သန့်ဇင် (NSS) - မတ် ၂၁

နေပြည်တော်၊ ဇေယျာသီရိမြို့နယ်၊ ရန်ကုန်-မန္တလေးလမ်းဟောင်းတွင် ဆိုင်ကယ်မောင်းနေစဉ်ဖုန်းပြောရာမှ ရပ်ထားသည့်တွဲကားကို ဝင်တိုက်မိ၍ အမျိုးသားတစ်ဦးပွဲချင်းပြီး သေဆုံးသွားခဲ့ကြောင်း ကရုဏာရှင်လူမှုကူညီရေးအသင်းထံမှ သိရသည်။

ယာဉ်တိုက်မှုသည် ယမန်နေ့(မတ်လ ၂၀ ရက်)၊ ည ၁၀နာရီခွဲဝန်းကျင်အချိန်တွင် ဇေယျာသီရိမြို့နယ်၊ ရန်ကုန်-မန္တလေးလမ်းဟောင်း၊ နိဗ္ဗာန်လမ်းဆုံအနီး၌ ဖြစ်ပွားခဲ့ခြင်း ဖြစ်ကြောင်း သိရသည်။

“ဆိုင်ကယ်မောင်းတဲ့သူက ဆိုင်ကယ်ဦးထုတ်ထဲကို ဖုန်းထည့်ပြီး ဖုန်းပြောရင်းနဲ့မောင်းလာတာ။ အဲဒီမှာ တွဲကားကပျက်နေလို့ရပ်ထားတာကို နောက်ကနေဝင်တိုက်တာပါ”ဟု ကရုဏာရှင်လူမှုကူညီရေးအသင်းမှတာဝန်ရှိသူတစ်ဦးက NSS ကိုပြောသည်။

အဆိုပါယာဉ်တိုက်မှုဖြစ်စဉ်ကြောင့် ဇေယျာသီရိမြို့နယ်တွင်နေထိုင်သည့် အသက်(၃၆)နှစ်အရွယ် ဆိုင်ကယ်ယာဉ်မောင်းအမျိုးသားမှာ အခင်းဖြစ်နေရာ၌ ပွဲချင်းပြီးသေဆုံးသွားခဲ့ကြောင်း သိရသည်။

“ဆိုင်ကယ်မောင်းတဲ့လူက နေရာမှာပဲ ပွဲချင်းပြီးဆုံးသွားတာ။ ဒဏ်ရာက ဦးခေါင်းပွင့်သွားတာ။ အဲဒီနေရာက ခဏခဏ ဖြစ်တက်တယ်။ ညဘက်တွေမောင်းရင်တော့ ဆိုင်ကယ်မောင်းသူတွေအနေနဲ့ ဖုန်းပြောရင်းနဲ့မမောင်းစေချင်ဘူး။ ကားသမားတွေကလည်း ကားပျက်နေရင် ရောင်ပြန်ပဲဖြစ်ဖြစ် သစ်ကိုင်းလေးချိုးပြီးချထားတာပဲဖြစ်ဖြစ် အန္တရာယ်ကင်းအောင် လုပ်ထားစေချင်တယ်” ဟု ၎င်းကအကြံပြု ပြောကြားထားသည်။

သေဆုံးသူအမျိုးသား၏ရုပ်အလောင်းကို ကရုဏာရှင်လူမှုကူညီရေးအသင်းက နေပြည်တော်ကုတင်(၁၀၀၀)ပြည်သူ့ဆေးရုံကြီးသို့ ပို့ဆောင်ကူညီပေးခဲ့ကြောင်း သိရသည်။