Pika (NSS) - မတ် ၁၂ 

အိန္ဒိယနိုင်ငံသည် နျူကလီးယားထိပ်ဖူးပေါင်းများစွာ သယ်ဆောင်နိုင်သော ပြည်တွင်းထုတ် ပဲ့ထိန်းဒုံးကျည်ကို အောင်မြင်စွာ စမ်းသပ်ပစ်လွှတ်ခဲ့ကြောင်း ဝန်ကြီးချုပ်မိုဒီက မတ်လ(၁၁)ရက်တွင် ထုတ်ဖော်ပြောခဲ့သည်။ 

Multiple Independently Targetable Re-entry Vehicle (MIRV) နည်းပညာဖြင့် ပထမဆုံးပြည်တွင်းထုတ် Agni-5 ဒုံးကျည်ကို အောင်မြင်စွာ စမ်းသပ်ပစ်လွှတ်နိုင်ခဲ့ခြင်းအတွက် ဂုဏ်ယူမိကြောင်း မိုဒီက ပြောကြားခဲ့သည်။ MIRV နည်းပညာသည်  Agni-5 ဒုံးကျည်ကို နျူကလီးယားထိပ်ဖူးပေါင်းများစွာအား တစ်ပြိုင်နက်သယ်ဆောင်နိုင်အောင် လုပ်ဆောင်ပေးသောကြောင့် ၎င်းတို့သည် ကွဲထွက်ကာ မတူညီသောပစ်မှတ်များကို ထိမှန်နိုင်စွမ်းရှိကြောင်းလည်း သိရသည်။

သို့သော်လည်း အဆိုပါပစ်လွှတ်မှုနှင့်ပတ်သက်ပြီး နောက်ထပ်အသေးစိတ်အချက်အလက်များကို မိုဒီက ထုတ်ဖော် ပြောဆိုခဲ့ခြင်းမျိုးမရှိခဲ့ကြောင်းလည်း သိရသည်။ အိန္ဒိယအစိုးရသည် ကာကွယ်ရေးသုတေသနနှင့် ဖွံ့ဖြိုးတိုးတက် ရေးအဖွဲ့မှ ထုတ်လုပ်သော Agni-5 ဒုံးကျည်အများအပြားကို ယခင်ကစမ်းသပ်ပစ်လွှတ်ခဲ့ဖူးကြောင်း သိရသည်။

ကာကွယ်ရေးဝန်ကြီး Rajnath Singh က "အိန္ဒိယနိုင်ငံဟာ ဒုံးကျည်နည်းပညာကို ဖန်တီးနိုင်တဲ့နိုင်ငံတွေထဲမှာ ပါဝင်လာပါပြီ" ဟု ပြောခဲ့သည်။

မီးဟု အဓိပ္ပါယ်ရသော Agni သည် ၁၉၈၃ ခုနှစ်တွင် စတင်ခဲ့သော ပဲ့ထိန်းဒုံးကျည်ဖွံ့ဖြိုးတိုးတက်ရေး ပရောဂျက်၏ တစ်စိတ်တစ်ပိုင်းအဖြစ် အိန္ဒိယမှ တီထွင်ထုတ်လုပ်ခဲ့သောဒုံးကျည်များကို ပေးသည့် အမည်ဖြစ်ကြောင်းလည်း ဖြစ်သည်။ မကြာသေးမီနှစ်များအတွင်း အိန္ဒိယသည် အမေရိကန်၊ ဂျပန် နှင့် ဩစတြေးလျနိုင်ငံတို့ အပါအဝင် အနောက်အုပ်စုနိုင်ငံများ နှင့် ကာကွယ်ရေးပူးပေါင်းဆောင်ရွက်မှုများကို ပိုမိုနက်ရှိုင်းလာအောင် လုပ်ဆောင်ခဲ့ကြောင်းလည်း သိရသည်။