Htay Oung (NSS) - မတ် ၁၂ 

မြန်မာနိုင်ငံဘက်ခြမ်းမှ ပစ်ခတ်လိုက်တဲ့သေနတ်ကျည်ထိမှန်ပြီး ဘင်္ဂလားဒေ့ရှ်နယ်စပ်ဒေသ ဘန်ဒါဘန်ခရိုင် နိုင်ခေါင်ချာရီကျေးရွာကောင်စီအဖွဲ့ဝင်တစ်ဦး ဒဏ်ရာရရှိသွားကြောင်း သိရှိရတယ်လို့ ဒါကာအခြေစိုက် “ဘီဇင်း နက်စ်_စတင်းဒတ်” TBS သတင်းအေဂျင်စီက ယမန်နေ့ ရေးသားပါတယ်။

ဒဏ်ရာရရှိသွားသူဟာ အမှတ်(၈) ကျေးရွာအုပ်စု ကောင်စီအဖွဲ့ဝင်တစ်ဦးဖြစ်ကြောင်း၊ တနင်္လာနေ့ ညနေ ၄ နာရီ ခန့် နယ်စပ်ဒေသ ဂျမ်ချာရီဗလီအနီး ဒေသခံများနဲ့ စကားပြောဆိုနေခိုက် နယ်ခြားကို ဖြတ်သန်းလာတဲ့ သေနတ် ကျည်ဆန်က ခါးနေရာကို ထိမှန်ခြင်း ဖြစ်တယ်လို့ အဆိုပါကျေးရွာကောင်စီဥက္ကဋ္ဌဖြစ်သူက ပြောပြပါတယ်။

ဒဏ်ရာရရှိသူကို ကော့ခ်ဘဇားမြို့နယ်ဆေးရုံထံ ချက်ချင်းပို့ဆောင်ပေးလိုက်ကြောင်း သိရှိရပေမယ့် အဲဒီကိစ္စနဲ့ ပတ်သက်ပြီး ကျေးရွာအုပ်စု ရဲကင်းတာဝန်ခံနဲ့ ဖုန်းအဆက်အသွယ် မရရှိသေးပါဘူး။ တချိန်တည်းမှာပဲ မြန်မာ ဘက်ခြမ်းမှာ တပ်မတော်နဲ့ သူပုန်များအကြား တိုက်ပွဲများ ပြင်းထန်စွာဖြစ်ပွားခဲ့ကြောင်း၊ တနင်္လာနေ့မှာ မြန်မာ နယ်ခြားစောင့်ရဲတပ်ဖွဲ့ (BGP) မှ တပ်ဖွဲ့ဝင် ၂၉ ဦးခန့်ဟာ ဘင်္ဂလားဒေ့ရှ်နိုင်ငံဘက်ကို ပြေးဝင်ခိုလှုံလာခဲ့ကြောင်း သတင်းများ ထွက်ပေါ်ခဲ့ပါတယ်။

နယ်ခြားစောင့်တပ်တွေနဲ့ လုံခြုံရေးတပ်ဖွဲ့ဝင်တွေ အပါအဝင် မြန်မာနိုင်ငံသား ၃၃၀ ကို ဖေဖေါ်ဝါရီလ ၁၅ ရက်နေ့ စောစောပိုင်းမှာ ရခိုင်ပြည်နယ်အတွင်း ပြန်လည်ပို့ဆောင်ခဲ့ပြီးဖြစ်ကြောင်း သိရှိရပါတယ်။ 

ရခိုင်ပြည်နယ်အတွင်း အစိုးရတပ်များနဲ့ ရက္ခိုင်တပ်တို့အကြား တိုက်ပွဲတွေ ဆက်လက်ဖြစ်ပွားနေပြီး ယမန်နေ့ အထိ ဘင်္ဂလားဒေရှ့်နိုင်ငံအတွင်း ခိုလှုံနေသူ မြန်မာနယ်ခြားစောင့်ရဲတပ်ဖွဲ့ဝင် ၁၇၉ ဦးထက်မနည်းရှိကြောင်း ဘင်္ဂလားဒေ့ရှ် နယ်ခြားကာကွယ်ရေးရဲတပ်ဖွဲ့ ပြည်သူ့ဆက်ဆံရေးအရာရှိက အတည်ပြုတယ်လို့ ဒါကာအခြေစိုက် ဒေးလီးစတားရဲ့အခြားသတင်းတစ်ပုဒ်မှာ တွေ့ရှိရပါတယ်။

