Pika (NSS) - မတ် ၁၉ 

မြောက်ကိုရီးယားခေါင်းဆောင်ကင်ဂျုံအန်းသည် အလွန်ကြီးမားသော ရော့ကတ်လောင်ချာများ ပါဝင်သည့် ပစ်ခတ်လေ့ကျင့်မှုများကို ကြီးကြပ်ခဲ့ကြောင်း နိုင်ငံပိုင်မီဒီယာ KCNA က ရေးသားဖော်ပြခဲ့သည်။

မြောက်ကိုရီးယားသည် တာတိုပစ်ပဲ့ထိန်းဒုံးကျည်အများအပြားကို ပစ်လွှတ်ခဲ့ကြောင်း တောင်ကိုရီးယားအစိုးရက ပြောဆိုခဲ့ပြီးနောက် တစ်ရက်အကြာတွင် ကင်ဂျုံအန်း ကိုယ်တိုင်ကြီးကြပ်သည့် လေ့ကျင့်မှုများ ထွက်ပေါ်လာခြင်း ဖြစ်သည်။ အမေရိကန် နှင့် တောင်ကိုရီးယားတို့သည် နှစ်စဉ်ပူးတွဲစစ်ရေးလေ့ကျင့်မှုများကို ပြီးခဲ့သည့် သီတင်းပတ်တွင် လုပ်ဆောင်ခဲ့ပြီးနောက် မြောက်ကိုရီးယား၏ ပစ်လွှတ်မှုများထွက်ပေါ်လာခြင်း ဖြစ်သည်။

ထို့အပြင် အမေရိကန်နှင့် တောင်ကိုရီးယားတို့၏ ပူးတွဲစစ်ရေးလေ့ကျင့်မှုများကို ကျူးကျော်မှုများလုပ်ဆောင်ရန် အစမ်းလေ့ကျင့်မှုတစ်ခုအဖြစ် မြောက်ကိုရီးယားက ပြစ်တင်ရှုတ်ချပြောဆိုခဲ့ကြောင်း သိရသည်။ တောင်ကိုရီးယား နိုင်ငံသို့ အမေရိကန်နိုင်ငံခြာရေးဝန်ကြီး အန်တိုနီဘလင်ကန် ရောက်ရှိနေသည့်အချိန်တွင် မြောက်ကိုရီးယားက ပင်လယ်ထဲသို့ တာတိုပစ်ပဲ့ထိန်းဒုံးကျည် အများအပြား ပစ်လွှတ်ခဲ့သည်ကို ခြေရာခံတွေ့ရှိခဲ့ကြောင်း တောင်ကိုရီးယားစစ်တပ်က မတ်လ(၁၈)ရက်တွင် ထုတ်ပြန်ပြောကြားခဲ့သည်။

အမေရိကန်နှင့် တောင်ကိုရီးယားစစ်တပ်တို့က KN-25 အမျိုးအစား ဟု ရည်ညွှန်းပြောဆိုခဲ့သည့် အလွန်ကြီးမား သောရော့ကတ်လောင်ချာသည် တာတိုပစ်ပဲ့ထိန်းဒုံးကျည်ဖြစ်ကြောင်း တောင်ကိုရီးယား၏ Yonhap သတင်း အေဂျင်စီက ရေးသားဖော်ပြခဲ့သည်။

အဆိုပါ ရော့ကတ်လောင်ချာတွင် မဟာဗျူဟာမြောက် နျူကလီးယားထိပ်ဖူးကို တပ်ဆင်နိုင်ကြောင်း မြောက်ကိုရီးယားဖက်က အခိုင်အမာပြောထားသည်။ ရော့ကတ်လောင်ချာအများအပြားသည် ရန်သူ၏ မြို့တော် ကို တိုက်ခိုက်ရန်အတွက် ပြီးပြည့်စုံသော ကြိုတင်ပြင်ဆင်မှုများနှင့် စစ်ပွဲဖြစ်ပွားလာနိုင်ခြေကို ပိတ်ဆို့ထားနိုင်ရန် မြောက်ကိုရီးယားကို ကူညီပေးလိမ့်မည်ဟု ကင်ဂျုံအန်းက ပြောဆိုခဲ့ကြောင်း အစီရင်ခံစာတွင် ရေးသားဖော်ပြထား သည်။