ဂျန်ဇက် (NSS) - မတ်လ ၃

ရုရှားဟာ အမေရိကန်ရဲ့စစ်ရေးသြဇာလွှမ်းမိုးမှုတွေကို အကြီးမားဆုံးစိန်ခေါ်နိုင်စွမ်းရှိနေတဲ့နိုင်ငံဖြစ်ပြီး အမေရိကန် နိုင်ငံအနေနဲ့ ၎င်းရဲ့နျူကလီးယားတပ်ဖွဲ့များကို ပိုမိုခေတ်မီအောင်လုပ်ဆောင်ဖို့ လိုအပ်နေကြောင်း အမေရိကန် လေတပ်တပ်ဖွဲ့အကြီးအကဲတစ်ဦးဖြစ်တဲ့ ဗိုလ်ချုပ်ကြီး အန်တိုနီ ကော်တွန်က ထုတ်ဖော်ပြောဆိုလိုက်ပါတယ်။ 

ရုရှားဟာ နျူကလီးယားလက်နက်အများအပြားပိုင်ဆိုင်ထားပြီး အဲဒီလက်နက်တွေကို ပိုမိုခေတ်မီအောင် လုပ်ဆောင်နေကြောင်း အမေရိကန်လေတပ် ဗိုလ်ချုပ်က ပြောပါတယ်။ ရုရှားနဲ့ တရုတ်နိုင်ငံတို့ဟာ အမေရိကန် နဲ့ မဟာမိတ်နိုင်ငံတွေကို စိန်ခေါ်နိုင်ဖို့ ၎င်းတို့ရဲ့ရပ်တည်ချက်တွေကို လျင်မြန်စွာ တိုးတက်ကောင်းမွန်အောင် လုပ်ဆောင်နေကြောင်း ရုရှား၊ တရုတ်နိုင်ငံတို့ရဲ့အပြောင်းအလဲတွေဟာ ပြီးခဲ့တဲ့နှစ်အနည်းငယ်နဲ့နှိုင်းယှဉ်ရင် ပိုမိုလျင်မြန်စွာ တိုးတက်လာနေကြောင်း အမေရိကန်လေတပ်ဗိုလ်ချုပ်ကြီး အန်တိုနီ ကော်တွန်က ပြောပါတယ်။ 

ရုရှားသမ္မတပူတင်ဟာ ပြီးခဲ့တဲ့ရက်ပိုင်းတုန်းက ၎င်းတို့ရဲ့ ရုရှားနျူကလီးယားတပ်ဖွဲ့တွေကို အလုံးစုံခေတ်မီ တိုးတက်အောင်လုပ်ဆောင်မယ်လို့ပြောဆိုခဲ့ဖူးတယ်လို့ အမေရိကန်ဗိုလ်ချုပ်ကြီး ကော်တွန်က ဆိုပါတယ်။ ၎င်းက "ရုရှားဟာ လက်ရှိအချိန်မှာ ကမ္ဘာနိုင်ငံတွေထဲ နျူကလီးယားလက်နက်အများဆုံးပိုင်ဆိုင်ထားတဲ့ နိုင်ငံဖြစ်နေ တယ်" လို့ ပြောပါတယ်။ 

ရုရှားဟာ လက်ရှိအချိန်မှာ ဆာမတ် တိုက်ချင်းပစ်ပဲ့ထိန်းဒုံးကျည်နဲ့ နျူကလီးယားလက်နက်တွေကို တင်ဆောင် ပစ်ခတ်နိုင်စွမ်းရှိတဲ့ရေငုပ်သင်္ဘောအသစ်တွေ ပိုင်ဆိုင်ထားကြောင်း ၎င်းက ဆိုပါတယ်။ အဆိုပါ ဆာမတ် တိုက်ချင်း ပစ်ပဲ့ထိန်းဒုံးကျည်ဟာ အကွာအဝေးမိုင်ပေါင်း ၁၁ဝဝဝ ကျော်ကို ရောက်ရှိ ပစ်ခတ်နိုင်စွမ်းရှိပြီး ဒုံးကျည်ထိပ်ဖူး မှာလည်း ပေါက်ကွဲစေတဲ့ပစ္စည်း တန်နဲ့ချီပြီး တင်ဆောင်နိုင်စွမ်းရှိတယ်လို့ ဆိုပါတယ်။

ရုရှားနဲ့ အမေရိကန်နိုင်ငံတို့ဟာ ကမ္ဘာ့နိုင်ငံတွေထဲမှာ နျူကလီးယားလက်နက်အများဆုံး ပိုင်ဆိုင်ထားတဲ့နိုင်ငံတွေစာရင်းမှာ ထိပ်ဆုံးနေရာတွေက ရပ်တည်နေတဲ့နိုင်ငံတွေဖြစ်ပါတယ်။