ပူပန်မှုများဖြစ်ပေါ်နေကြောင်း ဒေသခံများထံမှ သိရသည်။
မူဆယ်မြို့၌ ဓားပြမှုနှင့် ပြန်ပေးဆွဲမှုများကျူးလွန်နေသည့် ဂိုဏ်းအဖွဲ့များမှာ (၅)ဖွဲ့ထက်မနည်းရှိပြီး အဆိုပါဂိုဏ်းအဖွဲ့များ၏ အကြမ်းဖက်လုယက်၊ ပြန်ပေးဆွဲမှုများကြောင့် ဒေသခံများအနေဖြင့် စိုးရိမ်ပူမှုများဖြစ်ပေါ်နေကြောင်း သိရသည်။
“ဒီမှာကတော့ ဘယ်သူမှလုပ်ငန်းထဲမှာမနေရဲကြတော့ဘူး။ လုပ်ငန်းထဲမှာနေရင် ဘယ်အချိန်ပြန်ပေးဆွဲခံရမလဲ စိုးရိမ်ပူပန်နေကြရတာပေါ့။ အခုက ကလေးရောလူကြီးရော မရွေးဘူးပြန်ပေးဆွဲနေကြတာ။ ဌာနဆိုင်ရာဝန်ထမ်းတွေကအစ ပြန်ပေးဆွဲခံနေကြရတာ”ဟု မူဆယ်မြို့ခံတစ်ဦးက NSS ကိုပြောသည်။
ထို့ပြင် ပြီးခဲ့သည့် ဧပြီလ ၂၀ ရက်၊ ညနေပိုင်းက မူဆယ်မြို့တွင် အဖွဲ့ဝင်(၉)ဦးပါဝင်သော ပြန်ပေးဆွဲဂိုဏ်းတစ်ခုကို တပ်မတော်နှင့် ပြည်သူ့စစ်အဖွဲ့က ဖမ်းဆီးနိုင်ခဲ့ကြောင်း သိရသည်။ ထို သို့ ဖမ်းဆီးရမိသည့် ပြန်ပေးဆွဲဂိုဏ်းတွင် အသက်(၁၇)နှစ်မှ အသက်(၃၀)ကြားရှိလူငယ်များပါဝင်ပြီး ဂိုဏ်းအဖွဲ့၏ခေါင်းဆောင်နှင့် ကွင်းဆက်ကျူးလွန်သူများကို ဆက်လက်ဖမ်းဆီးအရေးယူနိုင်ရေး စစ်ဆေးလျက်ရှိကြောင်း သိရသည်။
“မူဆယ်မြို့မှာ ပြန်ပေးဆွဲမှုတွေဖြစ်လို့ CCTV တွေကနေကြည့်လိုက်ရင် စက်မှုကနေမန်းမိုင်သွားတဲ့လမ်းမှာပျောက်ပျောက်သွားတယ်လို့ ပြနေတဲ့အတွက် အဲဒီလမ်းမှာရှိတဲ့ ခြံဝန်းတစ်ခုကို တပ်မတော်နဲ့ပြည်သူ့စစ်ကဝင်ရှာပြီး ဖမ်းတဲ့အခါမှာ မိတာပေါ့။ အဲဒါနဲ့ပဲ အနီးမှာရှိတဲ့ (၉၉)တပ်မကိုပို့ပြီး ဦးဆောင်စစ်ဆေးနေတယ်လို့သိရတယ်” ဟု ၎င်းကဆက်လက်ပြောသည်။
လက်ရှိတွင် အဆိုပါဖမ်းဆီးခံထားရသည့် ပြန်ပေးဆွဲဂိုဏ်းအဖွဲ့ဝင်(၉)ဦးကို မူဆယ်မြို့ရှိ တပ်မ(၉၉)အတွင်း၌ ဖမ်းဆီးစစ်ဆေးလျက်ရှိကာ ကွင်းဆက်ကျူးလွန်သူများကို ဖော်ထုတ်ဖမ်းဆီးနိုင်ရေးအတွက် စစ်ဆေးအရေးယူလျက်ရှိကြောင်း သိရသည်။
ထို့ပြင် မူဆယ်မြို့တွင် လောင်းကစား နှင့် မူးယစ်ဆေးဝါးများ များစွာရရှိနေသည့်အတွက် လူငယ်များအနေဖြင့် လောင်းကစားနှင့် မူးယစ်ဆေးဝါးသုံးစွဲရန်အတွက် ဓားပြမှုနှင့် ပြန်ပေးဆွဲမှုများကို ပိုမိုကျူးလွန်လာခြင်းဖြစ်ကြောင်း မြို့ခံအချို့က သုံးသပ်ထားကြသည်။
“အဓိက ကတော့ ဒီက KTV တွေမှာမူးယစ်ဆေးဝါးလွယ်လွယ်ကူကူရောင်းနေတယ်။ လောင်း ကစားဝိုင်းတွေက ပေါ်ပေါ်ထင်ထင်လုပ်နေတယ်။ အဲဒါတွေက အဓိကရေသောက်မြစ်ပေါ့လေ။ နောက်ပြီး လူငယ်တွေက KTV သွားရင် ကေရှူတယ်။ မူးယစ်ဆေးဝါး သုံးစွဲတယ်။ အဲဒီအတွက်ငွေတွေလိုတယ်။ ငွေလိုတော့ လူငယ်တွေက အခုလိုငွေလွယ်လွယ်ကူကူရတဲ့ဘက်ကိုရောက်သွားတာပေါ့။ အဲဒါကြောင့် KTV တွေမှာ မူးယစ်ဆေးဝါးပေါ်ပေါ်ထင်ထင်ရောင်းချနေတာတို့ လောင်းကစားပေါ်ပေါ်ထင်ထင်လုပ်နေတာတွေကို ထိန်းချုပ်နိုင်ရင် ဒီလိုမျိုးဖြစ်စဉ်တွေက တော်တော်လျော့သွားမှာပါ” ဟု ၎င်းကဆက်လက်ပြောသည်။
အလားတူ ပြီးခဲ့သည့် ဧပြီလ ၉ ရက်တွင် မူဆယ်မြို့၊ အမှတ်(၂)ရပ်ကွက်၊ စည်ပင်သာယာဈေးအနီးရှိ ဆေးခန်းတစ်ခုမှ ဒေါက်တာ မိုးကျော်အောင်ကို လက်နက်ကိုင်လူငယ်(၄)ဦးက ဖမ်းဆီးခေါ်ဆောင်သွားကာ ငွေကျပ်သိန်း(၁၅၀၀)တောင်းယူခဲ့ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
သီရိလင်္ကာနိုင်ငံတွင် ကားပြိုင်ပွဲတစ်ခုအတွင်း ပြိုင်ကားတစ်စီးက လူအုပ်ကြီးကို ဝင်တိုက်မိခဲ့ရာ အနည်းဆုံး လူ(၇)ဦး သေဆုံးပြီး (၂ဝ)ကျော် ထိခိုက်ဒဏ်ရာရရှိ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