Pearl (NSS) - ဖေဖော်ဝါရီ ၂၄

Online ချေးငွေလုပ်ငန်းဖြင့် အများပြည်သူများထံ ငွေကြေးအမြတ်ထုတ်လိမ်လည်လုပ်ကိုင်နေသည့်အဖွဲ့အား ဖမ်းဆီးရမိခဲ့ကြောင်း နစက၏ ထုတ်ပြန်ချက်အရသိရသည်။

Online မှတစ်ဆင့် အတိုးနှုန်းမြင့်မားစွာဖြင့် ချေးငွေပေးခြင်းများပြုလုပ်၍ ၎င်းချေးငွေများအား အမြန်ဆုံး ပြန်လည် ပေးသွင်းစေခြင်း၊ ပေးသွင်းခြင်းမရှိပါက ချေးငွေရယူစဉ် နည်းပညာအသုံးပြု၍ ၎င်းတို့ရယူထားသည့်အချက် အလက်များဖြင့် ခြိမ်းခြောက်ငွေတောင်းခံခြင်းစသည်ဖြင့် ငွေကြေးလိမ်လည်မှုများ ပြုလုပ်လျက်ရှိကြောင်း တိုင်ကြားချက်များ၊ အခြားသတင်း အချက်အလက်များအရ ဖော်ထုတ်အရေးယူနိုင်ရန် တာဝန်ရှိသူများက ဆောင်ရွက်နေကြောင်း သိရသည်။ 

ထိုသို့ဆောင်ရွက်ရာ ရန်ကုန်တိုင်း၊ လှိုင်သာယာမြို့နယ်၊ (၉)ရပ်ကွက်၌ နေထိုင်သူ မဆုရည်နွယ်သည် အွန်လိုင်း ချေးငွေများနှင့်ပတ်သက်၍ ဖုန်းဆက်ခြိမ်းခြောက်ကာ ငွေကြေးတောင်းခံမှုများ ပြုလုပ်နေကြောင်း သိရသဖြင့် ဖေဖော်ဝါရီ ၁၅ ရက်တွင် ၎င်းအား စစ်ဆေးဖော်ထုတ်ခဲ့ရာ ၎င်းသည် ၂၀၂၃ ခုနှစ်၊ ဇန်နဝါရီလခန့်တွင် Mashala Tech CO.,Ltd အမည်ရှိ အွန်လိုင်းချေးငွေ ဝန်ဆောင်မှုလုပ်ငန်း၊ Team – A တွင် ချေးငွေကောက်ခံသူအဖြစ် တစ်လလျှင် လစာ ၃၂၀၀၀၀ ကျပ်ဖြင့် စတင် ဝင်ရောက်လုပ်ကိုင်ခဲ့ကြောင်း သိရသည်။

၎င်း၏ ထွက်ဆိုချက်များအရ ဖေဖော်ဝါရီ ၁၅ ရက်မှ ၂၂ ရက်အထိ ဖော်ထုတ်ဖမ်းဆီးခဲ့ရာ HR ဝန်ထမ်းဖြစ်သူ မမြတ်စန္ဒာဝင်း အပါအဝင် စုစုပေါင်း၁၃ ဦးအား ၎င်းတို့လိမ်လည်ရာတွင် အသုံးပြုသည့် Laptop ၁၃၃ လုံး၊ လက်ကိုင်ဖုန်း ၁၀ လုံး၊ မော်တော်ယာဉ် ၁ စီးတို့နှင့်အတူ ဖမ်းဆီးရမိခဲ့ကြောင်း သိရသည်။ 