မြန်မာနိုင်ငံ အောင်သပြေစခန်းမှ နယ်ခြားစောင့်တပ်ဖွဲ့ဝင်တွေဟာ ဘန်ဒါဘန်ခရိုင် နိုင်ခေါင်ချာရီမြို့နယ် ဂျမ်ချာရီ ကျေးရွာအနီး နယ်ခြားကို ဖြတ်ကျော်ပြီး ဘင်္ဂလားဒေ့ရှ်နိုင်ငံအတွင်း ဝင်ရောက်လာခဲ့ကြောင်း၊ အဲဒီလူတွေကို ဘင်္ဂလားဒေ့ရှ်နယ်ခြားကာကွယ်ရေး ရဲတပ်ဖွဲ့ အချုပ်ခန်းမှာ ထိန်းသိမ်းထားကြောင်း၊ ၂၉ ဦးဟာ တနင်္လာနေ့ နံနက်ပိုင်းနဲ့ ညနေပိုင်းမှာ ပြေးဝင်လာကြခြင်းဖြစ်ကြောင်း၊ တိုက်ပွဲများဖြစ်ပွားနေခြင်းကြောင့် ဘင်္ဂလားဒေ့ရှ်နိုင်ငံ အတွင်း ဖြတ်ကျော်ဝင်ရောက်လာတဲ့ မြန်မာနိုင်ငံသား စုစုပေါင်း ၃၃ဝ ဦးကို ဖေဖော်ဝါရီ ၁၅ ရက်မှာ ပြန်ပို့ပေးခဲ့ရာ နယ်ခြားစောင့်ရဲတပ်ဖွဲ့ဝင် ၃၀၂ ဦးနဲ့ မှီခို မိသားစုဝင် ၄ ဦး၊ တပ်မတော်သား ၂ ဦး၊ လူဝင်မှုကြီးကြပ်ရေးဝန်ထမ်း ၁၈ ဦး၊ အရပ်သား ၄ ဦးတို့ ပါဝင်ကြောင်း သိရှိရပါတယ်။

ရခိုင်ပြည်နယ်မြောက်ဖျားမှာ တိုက်ပွဲများ ပြင်းထန်လာတဲ့အတွက် ဖေဖော်ဝါရီ ၄ ရက်မှာ စတင်ပြီး ဘန်ဒါဘန်နဲ ကော့ခ်ဘဇားဒေသများအတွင်း မြန်မာနိုင်ငံသားများထွက်ပြေးဝင်ရောက်လာခဲ့ကြကြောင်း၊ သူတို့ကို ဘင်္ဂလားဒေ့ရှ်နယ်ခြား ကာကွယ်ရေးရဲတပ်ဖွဲ့က လက်နက်များ ဖြုတ်သိမ်းပြီး ချုပ်နှောင်ထားခဲ့ကြောင်း၊ ဖေဖော်ဝါ ရီ ၄ ရက်မှာ ပြေးဝင်ခိုလှုံလာသူ ၆၈ ဦးထက်မနည်းရှိပြီး ၁၅ ဦးမှာ သေနတ်ဒဏ်ရာရရှိထားကြောင်း အခြားသူ များမှာ ဖေဖော်ဝါရီ ၇ ရက်အထိ အသီးသီးဝင်ရောက်လာသူများဖြစ်တယ်လို့ ဆိုပါတယ်။

နှစ်နိုင်ငံ နယ်စပ်တလျောက် တိုက်ပွဲများဖြစ်ပွားနေစဉ် ဖေဖော်ဝါရီ ၅ ရက်မှာ မြန်မာဘက်မှ ပစ်ခတ်လိုက်တဲ့ မော်တာကျည် ကျရောက်ပေါက်ကွဲပြီး ဘန်ဒါဘန်ခရိုင် ဂေါင်းဒုံနယ်မြေ (မြန်မာ တောင်ပြိုနှင့် မျက်နှာချင်းဆိုင်) မှာ ဘင်္ဂလားဒေ့ရှ် အမျိုးသမီးတစ်ဦးနဲ့ ဒုက္ခသည် ဘင်္ဂါလီအမျိုးသားတစ်ဦးတို့ သေဆုံးခဲ့ရတယ်လို့ သတင်းမှာ ဆက်လက် ဖော်ပြပါတယ်။

#နယ်ခြားဒေသမြန်မာဘက်ခြမ်းတိုက်ပွဲများ #ဘင်္ဂလားဒေ့ရှ်နယ်ခြားကာကွယ်ရေးရဲတပ်ဖွဲ့ #ဂေါင်းဒုံ #ဘန်ဒါဘန် #ကော့ခ်ဘဇား

(The Business Standard., 11 March 2024,”Union Parishad member in Bandarban injured by shot fired from Myanmar " နှင့် အခြားဆက်စပ်သတင်းများကို #HtayOung, #OungMarine ဆီလျော်အောင်ကောက်နှုတ်ဘာသာပြန်ဆိုသည်။)