Pika (NSS) - မတ် ၁၇ 

အမေရိကန်စစ်တပ်က ၎င်းတို့သည် မတ်လ(၁၆)ရက်တွင် ယီမင်အခြေစိုက်ဟူသီလက်နက်ကိုင်အဖွဲ့ ပစ်လွှတ် လိုက်သောဒရုန်းတစ်စင်းကို ဖျက်ဆီးခဲ့ပြီး အခြားတစ်စင်းမှာ ပင်လယ်နီထဲသို့ ပျက်ကျသွားခဲ့ပုံပေါ်ကြောင်း ထုတ်ပြန်ပြောကြားခဲ့သည်။ 

အဆိုပါတိုက်ခိုက်မှုအတွင်း အနီးပတ်ဝန်းကျင်ရှိ သင်္ဘောများ ထိခိုက်ပျက်စီးမှုနှင့်ပတ်သက်သည့် အစီရင်ခံစာများ ကို လက်ရှိအချိန်အထိ မတွေ့ရှိရသေးကြောင်း အမေရိကန်ဗဟိုကွပ်ကဲမှုဌာနချုပ် (CENTCOM) က ထုတ်ပြန် ပြောကြားခဲ့သည်။ ထို့အပြင် ယီမင်နိုင်ငံရှိ ဟူသီလက်နက်ကိုင်အဖွဲ့ထိန်းချုပ်ထားသောနေရာများတွင် ရေအောက် သုံး ဒရုန်း(၅)စင်းနှင့် ဝေဟင်သုံးဒရုန်းတစ်စင်းတို့ကို ဖျက်ဆီးပစ်ခဲ့ကြောင်းလည်း (CENTCOM) က ပြောကြားခဲ့သည်။

CENTCOM က "ဒီဒရုန်းတွေဟာ ဒေသတွင်းမှာရှိတဲ့ အမေရိကန်စစ်သင်္ဘောတွေနဲ့ ကုန်တင်သင်္ဘောတွေအတွက် ခြိမ်းခြောက်မှုတစ်ခုဖြစ်လာနိုင်တာကြောင့် ယခုလိုမျိုးဖျက်ဆီးပစ်ခဲ့တာပါ" ဟု ထုတ်ပြန်ပြောဆိုခဲ့သည်။ ဟူသီလက်နက်ကိုင်အဖွဲ့၏ တိုက်ခိုက်မှုများကြောင့် သင်္ဘောကုမ္ပဏီများသည် ၎င်းတို့၏သင်္ဘောများကို ရှည်လျား သောရေကြောင်းလမ်းဖြစ်သည့် အာဖရိကတောင်ပိုင်းတစ်ဝိုက်သို့ လမ်းကြောင်းပြောင်းခိုင်းခဲ့ပြီး ပို့ဆောင်ခမြင့်မားခြင်းနှင့် ပို့ဆောင်မှုနှောင့်နှေးခြင်းတို့ကြောင့် ကမ္ဘာ့ကုန်သွယ်မှုကို အနှောင့်အယှက်ဖြစ်စေခဲ့ ကြောင်း သိရသည်။

ထို့အပြင် အစ္စရေး-ဟားမက်စစ်ပွဲသည် အရှေ့အလယ်ပိုင်းဒေသကို မတည်မငြိမ်ဖြစ်စေသည်အထိ ပိုမိုကျယ်ပြန့်လာမည်ကို စိုးရိမ်မှုများမြင့်တက်နေကြောင်းလည်း သိရသည်။ ဟူသီလက်နက်ကိုင်အဖွဲ့၏ ကုန်တင်သင်္ဘောများ ကို ပစ်မှတ်ထားတိုက်ခိုက်မှုများအား လက်တုံ့ပြန်သည့်အနေဖြင့် အမေရိကန်နှင့်ဗြိတိန်တပ်ဖွဲ့တို့သည် ယီမင်နိုင်ငံ ရှိ ဟူသီလက်နက်ကိုင်အဖွဲ့၏ ပစ်မှတ်များကို လေကြောင်းမှ တိုက်ခိုက်မှုများ ဆက်တိုက်လုပ်ဆောင်ခဲ့ကြောင်း သိရသည်။