စိစစ်ချက်များအရ အဆိုပါလုပ်ငန်းအား ဦးဇေယျာမင်း တစ်ဦးတည်းအမည်ဖြင့် မှတ်ပုံတင်ထားသော်လည်း လုပ်ငန်းလုပ်ကိုင်နေသူမှာ တရုတ်နိုင်ငံသား Mr. Yu Linfeng (ခ) Willian ဖြစ်ကာ ဗိုလ်တထောင်မြို့နယ်၊ ကမ်းနားလမ်းတွင် ဖွင့်လှစ်ထားပြီး Mr. Yu Linfeng သည် ဇန်နဝါရီ ၅ ရက်၌ ကမ္ဘောဒီးယားနိုင်ငံသို့ ထွက်ခွာသွားရာ မြန်မာ နိုင်ငံသို့ ပြန်လည်ဝင်ရောက်ခြင်းမရှိသေးကြောင်း၊ လုပ်ငန်းများလုပ်ကိုင်ရာတွင် Mr. Yu Linfeng က ဦးဆောင်ပြီး ဖမ်းဆီးရမိသူ မြတ်စန္ဒာဝင်း၊ မမို့မို့အောင်နှင့် ဖမ်းဆီးရန် ကျန်ကျော်မင်းဖြိုး တို့က ကြီးကြပ် လုပ်ကိုင်လျက်ရှိကြောင်း သိရသည်ဟု နစကမှ ဆိုသည်။ 

၎င်းတို့၏ ကြီးကြပ်မှုအောက်တွင် အွန်လိုင်းချေးငွေများ ရယူလာစေရေး ဆွဲဆောင်သည့်အဖွဲ့၊ ချေးငွေ Application Download ပြုလုပ်ရန် ခိုင်းစေသည့်အဖွဲ့၊ ချေးငွေလျှောက်လွှာစိစစ်သည့်အဖွဲ့နှင့် ချေးငွေပြန်လည် ခြိမ်းခြောက် တောင်းခံသည့်အဖွဲ့ဟူ၍ အဖွဲ့ ၄ ဖွဲ့ခွဲကာလုပ်ကိုင်လျက်ရှိကြောင်း သိရသည်။

ချေးငွေလျှောက်လွှာစိစစ်သည့်အဖွဲ့ကို ဖမ်းဆီးရမိပြီးဖြစ်သည့် Leader ဖြစ်သူ မလွင်မေချစ်အပါအဝင် အဖွဲ့ဝင် ၁၅ ဦး ၊ ချေးငွေပြန်လည်ခြိမ်းခြောက်တောင်းခံသည့် အဖွဲ့ကို Team A, E, J, N, S, X အဖွဲ့ ၆ ဖွဲ့ခွဲထားပြီး ဖမ်းဆီးရန်ကျန် မောင်လဝန်းယံ၊ လင်းကောင်းခန့်၊ မနှင်းလပြည့်၊  မောင်ဇာနည်ဖြိုး၊ မပန်းအိမွန်၊ မနှင်းအိခိုင်  နှင့် ဖမ်းဆီးရမိထား သော မဝေဖြိုးသွယ်၊ မအေးမြင့်သူ၊  မရတနာတို့ကဦးဆောင်၍ ချေးငွေကောက်ခံသူများအပါအဝင်  စုစုပေါင်း ၉၁ ဦးတို့ဖြင့် ဖွဲ့စည်း ထားကြောင်း သိရှိရသည်။

လက်ရှိတွင် ဖမ်းဆီးရန်ကျန် Mr.Yu Linfeng နှင့် ဖမ်းဆီးရမိသူများဖြစ်သည့် မမြတ်စန္ဒာဝင်း၊ မအေးမြင့်သူ ၊ ဆုရည်နွယ်၊ မဝေဖြိုးသွယ်၊ မင်းခန့်ကျော်၊ ဇော်ထက်အောင်၊ ကျော်ဇင်ထက်၊ မရတနာ၊ မလွင်မေချစ်၊ ရဲနိုင်ဝင်း၊ မမို့မို့အောင်၊ မင်းခန့်ကျော် ၊ ငြိမ်းချမ်းဆွေနှင့် မစုစုအေးတို့အား အမှုဖွင့်လှစ်၍ တရားဥပဒေနှင့်အညီ အရေးယူရန် ဆောင်ရွက်လျက်ရှိပြီး ဖြစ်စဉ်တွင် ပါဝင်ပတ်သက်သူများအား ဆက်လက်ဖမ်းဆီးရမိရေး ဆောင်ရွက်လျက်ရှိ ကြောင်း သိရသည်။