ALynn (NP News) - ဖေ‌ဖော်ဝါရီ ၂၅

အမေရိကန်နှင့် ယူကေတို့၏ ဖေဖော်ဝါရီလ ၂၄ ရက် (စနေနေ့) ပူးတွဲထုတ်ပြန်ချက်၌ ယီမင်ရှိ ဟူသီတို့၏ စခန်း ၁၈ ခုကို ပစ်မှတ်ထား တိုက်ခိုက်ခဲ့ကြောင်း ဖော်ပြခဲ့သည်။ 

ဇန်နဝါရီလ ၁၂ ရက် ကတည်းက စတင်ခဲ့သည့် အမေရိကန်နှင့် ယူကေတို့၏ စစ်ဆင်ရေးသည် ယခုဆိုလျှင် ၄ ကြိမ်မြောက်ရှိပြီဖြစ်သည်။ ပူးတွဲစစ်ဆင် ရေးများအပြင် အမေရိကန်သည် ဟူသီတို့၏ ပစ်မှတ်များကို နေ့စဉ်တိုက် ခိုက်ခြင်းများလည်း ပြုလုပ်လျက်ရှိသည်။ ထိုသို့ အဆက်မပြတ်တိုက်ခိုက်ခြင်းများ ဆောင်ရွက်သော်လည်း ဟူသီတို့အား ဟန့်တားနိုင်ခြင်းမရှိဘဲ ရေကြောင်းကုန်သွယ်ရေးစရိတ်များကိုသာ တိုးလာစေသည်။ အမေရိကန်ကာကွယ်ရေးဝန်ကြီးက “အီရန်တို့ ကျောထောက်နောက်ခံပေးထားတဲ့ ဟူသီစစ်သွေးကြွတွေကို ရှင်းလင်းမှဖြစ်မည်ဆိုကြောင်း၊ သို့မဟုတ်လျှင် ဟူသီတွေရဲ့တိုက်ခိုက်မှုတွေက အရှေ့အလယ်ပိုင်းရဲ့စီးပွားရေး၊ သဘာဝပတ်ဝန်း ကျင်ကို ထိခိုက်စေသလို ယီမင်နဲ့အခြားနိုင်ငံတွေကို အထောက်အပံ့တွေပေးပို့ရာမှာလည်း အနှောင့်အယှက်ဖြစ်စေကြောင်း”ဟု ဖော်ပြခဲ့သည်။ 

ဟူသီတို့အားတိုက်ခိုက်ရန် ဩစတေးလျ၊ ဘာရိန်း၊ ကနေဒါ၊ ဒိန်းမတ်၊ နယ်သာလန်နှင့် နယူးဇီလန်တို့ကလည်း ထောက်ခံပေးထားသည်။ ဟူသီအဖွဲ့၏ ပြောရေးဆိုခွင့်ရှိသူက “၎င်းတို့သည် အမေရိကန် နှင့် ယူကေ၏ စစ်ဆင်ရေး များကို ကြံ့ကြံ့ခံတုံ့ပြန်လျက်ရှိကြောင်း နှင့် ဂါဇာစစ်ပွဲအတွင်း ပါလက်စတိုင်းလူမျိုးများအပေါ် အင်အားသုံးတိုက်ခိုက်နေခြင်းများကို ရပ်တန့်မှသာ ၎င်းတို့ဘက်ကလည်း ပင်လယ်နီအတွင်း စစ်ဆင်ရေးများကို ရပ်တန့်ပေးမည်ဖြစ်ကြောင်း”ပြောကြားခဲ့သည်။ 

AP သတင်းဌာန၏ ဖော်ပြချက်အရ နိုဝင်ဘာလ ၁၉ ရက်ကတည်းက စတင်ခဲ့သော ပင်လယ်နီနှင့် အေဒင်ပင်လယ်ကွေ့အတွင်း ဟူသီတို့၏ တိုက်ခိုက်မှုများသည် ၅၇ ကြိမ်ထက်မနည်းရှိပြီဖြစ်ကြောင်း သိရသည်။ ဟူသီပြောရေး ဆိုခွင့်ရှိသူက အမေရိကန်အလံလွှင့်ထားသည့် ဓာတုပစ္စည်းနှင့် ရေနံတင် တင်သင်္ဘောကို ဒုံးကျည်ဖြင့် တိုက်ခိုက်ခဲ့ကြောင်း စနေနေ့က ဖော်ပြခဲ့သည်။ အမေရိကန်ဘက်ကလည်း အဆိုပါတိုက်ခိုက်ခံရမှုကို အတည်ပြုခဲ့ပြီး သင်္ဘောမှာအပျက်စီးမရှိသလို ထိခိုက်သူလည်း မရှိခဲ့ကြောင်းသိရသည်။ ထို့ပြင် ယူကေပင်လယ်ပြင်လုံခြုံရေးအေဂျင်စီ UKMTO က စနေနေ့ညက Djibouti ဆိပ်ကမ်းအနီး ၎င်းတို့၏သင်္ဘောတစ်စင်းတိုက်ခိုက်ခံခဲ့ရကြောင်း ဖော်ပြခဲ့သည်။ 

ယခုအခါ ဂါဇာစစ်မီးသည် အရှေ့အလယ်ပိုင်းဒေသ အနှံ့အပြားကို တဖြည်း ဖြည်းကူးစက်လာနေပြီ ဖြစ်သည်။ အစ္စရေး-လက်ဘနွန်နယ်စပ်တွင်လည်း ဟစ်ဇ်ဘိုလာတို့က အစ္စရေးကို တိုက်ခိုက်လျက်ရှိသလို အီရန်ထောက်ခံသည့် အီရတ်စစ်သွေးကြွတို့ကလည်း အမေရိကန်အခြေစိုက်စခန်းများကို တိုက်ခိုက်လျက်ရှိနေကြသည်။