ဂျန်ဇက် (NP News) - မတ် ၃ဝ

ကမ္ဘာ့ဘောလုံးအဖွဲ့ချုပ် FIFA ဟာ အင်ဒိုနီးရှားနိုင်ငံကို ယူ ၂ဝ ကမ္ဘာ့ဖလားပြိုင်ပွဲ အိမ်ရှင်အဖြစ် လက်ခံကျင်းပဖို့ ဆုံးဖြတ်ထားမှုကို ပြန်ရုတ်သိမ်းလိုက်ကြောင်းသိရပါတယ်။

အင်ဒိုနီးရှားတာဝန်ရှိသူများဟာ ယူ ၂ဝ ကမ္ဘာ့ဖလားပြိုင်ပွဲမှာ အစ္စရေးနိုင်ငံ ပါဝင်ယှဉ်ပြိုင်မှာကို ကန့်ကွက်ခဲ့ပြီးနောက် FIFA က အခုလိုမျိုး ဆုံးဖြတ်ခဲ့တာဖြစ်ပါတယ်။ FIFA က " လက်ရှိဖြစ်ပွားနေတဲ့ အခြေအနေတွေကြောင့် အင်ဒိုနီးရှားကို ၂ဝ၂၃ ခုနှစ်အတွင်းကျင်းပမယ့် ကမ္ဘာ့ဖလားပြိုင်ပွဲ အိမ်ရှင်အဖြစ် လက်ခံကျင်းပခြင်းကို ပြန်ရုတ်သိမ်းလိုက်တယ်။ အိမ်ရှင်အသစ်အဖြစ်လက်ခံကျင်းပမယ့် နိုင်ငံအသစ်ကို မကြာမီကြေညာသွားမှာဖြစ်ပါတယ်။ ပြိုင်ပွဲကျင်းပမယ့် အချိန် နဲ့ရက်တွေကတော့ အပြောင်းအလဲရှိမှာ မဟုတ်ဘူး" လို့ပြောပါတယ်။

အင်ဒိုနီးရှားနိုင်ငံဟာ အဆိုပါ ယူ ၂ဝ ကမ္ဘာ့ဖလားပြိုင်ပွဲကို အိမ်ရှင်အဖြစ် မြို့ပေါင်း (၆) မြို့မှာ လက်ခံကျင်းပဖို့ အစောပိုင်းက စီစဉ်ခဲ့ပေမယ့်လည်း လက်ရှိအချိန်မှာ ကျင်းပခွင့်ရမှာ မဟုတ်ကြောင်းသိရပါတယ်။ ယူ ၂ဝ ကမ္ဘာ့ဖလားပြိုင်ပွဲကို မေလ ၂ဝ ရက်ကနေ ဇွန်လ ၁၁ ရက်အထိကျင်းပသွားမှာဖြစ်ကြောင်း သိရပါတယ်။ အဆိုပါပြိုင်ပွဲကို အသင်းပေါင်း (၂၄)သင်းပါဝင်ယှဉ်ပြိုင်မှာဖြစ်ပြီး အစ္စရေးနိုင်ငံက ပြိုင်ပွဲကိုပါဝင်ယှဉ်ပြိုင်ဖို့ ပထမဆုံးအကြိမ် ခြေစစ်ပွဲအောင်ထားတဲ့ အသင်းဖြစ်ပါတယ်။

အင်ဒိုနီးရှားဟာ ကမ္ဘာ့နိုင်ငံတွေထဲ မွတ်စလင်အများဆုံးရှိနေတဲ့နိုင်ငံဖြစ်ကာ လူဦးရေ သန်းပေါင်း ၂၇ဝ ကျော်ရှိပြီး ဘောလုံးအားကစားနည်းက အင်ဒိုနီးရှားမှာလူကြိုက်များတဲ့ကစားနည်းဖြစ်ပါတယ်။ အင်ဒိုနီးရှားဟာ အစ္စရေးနဲ့ အငြင်းပွားမှုများ၊ ပဋိပက္ခများဖြစ်ပွားနေတဲ့ ပါလက်စတိုင်းကို ထောက်ခံ အားပေးပြီး အစ္စရေးနဲ့တရားဝင် သံတမန်ဆက်ဆံရေး မရှိတဲ့နိုင်ငံလည်းဖြစ်ပါတယ်။ 

ဘာလီကျွန်း အုပ်ချုပ်ရေးမှူးက ယူ ၂ဝ ကမ္ဘာ့ဖလားပြိုင်ပွဲမှာ အစ္စရေးနိုင်ငံ ပါဝင်ယှဉ်ပြိုင်မှာကို ပိတ်ပင်ပေးဖို့ အင်ဒိုနီးရှား အားကစားဝန်ကြီးထံတောင်းဆိုခဲ့ရာ အင်ဒိုနီးရှားဘောလုံးအဖွဲ့ချုပ်တာဝန်ရှိသူများကလည်း ပြိုင်ပွဲမှာ အစ္စရေးပါဝင်မှုကို ပိတ်ပင်ပေးဖို့ FIFA ထံ ထပ်မံတောင်းဆိုခဲ့ကြောင်းသိရပါတယ်။ ကမ္ဘာ့ဘောလုံး အဖွဲ့ချုပ်က ပြိုင်ပွဲတွေမှာ လူမျိုးရေး၊ ဘာသာရေး ခွဲခြားမှု မရှိဘဲ အားကစား စိတ်ဓါတ်အပြည့်နဲ့ယှဉ်ပြိုင်ခြင်းမျိုးသာ လုပ်ဆောင်ဖို့ သတ်မှတ်ချက်များရှိနေကြောင်း သိရပါတယ်။